Ովքեր են ամենաշատը բացակայել ավագանու նիստերից. անուններ

ՀԵՏԵՎԵՔ ՄԵԶ Telegram-ՈՒՄ

Հայկ Մարությանի՝ Երեւանի քաղաքապետ ընտրվելուց հետո հաճախ են հրապարակումներ եղել այն մասին, որ քաղաքային իշխանությունում խառնաշփոթ է, շատերը չեն կարողանում աշխատել քաղաքապետի եւ նրա թիմի հետ: Ու հենց դա է պատճառը, որ քաղաքապետարանում եւ վարչական շրջանների աշխատակազմերում հաճախ են տեղափոխություններ լինում, եւ աշխատակիցներն ազատվում են իրենց դիմումների համաձայն: Թերեւս դրա վառ ապացույցն այն է, որ քաղաքապետարանի 4 բաժին եւ 7 վաչություն ղեկավարում են ժամանակավոր պաշտոնակատարներ, եւ վաղուց նոր նշանակումներ այդպես էլ չեն լինում՝ տարբեր պատճառաբանություններով: Սակայն հայտնի է նաև, որ անհաշտ մթնոլորտ է տիրում Երեւանի ավագանու «Իմ քայլը» խմբակցությունում, որի հրավիրած նիստերը հաճախ վերածվում են ներքին փոխհրաձգության: Դրանք հաճախ այնքան թեժ են լինում, որ տեւում են մինչեւ ուշ գիշեր:

Իշխող խմբակցության ներսում անհամաձայնությունները վառ դրսևորվում են նաև ավագանու նիստերում: Այդ նիստերի ժամանակ հաճախ են իշխանական ավագանու անդամները ընդդիմանում այս կամ այն հարցի շուրջ, իսկ դրանք հաճախ անցնում են նաև կիսադատարկ դահլիճներում, երբ բացակայում են հենց իշխանական պատգամավորները: Ստացվում է, որ «Իմ քայլում» իրավիճակն այնքան անվերահսկելի է, որ ավագանու նիստերի սրահի վերջնամասը գրեթե կիսադատարկ է լինում: Լինում են դեպքեր, երբ քաղաքային իշխանությունների հետ հարցուպատասխանի վերջում, ներկա էր ավագանու մոտ 9 անդամ: Թերեւս նման երեւույթ Ազգային ժողով-կառավարություն հարցուպատասխանի ժամանակ դժվար է պատկերացնել:

Եվ այսպես, «Ժողովուրդ» օրաթերթը դիմել է Երևանի քաղաքապետարան և պաշտոնապես խնդրել տրամադրել 2018 թվականի հոկտեմբերի 10-ից (առաջին նիստի գումարման օր) մինչեւ օրս տեղի ունեցած նիստերից ավագանու անդամների բացակաների ցանկը: Նշենք, որ Երևանի քաղաքապետարանի կողմից տրամադրված տվյալների համաձայն, 2018 թվականի հոկտեմբերի 10-ից մինչև 2020 թվականի մայիսի 26-ը, տեղի է ունեցել 29 նիստ:

Եվ ահա, ուսումնասիրելով բացակաների ցանկը, պարզ դարձավ, որ 29 նիստից 14 անգամ բացակայել է ավագանու անդամ Արմեն Ղալեչյանը, 12-ական անգամներ խմբակցության ղեկավար Սուրեն Էյրամջյանը, Ռուբեմ Հայրապետյանը, Պավել Մազմանյանը: 11 անգամ ավագանու նիւստերից բացակայել են Օվսաննա Հովսեփյանն ու Կարինե Բաղդասարյանը, 10-ական անգամներ Էդգար Բարսեղյանը. Արման Հարությունյանը և Ռուբեն Սիմոնյանը: Ավագանու մյուս անդամներն արդեն ավելի քիչ թվով բացականեր ունեն: Օրինակ Աշոտ Մնացականյանը բացակայել է 9 անգամ, Լիլիթ Պիպոյանն ու Սերգեյ Ասատրյանը՝ 8-ական անգամ և այդպես շարունակ:

