ԲԱԺԱՆԵԼ ԵՆ ՈՒ ԸՆԿԵԼ ԿՌՎԻ ՄԵՋ

Մայիսի 8-ին ՀՀ ԱԺ-ում տեղի ունեցած ծեծկռտուքը շարունակում է լայն քննարկման առարկա դառնալ: «Լուսավոր Հայաստան» խմբակցության ղեկավար Էդմոն Մարուքյանի ելույթի ժամանակ կրքերը թեժացան, եւ ծեծկռտուք տեղի ունեցավ «Իմ քայլը» խմբակցության պատգամավոր Սասուն Միքայելյանի հետ, որին խառնվեցին գրեթե բոլոր պատգամավորները՝ փորձելով բաժանել կամ, հակառակը, օգտվել առիթից: Տեսագրություններից պարզ է դառնում, որ իշխող խմբակցության պատգամավորների եւ ընդդիմադիրների միջեւ վեճը թեժացել է նաեւ ընդմիջման ժամանակ, եւ ակտիվ է եղել նաեւ Մաթեւոս Ասատրյանը:

ArmLur.am-ը զրուցել է «Իմ քայլը» խմբակցության պատգամավորներ Մաթեւոս Ասատրյանի եւ Վահե Հովհաննիսյանի հետ:

-Պարո՛ն Ասատարյան, մայիսի 8-ին, երբ ԱԺ-ում վիճաբանություն տեղի ունեցավ պատգամավորների միջեւ, եւ, կարելի է ասել, սկսվեց 2-րդ փուլ՝ պատգամավորները միմյանց հրահրեցին ու հրեցին, Դուք նույնպես միացաք այդ վիճաբանություն-ծեծկռտուքին: Ի՞նչն էր խնդիրը, ի՞նչ էիք ուզում փորձել պարզել «Լուսավոր Հայաստան» խմբակցության պատգամավորներից:

-Այդտեղ երեւի թե շատերը ուզում էին այդ վիճակը ցրել: Ոչ մեկ չէր ուզում այդտեղ կռիվ բռնկվեր կամ փուլերի բաժանվեր:

-Կռիվը հանդարտվեց, սակայն րոպեներ անց նորից սկսվեց…:

-Հանդարտվեց ու վերջ: Ընդամենը ցանկացել ենք բաժանել, որ նորից կռիվ չառաջանա:

-Կադրերում երեւում էր, որ Ձեզ Ձեր՝ «Իմ քայլը» խմբակցության պատգամավորները հետ էին պահում:

-Ոչ մեկի համար էլ այդ երեւույթը դուրեկան չէր: Հնարավորինս շուտ ցանկանում էինք, որ այդ վիճակը վերջանար:

-Ըստ Ձեզ: ինչի՞ց սկսվեց այդ ամենը: Ձեր եւ «Լուսավոր Հայաստան»-ի պատգամավորների միջեւ վաղո՞ւց կար լարվածություն:

-Եթե ես լինեի սկսողը, կպատասխանեի, թե ինչ կար: Բայց եթե ես չեմ, ես ի՞նչ գիտեմ: Նախ չեմ կարծում, որ վաղուց ինչ-որ բան լիներ, շատ ժամանակ նման հարցրեը այդտեղ չենք պարզում:

-Բայց Դուք փորձում էիք պարզել, կադրերում նաեւ «Իմ քայլի» խմբակցության պատգամավոր Վահե Հովհաննիսյանն էր երեւում:

-Դրանք սխալ տեղեկություններ են: Այն, ինչ կա, ես նայել եմ, ոչ մի բան չի երեւում:

-Պարո՛ն Ասատրյան, կադրեր կան…:

-Կադրեր կան, բայց այդ կադրերի վերլուծությունը ընդհանրապես կապ չունի կատարվածի հետ:

-Դուք տարաձայնություն չունե՞ք «Լուսավոր Հայաստան» խմբակցության պատգամավորների հետ:

-Բացարձակ: Եվ ոչ մեկի հետ տարաձայնություն չունեմ:

-Իսկ խմբակցության ղեկավար Էդմոն Մարուքյանի հետ ունե՞ք տարաձայնություններ, քանի որ առաջինը հենց իր հետ սկսվեց վիճաբանությունը:

-Չեմ ուզում խոսել իր մասին, որովհետեւ իմ համար անհետաքրքիր է իր մասին խոսել: Իսկ տարաձայնություններ ես ում հետ ունենում եմ, իմ հարցերը պարզում եմ: Հարկավոր չէ՝ ինչ-որ մեկը միջնորդի:

-Դուք կիսո՞ւմ եք այդ դիրքորոշումը, որ սադրանք սկսվեց «Լուսավոր Հայաստան» խմբակցության ղեկավարի կողմից, ինչն էլ կռվի առիթ հանդիսացավ:

-Ես չեմ ուզում խոսել դրա մասին, որովհետեւ այդ ամենը շատ հստակ երեւում է: Մեկնաբանելու իմաստ չկա:

«Իմ քայլը» խմբակցության պատգամավոր Վահե Հովհաննիսյան:

-Պարո՛ն Հովհաննիսյան, մայիսի 8-ին, երբ ԱԺ-ում վիճաբանություն տեղի ունեցավ պատգամավորների միջեւ, եւ, կարելի է ասել, սկսվեց 2-րդ փուլ՝ պատգամավորները միմյանց հրահրեցին ու հրեցին, Դուք նույնպես միացաք այդ վիճաբանություն-ծեծկռտուքին: Ի՞նչն էր խնդիրը, ի՞նչ էիք ուզում փորձել պարզել «Լուսավոր Հայաստան» խմբակցության պատգամավորներից:

-Բացարձակ վեճ չի եղել իմ ու «Լուսավոր Հայաստան» խմբակցության պատգամավորի միջեւ:

-Պարո՛ն Հովհաննիսյան, կադրերում երեւում է, որ Դուք հարվածում եք:

-Ես հանդարտեցնում էի՝ ասելով՝ դո՛ւրս եկեք դահլիճից, մեր մեջ որեւէ միջադեպ չի եղել:

-Դուք երբեւիցե տարաձայնություն ունեցե՞լ եք ԼՀԿ պատգամավորների հետ:

-Անհատապես՝ բացարձակ:

-Իսկ ի՞նչն էր պատճառը, որ կռվի 2-րդ փուլ սկսվեց:

-Ես չեմ կարող ասել: Ես՝ իմ նստարանի մոտ էի, միջադեպը տեղի ունեցավ, ԼՀԿ պատգամավորները բարձրանում էին վերեւ, ես ընդամենը միջամտել եմ կրքերը հանդարտեցնել: Որեւէ արտառոց միջադեպ տեղի չի ունեցել, որեւէ մեկի հետ կոշտ կոնտակտ չի եղել,  ընդամենը հանդարտեցման կոչեր են եղել: Ես հորդորում էի ընդամենը դուրս գալ դահլիճից:

-Դուք սա սադրանք համարո՞ւմ եք, այն, ինչից սկսվեց վիճաբանությունը:

-Այդ գնահատականը Դուք պետք է տաք, ես չեմ կարող ասել:

-Դուք՝ որպես «Իմ քայլի» պատգամավոր, ինչպե՞ս եք գնահատում. ինչպե՞ս սկսվեց, ինչի՞ց կրքերը թեժացան:

-Չեմ կարող ասել՝ ինչից սկսվեց: Ընդդիմությունը քննադատում էր, տեղից արձագանքը միշտ էլ եղել է խորհրդարանում: Ես կարծում եմ՝ չպետք է լիներ նման միջադեպ, բայց ունենք այն, ինչ ունենք:

-Իշխանությունը չի՞ հանդուրժում քննադատությունը:

-Երբեւէ նկատե՞լ եք՝ իշխանությունը չհանդուրժի որեւէ քննադատություն: Առողջ քննադատություններ բոլորն էլ հանդուրժում են: Վարչապետն իր ելույթում էլ ասաց, որ քննադատությունը մեզ պետք է, որպեզի ճիշտ ճանապարհից չշեղվենք:

-Վերջերս Էդմոն Մարուքյանը մշտապես քննադատել է իշխանությունների կատարած աշխատանքը: Դա, կարծես թե, չի ընդունվում, եւ Մարուքյանը թիրախավորվել է: Դուք ճի՞շտ եք համարում անձին թիրախավորելը:

-Ընդդիմությունն իրավունք ունի եւ պետք է քննադատի իշխանությանը, բայց դա պետք է լինի ողջամիտ:

-Դուք սա համարո՞ւմ եք սադրանք, ոչ թե քննադատություն, քանի որ Ձեր խմբակցության պատգամավորներն այդպես են որակում:

-Ես կիսում եմ մեր խմբակցության պատգամավորների տեսակետը, ոովհետեւ եթե Էդմոն Մարուքյանը առաջ չգար, ապա չեմ կարծում՝ որեւէ պատգամավոր կմոտենար ամբիոնում ելույթ ունեցող պատգամավորի:

-Սա համարո՞ւմ եք Ձեր խմբակցության իշխանությունների պարտությունը:

-Բացարձակ: Իհարկե, ես կիսում եմ վարչապետի կարծիքը, այս միջադեպը պետք է կանխվեր: Ես բռնությանը դեմ եմ:

Զրուցեց ՍՈՆԱ ԳՐԻԳՈՐՅԱՆԸ

ԿԱՐԱՊԵՏՅԱՆԻ ԱՂՄԿԱՀԱՐՈՒՅՑ ՀԱՅՏԱՐԱՐՈՒԹՅՈՒՆԸ

«Ժողովուրդ» օրաթերթի տեղեկությունների համաձայն՝ երեկ ԱԺ 2016թ. ապրիլին ծավալված ռազմական գործողությունների հանգամանքները ուսումնասիրող քննիչ հանձնաժողովում կայացած նիստը կրկին անցել է հանգիստ մթնոլորտում: ՀՀ նախկին վարչապետ Կարեն Կարապետյանը հարցերին պատասխանել է շատ կարճ ու կոնկրետ:

Հիշեցնենք, որ դեռեւս 2017թ. մարտի 1-ին նախկին վարչապետը ԱԺ ամբիոնից ուշագրավ հայտարարությամբ հանդես եկավ. «Ունենք կասկած, որ վառարանային վառելիքը հետո գնում է, կերոսինի հետ խառնվում է, եւ մենք շուկայում ունենում ենք անորակ նավթամթերք: Դուք շատ լավ հիշում եք, որ ապրիլյան դեպքերի ժամանակ մենք ունեինք բազմաթիվ դեպքեր, երբ որ մեր ռազմական տեխնիկան չէր աշխատում հենց դրա պատճառով»: Երեկ Ազգային ժողով ներկայանալու առիթը 3 տարի առաջ ունեցած այդ ելույթն էր: Հանձնաժողովականները հետաքրքրվել են Կարապետյանից՝ պնդում է արդյոք իր տեղեկությունը եւ արդյոք կարող է փաստեր ներկայացնել: Կարապետյանը, մեր  տեղեկություններով, ի պատասխան հայտարարել է, թե այդ տեղեկություններն ինքը տարբեր զինվորական շրջանակներից է լսել եւ այլ ասելիք չունի: Նշենք, որ, մեր տեղեկություններով, այն զինվորականները, ովքեր քննիչ հանձնաժողով են եկել, հերքել են տեղեկությունը, թե դիզվառելիքի խնդիր է եղել: Ու հիմա քննիչ հանձնաժողովը չի կարողանում այդ ինֆորմացիայի «պոչը բռնել», որպեսզի վերջնականապես բացահայտի՝ արդյոք Ապրիլյան պատերազմի օրերին հայկական բանակն ունեցել է դիզվառելիքի դեֆիցիտ կամ որակի խնդիր: Նշենք, որ խորհրդարանի քննիչ հանձնաժողովի հաջորդ «հյուրը» պետք է լինի ՀՀ ԱԳՆ նախկին նախարար Էդուարդ Նալբանդյանը, որի հետ հանձնաժողովը նպատակ ունի տեսակապով զրուցել, քանի որ նա ՌԴ-ում է բնակվում: Մեր աղբյուրները փոխանցում են, որ հանձնաժողովը փորձելու է Նալբանդյանից պարզել, թե ՀՀ ՊՆ ԳԽ շտաբի նախկին պետ Յուրի Խաչատուրովը 2016 ապրիլի 5-ին Մոսկվայում հրադադարի ինչ համաձայնագիր է ստորագրել, որն, ըստ էության, չեղյալ է համարում 1994թ. կնքված հրադադարի եռակողմ համաձայնագիրը։ Հիշեցնենք, որ 1994թ. հրադադարի համաձայնագիրը եռակողմ է եղել՝ Հայաստանի, Ղարաբաղի եւ Ադրբեջանի հանրապետությունների միջեւ, իսկ, ահա, 2016-ի կնքվածը երկկողմ է՝ Հայաստանի ու Ադրբեջանի միջեւ՝ Արցախը դուրս թողելով գործընթացներից, ինչը, մեղմ ասած, ամենաանցանկալի ելքը կարելի է համարել։ Արդյոք այս հարցերի պատասխանները կկարողանան հանձնաժողովականները ստանալ Էդուարդ Նալբանդյանից, թե ոչ՝ ժամանակը ցույց կտա:

ՆԱԽԿԻՆՆԵՐԻ ՎԵՐԱԴԱՐՁԸ

Հայաստանի Հանրապետության վարչապետի որոշմամբ՝ Բնապահպանության եւ ընդերքի տեսչական մարմնի ղեկավար Վիգեն Ավետիսյանը երկու նոր տեղակալ ունի: Խոսքը Վրեժ Գալոյանի եւ Գնել Հասրաթյանի մասին է: Պարզվում է՝ այս տեսչական մարմնում ոչինչ չի փոխվել. բարձր պաշտոնի նշանակվում են նախկին իշխանությունների կադրերը:

Օրինակ՝ Վրեժ Գալոյանը Հայաստանի Հանրապետության բնապահպանության (ներկայումս՝ Շրջակա միջավայրի նախարարություն) նախկին նախարար, այժմ հետախուզման մեջ գտնվող Արամ Հարությանյանի՝ Բուլկու կադրերից է: Ավելին, ArmLur.am-ին հայտնի դարձավ, որ, բացի այս, Գալոյանը դարձյալ բնապահպանության նախկին նախարար, Ազգային Ժողովի նախկին պատգամավոր Վարդան Այվազյանի ազգականն է, բնապահպանության ոլորտում հայտնվել է հենց Այվազյանի շնորհիվ եւ այս ոլորտում աշխատանքի անցել է 2003 թվականից: Մինչ տեսչական մարմնի ղեկավարի տեղակալի պաշտոնին նշանակվելը Գալոյանը եղել է տեսչական մարմնի ջրերի, մթնոլորտի, հողերի թափոննների եւ վտանգավոր նյութերի վերահսկողության վարչության պետը: Ավելին, մեզ հայտնի դարձավ, որ Գալոյանի թեկնածությունը տեսչական մարմնի խորհրդին առաջարկել է Վիգեն Ավետիսյանը, ինչը զարմանալի չէ, քանի որ Վիգեն Ավետիսյանը եւս Արամ Հարությունյանի «մարդն է»:

Իսկ, ահա, մյուս՝ նորանշանակ տեղակալ Գնել Հասրաթյանը  2009 թվականից մինչեւ 2013 թվականը «Մարմարի աշխարհում» աշխատել է որպես վաճառող, գանձապահ, 2014-ից 2019 թվականը՝ «Սանար» ընկերությունում որպես տնօրեն, մենեջեր: 2020 թվականի փետրվարի 4-ից զբաղեցրել է տեսչական մարմնի ղեկավարի օգնականի հաստիքը: Ի դեպ, տեսչական մարմնի ղեկավարի տեղակալ նշանակվել է մի անձ, որն ավարտել է Խաչատուր Աբովյանի անվան պետական մանկավարժական համալսարանի գեղարվեստի ֆակուլտետը:

ՉԵՆ ՀԵՏԵՎՈՒՄ

Մարտունիում երեկ կորոնավիրուսային հիվանդության երեք դեպք է արձանագրվել: Այս մասին ArmLur.am-ի հետ զրույցում ասել է Մարտունու քաղաքապետ Արմեն Ավետիսյանը: «Մեկ ընտանիքի մասին է խոսքը, ամուսինների մոտ հաստատվել է կորոնավիրուս, աղջիկն էլ արդեն ջերմում է»,- ասել է նա: Քաղաքապետի խոսքով՝ ընտանիքի մյուս անդամներին մեկուսացրել են, պարզել են շփման շրջանակը: Արմեն Ավետիսյանի փոխանցմամբ՝ ամուսիններն, ամենայն հավանականությամբ, հուղարկավորության ժամանակ են վարակվել, քանի որ օրեր առաջ իրենց հայրենի գյուղում՝ Վերին Գետաշենում, մասնակցել են հարազատի թաղման արարողության: Մեզ հետ զրույցում քաղաքապետը գանգատվել է՝ նշելով, որ անգամ դեպք արձանագրվելուց հետո, միեւնույնն է, բնակիչները չեն հետեւում հորդորներին, չեն հավատում: