Արդեն մի քանի օր է, ինչ ArmLur.am-ի խմբագրություն են ահազանգում քաղաքացիներ՝ հայտնելով, որ արդեն տեւական ժամանակ է՝ մետրոյի վագոններն աշխատում են ուշ ինտերվալով, եւ, բացի այդ, դրանք գրեթե լեփ-լեցուն են:
Քաղաքացիների պնդմամբ՝ վագոններն աշխատում են 10 րոպե ինտերվալով, ընդամենը գործում է երկու վագոն․ ինչի արդյունքում վագոններում առաջանում են կուտակումներ, ինչն էլ քաղաքացիների մոտ անհարմարություններ եւ անհանգստություններ են առաջացնում, այն էլ այս համաճարակային իրավիճակում։
Եվ, ահա, քաղաքացիների ահազանգի հետքերով ArmLur.am-ը դիմել է Կարեն Դեմիրճյանի անվան Երեւանի մետրոպոլիտեն՝ պարզելու համար, թե որն է խնդիրը, ինչու վագոնները ճիշտ ինտերվալով չեն աշխատում։
«Այս պահին գնացքների միջև միջակայքը կազմում է 8,5 րոպե, որը գնացքների տեխնիկական անսարքության և նոր պահեստամասերով վերազինման հետևանք է։ Թույլ տվեք նշել նաև, որ պիկ ժամերին գծում ավելացնում ենք լրացուցիչ գնացք։ Ավելացնեմ նաև, որ ինչ վերաբերում է վագոնների քանակին, ըստ գրաֆիկի՝ գծում ունենում ենք նաև երեք վագոնից բաղկացած գնացք։ Այս պահին արվում է ամեն ինչ, որպեսզի նոր ուսումնական շրջանի վերսկսման հետ կապված՝ ապահովենք նախկին բնականոն գրաֆիկը։ Մետրոպոլիտենի տնօրինությունը՝ պատճառված անհարմարավետության համար, հայցում է ուղևորների ներողամտությունը»,-մեզ հետ զրույցում հայտնել է Կարեն Դեմիրճյանի անվան Երևանի մետրոպոլիտենի մամուլի խոսնակ Տաթև Խաչատրյանը։
Լիդա Եղիազարյան
.gif)