«Ժողովուրդ» օրաթերթը նաև փորձել է ամենաշատ բացականեր ունեցող ավագանու անդամներից պարզել՝ ինչու են այդքան հաճախ բացակայել նիստերից: Ամենաշատ՝ 14 բացակա ունեցող Արմեն Ղալեչյանը «Ժողովուրդ» օրաթերթի հարցին ի պատասխան նշեց. «Նիստերին չեմ հասցնում գնալ նախ ֆիզիկապես, հետո առողջական խնդիրներից ելնելով: Փորձում եմ մարդաշատ վայրեր չգնալ, բայց դա չի նշանակում, որ չեմ աշխատում: Ակտիվ համագործում եմ վարչական շրջանների ղեկավարների հետ, «հասցե առ հասցե» գնում եմ ինձ նամակով ուղարկված խնդիրների հետքերով: Ինչպես բոլորիդ՝ այնպես էլ ինձ, տարատեսակ խնդիրներով են դիմում քաղաքացիները: Մինչև վերջ փորձում եմ հետամուտ լինել խնդրի լուծմանը: Նիստերին չգնալը դեռ չաշխատել չէ: Իհարկե ընդունում եմ, բացակայելը վատ է, բայց համաճարակային այս իրավիճակում գոնե, օբյեկտիվ ու սուբյկտիվ պատճառներով ստիպված եմ մի փոքր ավելի զգույշ լինել քան մյուսները (առողջական խնդիրներով պայմանավորված): Հնարավորինս մասնակցում եմ խմբակցության նիստերին եւ քննարկումներին նաեւ օնլայն տարբերակով»: Իսկ ահա «Իմ քայլը» խմբակցության մեկ այլ անդամ Ռուբեն Հայրապետյանը, որը նաև Հայաստանի պետական տնտեսագիտական համալսարանի ռեկտորն է եղել, նշեց. «Բացակայությունների մեծ մասը ՀՊՏՀ ռեկտորի պաշտոնում աշխատելու շրջանում է եղել, որ ֆիզիկապես չէի հասցնում և մի պահ նույնիսկ որոշել էի այդ պատճառով դուրս գալ ավագանուց: Ի դեպ հատուկ այդ նպատակով նաև հրաժարվել եմ փոխհատուցումից», – նշեց նա:

Այստեղ նկատենք, որ ավագանու անդամների աշխատանքն այսպես ասած չի վարձատրվում, հասարակական է, սակայն նրանց տրվում է ծախսերի փոխհատուցման համար գումար՝ նվազագույն աշխատավարձի չափով, այսինքն 68 հազար դրամ: Ստացվում է՝ Ռուբեն Հայրապետյանն այդ փոխհատուցումից հրաժարվել է: Նախ նշենք, որ ավագանու անդամների փոխհատուցման կարգը սահմանված է «Երևան քաղաքում տեղական ինքնակառավարման մասին» ՀՀ օրենքով. Հոդված 21-ը սահմանում է. «Ավագանու անդամն իր պարտականությունների կատարման հետևանքով առաջացած ծախսերի դիմաց իր ցանկությամբ և ավագանու որոշմամբ կարող է ստանալ ամսական դրամական փոխհատուցում` Հայաստանի Հանրապետության նվազագույն աշխատավարձի չափով»:

Իսկ ահա 20-րդ հոդվածի համաձայն, «Ավագանու անդամի լիազորությունները կարող են վաղաժամկետ դադարեցվել ավագանու անդամների ընդհանուր թվի ձայների մեծամասնությամբ ընդունված որոշմամբ, եթե նա մեկ հերթական նստաշրջանի ընթացքում անհարգելի պատճառով բացակայել է ավագանու նիստերի կամ քվեարկությունների ավելի քան կեսից կամ հանձնաժողովի նիստերի կեսից»:

Նկատենք սակայն, որ դեռ մինչ այս պահն ավագանու անդամի լիազորության դադարեցման հարց չի քննարկվել, քանի որ կան բացականեր, որոնք հարգելի են:

Նաիրա Հովհաննիսյան




Լրահոս