ԵՐԿՐՈՒՄ ՈՉ ՄԻ ԿԱՌՈՒՅՑ ԻՐ ՀԻՄՆԱԿԱՆ ԳՈՐԾԱՌՈՒՅԹՈՎ ԶԲԱՂՎԱԾ ՉԷ

Հարցազրույց ՀԱԿ իրավական աջակցության կենտրոնի ղեկավար ԳԱԳԻԿ ՋՀԱՆԳԻՐՅԱՆԻ հետ:-Այսօր ՀՀ քաղաքացիների մեծ մասը հանրահավաքի է գալու վճռական գործողությունների գնալու ակնկալիքով: Իսկ ՀԱԿ-ն ի՞նչ է ակնկալում ՀՀ քաղաքացուց:-Մարտի 1-ի հանրահավաքից հետո, ըստ էության, քաղաքացիները գալիս են ոչ թե տեղեկություն ստանալու, տեսակետ լսելու, որեւէ խնդրի շուրջ ՀԱԿ կարծիքն իմանալու, այլ որոշումներ կայացնելու: Մարտի 1-ին մեր առաջնորդ Լեւոն Տեր-Պետրոսյանի կողմից 15 կետանոց պահանջ ներկայացվեց այս իշխանություններին, եւ ժողովուրդը քվեարկեց պահանջների օգտին: Այսինքն` ՀԱԿ-ը հիմք դրեց ժողովրդական իշխանության ուղղակի իրականացման մի ձեւի, որը գործել է դեռեւս հին Հունաստանի քաղաք-պետություններում: Եւ սրանից հետո մեր առաջիկա հանրահավաքները վերածվել են ժողովրդի իշխանության դրսեւորման համաժողովների: Մենք ժողովրդին ասել ենք, որ դուք հանրահավաքի չեք գալիս, այլ գալիս եք որոշում կայացնելու:-Բացի որոշում կայացնողի կարգավիճակից, հասարակությունն այլ բան չստացավ. 15 կետերի պահանջները չկատարվեցին:-Այդ պահանջներից միայն առաջինի` քաղբանտարկյալների ազատության համար էր 15-օրյա ժամկետ տրված, մնացած կետերի համար ժամկետ տրված չէր: Բայց մենք ակնկալում էինք, որ այս իշխանությունները խելամիտ կլինեին եւ ինչ-որ լուծումներ կտային այդ պահանջներին: Եթե ուշադիր լինեք, այդ պահանջները ձեւավորել է իշխանությունը իր ապօրինի գործողությունների  շնորհիվ: Այնպես որ մենք այսօր կտեսնենք, թե ինչ որոշում է կայացնելու Ժողովուրդը:-Իսկ արմատական քայլեր կհետեւե՞ն:-Եթե մինչեւ այժմ ենթադրում էիք, որ ակնկալվող քայլերի հեղինակը պիտի լինի ՀԱԿ-ը, ապա այժմ ձեռնարկվող քայլերի մասին պետք է որոշում կայացնի ժողովուրդը: Ես չեմ կարող կանխատեսումներ անել: Ես մեկն եմ լինելու հանրահավաքի 70-80 հազար քաղաքացիներից, եւ ինչպես կորոշի մեծամասնությունը, դա էլ ես կընդունեմ:-Չե՞ք վախենում, որ Ձեզ կմեղադրեն անվճռականության մեջ:-Բայց դուք ի՞նչ գիտեք, թե ժողովուրդն ինչ որոշումներ է կայացնելու:-Կարծես ՀԱԿ-ը փորձում է պատասխանատվությունը ժողովրդի վրա թողնել:-Մենք էնպիսի քաղաքական ուժ չենք, որ պատասխանատվությունը գցենք  որեւէ մեկի վրա: Մենք ենք, ըստ էության, այն ուժը, որ խնդիր ու նպատակ է դրել այս իշխանություններից ազատել երկիրը եւ որեւէ նահանջ կամ զիջողականություն մինչ այժմ չենք ցուցաբերել ու չենք ցուցաբերելու:-Իսկ ՀԱԿ-ի ներսում եղած թեւերի մասին ի՞նչ կասեք, որոնց մասին խոսեց նաեւ Արամ Կարապետյանը` որակելով աղավնիներ, բազեներ: Ի վերջո, ի՞նչ է կատարվում կոնգրեսում:-Ճիշտն ասած, ես չգիտեմ, թե որտեղից է Արամ Կարապետյանի տեղեկությունը, որովհետեւ նա ՀԱԿ անդամ չէ: ՀԱԿ-ում ամեն հարցի շուրջ նույն անձը կամ կուսակցությունը մի դեպքում կարող է կենտրոնամետ դիրքորոշում ունենալ, մի դեպքում` աջ կամ ձախ: Տարակարծություն  կա, որը շատ լավ է, բայց որոշումներ կայացնելուց հետո ՀԱԿ-ում բոլորը գործում են միասնական: Չկան լուրջ ներքին հակասություններ:-Բայց փաստերն այլ բանի մասին են խոսում: «Ժառանգության» ղեկավարի ակցիան ՀԱԿ-ում ոչ բոլորը ողջունեցին, բայց որոշներն էլ այցելեցին:-«Ժառանգություն»-ը ինքնուրույն քաղաքական միավոր է, ինքնուրույն է որոշում իր անելիքները: Եւ եթե այսօր կուսակցության ղեկավարը հացադուլ է անում, դա իր գործն է: ՀԱԿ ներկայացուցիչները կարող են այցելել, կարող են ողջունել կամ չողջունել:Դա որեւէ սկզբունքային նշանակություն չունի:-Նույն «Ժառանգության» ներկայացուցիչ Ստեփան Սաֆարյանը հայտարարեց, որ ՀԱԿ-ի հետ բանակցություններ են վարում, սակայն ՀԱԿ-ում այդ մասին տեղյակ չէին:-Ես ՀԱԿ կենտրոնական շտաբի անդամ եմ եւ նման բանակցությունների մասին տեղյակ չեմ: -Նշվում է, որ Դավիթ Շահնազարյան ու Դավիթ Մաթեւոսյանն են բանակցությունների գնացել:   -Բանակցությունների չեն գնացել: Մենք տեղյակ ենք, որ մեր մի քանի ընկերներ այցելել են «Ժառանգության» գրասենյակ, իրենց զորակցությունն են հայտնել այդ կուսակցությանը եւ նրա պատգամավորներին: Որեւէ այլ քաղաքական պայմանավորվածություն չկա, եթե լիներ, մենք անպայման կբարձրաձայնեինք:-Իսկ իշխանական թեւերից որեւէ մեկի հետ պայմանավորվածություն ունի՞ ՀԱԿ-ը, ինչպես մեղադրում են մյուս ընդդիմադիրները:-Իշխանությունների հետ չկա որեւէ համագործակցություն, դա տարածում են հենց իշխանությունները, որպեսզի ՀԱԿ համակիրների մեջ անվստահություն սերմանեն: Դուք գիտեք մեր տեսակետը` նախ պետք է ազատ արձակվեն բոլոր քաղբանտարկյալները, մարտի 1-ի մեղավորները պետք է քրեական պատասխանատվության ենթարկվեն, որից հետո հնարավոր է ՀԱԿ-ը  այս իշխանությունների հետ բանակցություններ վարի, այն էլ` արտահերթ ընտրությունների պայմանների եւ ժամկետների վերաբերյալ:-Սերժ Սարգսյանը ոստիկանությունում խոսեց անբարոյականության մասին, որից հետո պատիժներ չհետեւեցին: Ի՞նչ էր դա նշանակում:-Ես համամիտ եմ, որ եթե ոստիկանը կոծկում է սպանության իրական մեղավորին եւ օժանդակում է, որ մի անմեղ քաղաքացու քրեական պատասխանատվության ենթարկեն, դա անբարոյական է: Բայց դա միայն  անբարոյականություն  չէ, դա նախ եւ առաջ  հանցագործություն է: Իսկ արդյո՞ք անբարոյական չեն այն ոստիկանները, որոնք մարտի 1-ի առնվազն 10 սպանությունները մինչեւ այժմ չեն բացահայտել: Թե՞ կարելի է Շահինյան Հովհաննեսի քրոջ որդու գործով սկզբունքայնություն դրսեւորել, իսկ Տիգրան Խաչատրյանի սպանության գործով` ոչ: Այնպես որ չի կարող անբարոյականությունը ընտրովի լինել: Իսկ անբարոյական չե՞ն այն բոլոր ոստիկանները, կեղծ վկաները, կեղծ ապացույցներ ստեղծող քննիչները,  մեղադրական եզրակացություն հաստատած դատախազներն ու մեղադրական դատավճիռներ արձակած դատավորները, որոնք դատապարտել են անմեղ քաղաքացիների: Այսօր