ՆՈՐ ՓՈՓՈԽՈՒԹՅՈՒՆ՝ ՀԻՓՈԹԵՔԱՅԻՆ ԾՐԱԳՐՈՒՄ

ՀՀ պաշտպանության նախարարությունը ներկայացրել է «Հայաuտանի Հանրապետության կառավարության 2019 թվականի օգոստոսի 22-ի N 1091-Ն որոշման մեջ փոփոխություններ եւ լրացումներ կատարելու մասին» կառավարության որոշման նախագիծը, որի ընդունումը պայմանավորված է զինծառայողների հիփոթեքային վարկավորման ծրագրի շրջանակներում տվյալ տարվա համար ծրագրին մասնակցելու իրավունք ստացած զինծառայողների կողմից այդ իրավունքը չիրացնելու կամ դրանից հրաժարվելու գործընթացը կարգավորելու, ինչպես նաեւ մի շարք տեխնիկական բնույթի հստակեցումներ կատարելու անհրաժեշտությամբ:

Կառավարության 22.08.2019թ. N 1091-Ն որոշմամբ սահմանված հիփոթեքային վարկավորման ծրագրի 4-րդ կետի համաձայն՝ ծրագիրը չի գործում մինչեւ որոշումն ուժի մեջ մտնելն օրենքով սահմանված բնակարանային ապահովության շրջանակներում բնակարանային պայմանների բարելավում ստացած զինծառայողների վրա, ինչպես նաեւ զինծառայողի կողմից կնքված հիփոթեքային վարկավորման պայմանագրի վրա: Այս դրույթը որոշակի տարաբնույթ մեկնաբանությունների առիթ է տալիս, քանի որ մեկնաբանվում է նաեւ, որ ծրագիրը կարող է գործել որոշումն ուժի մեջ մտնելուց հետո օրենքով սահմանված բնակարանային ապահովության շրջանակներում բնակարանային պայմանների բարելավում ստացած զինծառայողների կամ զինծառայողի կողմից կնքված հիփոթեքային վարկավորման այլ պայմանագրի վրա, ինչը չի համապատասխանում ծրագրի 4-րդ կետի էությանը, եւ անհրաժեշտություն է առաջացել հստակեցնել այդ կետի դրույթները:

Հիփոթեքային վարկավորման ծրագրի 6-րդ կետի պահանջների համաձայն՝ ծրագրի շրջանակներում յուրաքանչյուր վարկառուի մասով ձեռք բերվող բնակարանի կամ բնակելի տան կամ կառուցվող բնակելի տան արժեքի առավելագույն չափ է ընդունվում 28.500.000 դրամը, ընդ որում՝ բնակելի տան արժեքը սահմանվում է որպես գնահատված եւ ձեռքբերման արժեքներից նվազագույնը: Սահմանված առավելագույն չափից ավելի լինելու դեպքում պետության կողմից աջակցությունը ցուցաբերվում է միայն սահմանված առավելագույն արժեքի սահմաններում: Ծրագրի 7-րդ կետի 1-ին ենթակետում սահմանվում է պետության կողմից ֆինանսավորվող կանխավճարի չափը, որը, սակայն, հստակության ապահովման առումով հղում չի պարունակում ծրագրի 6-րդ կետում սահմանված առավելագույն չափին, ինչը եւս որոշակի տարաբնույթ մեկնաբանությունների առիթ է տալիս:

Զինծառայողների վարկավորման կարգի 6-րդ կետի համաձայն՝ ծրագրին մասնակցելու ցանկություն հայտնած զինծառայողի կողմից ներկայացվող տեղեկությունների շարքում նշվում են նաեւ զինծառայողի ընտանիքի անդամների վերաբերյալ տվյալները, սակայն դրանք որեւէ էական նշանակություն չունեն ծրագրի ընտրության գործընթացում եւ փաստացի ավելորդ ծանրաբեռնում են ծրագրի մասնակիցների ռեեստրը, որի կապակցությամբ նպատակահարմար է, որպեսզի զինծառայողի կողմից ներկայացվեն նրա ընտանիքի միայն այն անդամի վերաբերյալ տվյալները, ով հանդիսանում է համավարկառու:

Զինծառայողների հիփոթեքային վարկավորման ծրագրի կիրառման ընթացքում տվյալներ են ստացվել ծրագրին մասնակցելու իրավունք ստացած զինծառայողներից, որ վերջիններս ցանկանում են հրաժարվել իրենց իրավունքից՝ հօգուտ վիճակահանությանը մասնակցած, սակայն առանց նշման թերթիկ հանած այլ զինծառայողի: Այդ առումով անհրաժեշտություն է առաջացել կանոնակարգել նման դեպքերը, ինչպես նաեւ հստակեցնել տվյալ տարվա ընթացքում ծրագրից օգտվելու վերջնաժամկետը, որը լրանալուց եւ այդ ընթացքում զինծառայողի կողմից հիպոթեքային վարկավորման պայմանագրով բնակարան կամ բնակելի տուն ձեռք չբերելու կամ բնակելի տուն չկառուցելու դեպքում տվյալ տարվա ծրագիրը զինծառայողի համար դադարում է:

Այսպիսով, հստակեցվում են զինծառայողների կողմից հիփոթեքային վարկավորման ծրագրից օգտվելու պայմանները, պետության կողմից կանխավճարի հատկացման ձեւով պետական աջակցության չափը, ծրագրին մասնակցելու դիմում ներկայացրած զինծառայողների կողմից իր ընտանիքի անդամների վերաբերյալ տեղեկություններ ներկայացնելու, ծրագրի շրջանակներում տվյալ տարվա համար ծրագրին մասնակցելու իրավունք ստացած զինծառայողների կողմից այդ իրավունքը չիրացնելու կամ դրանից հրաժարվելու հետ կապված հարաբերությունները:

Ն. Պ.