Սասունը, Նիկոլը, Արամը, Հարութը եւ մյուսները ապօրինի դատավճիռներով են նստած, եւ Սերժ Սարգսյանը դա մեզանից լավ գիտե: -Իսկ Սերժ Սարգսյանի եւ կառավարության անդամների հանդիպման մասին ի՞նչ կասեք` անկեղծ մղումնե՞ր են, թե՞ պոպուլիզմ:-Կարծում եմ, որ ռազմական հեղաշրջմամբ իշխանության գալուց հետո 3 տարի անց մեր բարձրագույն իշխանավորները գլխի են ընկել, որ իրենք երկիրը կառավարելու  ծրագիր չունեն եվ այժմ խարխափում են խավարի մեջ: -Եթե լինեիք ՀՀ նախագահ, առաջին հերթին ո՞ւմ պաշտոնանկ կանեիք այսօր:-Ես ցանկություն չուենեմ լինելու ՀՀ նախագահ: Ես քաջ գիտակցում եմ այդ պաշտոնին ներկայացվող պահանջների լրջությունը եւ այդ պաշտոնին հավակնող անձի ուսերին դրվող ծանրության աստիճանը: Մենք ունենք այդպիսի առաջնորդ, ղեկավար` ՀՀ առաջին նախագահն է, որին անվերապահ վստահում եմ: Նա այն քաղաքական գործիչն է, որն ունակ է համակարգային փոփոխություններ կատարել: Իսկ մեր երկրում պետությունն ու նրա ինստիտուտները այսօր արժեզրկված  ու բարոյազրկված են: Երկրում ոչ մի կառույց իր հիմնական գործառույթով չի զբաղվում: Ոստիկանությունը ամբողջությամբ լծված է քաղաքական հետապնդումների գործին, դրա համար էլ հանցագործությունների թիվը մեկ տարում 50 եւ ավելի տոկոսով կարող է  աճել: Դատախազությունը եւս 3 տարուց ավելի զբաված է միայն քաղաքական մեղադրանքներ հարուցելով եւ իրականացնելով: Ընդդիմադիրներից գույք, գործարան, հող ու չգիտեմ ինչ են խլում: -Աղվան Հովսեփյանն ինչո՞վ է զբաղված:-Աղվան Հովսեփյանն է գլխավորում ընդդիմության դեմ քաղաքական քրեական հետապնդումների ողջ արշավը: Մինչեւ հիմա որեւէ քրեաիրավական գնահատական տրված չէ այն ոստիկանների գործողություններին, որոնք մարտի 1-ի լուսաբացին, խախտելով մի շարք օրենքներ, ապօրինի հարձակվել, ջարդել, փշրել են խաղաղ ցուցարարներին: Մինչ օրս որեւէ գնահատական տրված չէ նաեւ մարտի 1-2-ին ներքին զորքերի, բանակի գործողություններին: Ինչո՞ւ էին գրոհում, կրակում խաղաղ ցուցարարներին վրա: Ի՞նչ իրավունքով էին բանակային ստորաբաժանումները մասնակցում պատժիչ գործողություններին: Ի՞նչ իրավունքով էր ընդունված փետրվարի 23-ի 0038 հրամանը: Մինչեւ հիմա իրավական գնահատական տրված չէ նախագահի մարտի 1-ի «Արտակարգ դրություն հայտարարելու մասին» ապօրինի հրամանագրին: Այս ամենը նախ եւ առաջ դատախազության գործն է: Ավելին, ուժային կառույցների  հարյուրավոր աշխատակիցներ ու  քաղաքացիներ  ստացել էին հրազենային եւ բեկորային վնասվածքներ, ո՞ւր են այդ տուժողները, քրեական գործերը, մեղադրյալները: Չկան:-Որպես մարդ` խղճո՞ւմ եք Սերժ Սարգսյանին, որ չի տիրապետում իրավիճակին:-Գտնում եմ,  որ ոչ թե Արցախը, այլ Հայաստանը կորցնելու վտանգի առաջ ենք կանգնած: Եթե տարեկան մոտ 100 հազար մարդ է լքում Հայաստանը, իսկ ծնվում է ընդամենը 40 հազար երեխա, մահացածներին մի կողմ դնենք, Հայաստանը կորցնում է իր մարդկային ռեսուրսը: ԹԱԳՈՒՀԻ ԹՈՎՄԱՍՅԱՆ