Ցանկանում ենք ճնշում գործադրել գերմանական կառավարության վրա. Արցախ ժամանած Բունդեսթագի պատգամավորները քայլերի կդիմեն

Գերմանիայի Բունդեսթագի եւ Լանդթագի չորս պատգամավորները հոկտեմբերի 18-ին այցելել են Արցախ եւ ականատեսը եղել, թե ինչ է կատարվում այնտեղ, ինչպես է ապրում Արցախի հերոս ժողովուրդը, եւ ինչպես են ադրբեջանցիներն ու թուրքերը հարձակվում տարբեր քաղաքների վրա: Ապա ասուլիսի ժամանակ նրանք պատմել են իրենց տեսածի մասին: Բունդեսթագի պատգամավորներն արդեն Գերմանիայում են:

Այցի, տպավորությունների եւ դրանից հետո իրենց անելիքների մասին, «Ժողովուրդ» օրաթերթը զրուցել է Լանդթագի պատգամավոր Անդրեաս Գալաուի հետ:

-Պարո՛ն Գալաու, ի՞նչ տեսաք Արցախում, ի՞նչ կարող եք ասել Ադրբեջանի կողմից ագրեսիայի մասին:

-Համոզվեցինք, որ ադրբեջանական զինուժը գրոհել է քաղաքացիական շատ թիրախներ Ստեփանակերտում եւ Շուշիում: Մենք հայտնաբերեցինք ապացույցներ, որ օգտագործվել են նաեւ այսպես կոչված կասետային զինամթերք: Կասետային զինամթերքի օգտագործումը միջազգայնորեն արգելված է եւ իրենից մարդու իրավունքների լուրջ խախտում է ներկայացնում: Ադրբեջանի գործողությունը խաղաղ բնակչության դեմ, որն արվում է Թուրքիայի հետ սերտ համագործակցությամբ, ուղղված է Արցախի շրջանից մարդկանց վտարելուն՝ տարածքը նվաճելու եւ տեղահանելու նպատակով: Թուրքիայի նախագահ Ռեջեփ Թայիփ Էրդողանը վարում է պանթուրքիզմի քաղաքականություն: Նա ցանկանում է Միջերկրական ծովից դեպի  Կովկաս մի մեծ տարածաշրջան պատերազմի ու քաոսի մեջ ընկղմել՝ նոր Օսմանյան Կայսրության գաղափարը կյանքի կոչելու համար: Ադրբեջանի նախագահ  Իլհամ Ալիեւը, իմ կարծիքով, միայն աննշան դեր է խաղում այս պատերազմում: Ճիշտ է՝ պատերազմը ծառայում է նաեւ ներքաղաքական խնդիրներից ուշադրությունը շեղելու համար: Առանց Թուրքիայի աջակցության, Ադրբեջանը երբեք չէր համարձակվի այս ռազմական արկածին: 2016-ի պատերազմում կրած պարտությունը ցույց տվեց, որ Ադրբեջանը միայնակ ի վիճակի չէ պատերազմ վարել Արզախի ինքնապաշտպանական ուժերի դեմ:

-Ի՞նչ եք արել Արցախ այցից հետո, Գերմանիայում ցույց ե՞ք տալիս արդյունքները:

-Ներկայումս մենք պատրաստվում ենք ներկայացնել լուսանկարներն ու տեսանյութերը, որոնք հավաքել ենք Լեռնային Ղարաբաղում: Մենք արդեն ունենք գերմանական մամուլի բազմաթիվ հարցումներ, որոնցպետք է պատասխանենք: Վաղը նախատեսվում է մամուլի ասուլիս Գերմանիայի Բունդեսթագի երկու ներկայացուցիչների ՝ Բունդեսթագի պատգամավոր պրն. Շտեֆեն Կոտրեի եւ Բունդեսթագի պատգամավոր Շտեֆան Կյուտերի մասնակցությամբ: Մենք մեր ուղեւորության արդյունքները կտարածենք նաեւ սոցիալական մեդիայի տարբեր ալիքներով (YouTube, Facebook, Instagram եւ այլն):  Մեզ ՝ որպես AFD կուսակցության ներկայացուցիչներ, քննադատում են այս ուղևորությունը կատարելու համար, սակայն դա  մեզ չի հետաքրքրում:

-Ի՞նչ գործընթաց պետք է լինի Ձեր այցից հետո:

-Մեր հրապարակումներով մենք ցանկանում ենք ճնշում գործադրել գերմանական կառավարության վրա, որպեսզի հրաժարվեն չեզոքության իր քաղաքականությունից: Այս հակամարտության մեջ չի կարելի չեզոք լինել, քանի որ ագրեսիան ակնհայտորեն եկել է Ադրբեջանից եւ Թուրքիայից: Թուրքիան ՆԱՏՕ-ի անդամ է, ուստի պետք է նաեւ հավատարիմ մնա այս պաշտպանական  Դաշինքի արժեքներին եւկանոնադրություններին: Գերմանիայի կառավարությունը պետք է օգտագործի իր հնարավորությունները ՆԱՏՕ-ի խորհրդում եւ Եվրոպական խորհրդում `Թուրքիային հորդորելու անհապաղ դադարեցնել ռազմական գործողությունները: Եթե ​​Թուրքիան հրաժարվի, պետք է իրականացվեն համապարփակ պատժամիջոցներ եւ բոյկոտներ: Նույնը, իհարկե, վերաբերում է Ադրբեջանին:

–Ի՞նչ եք մտածում այս մասին: Ինչպե՞ս կարող է լուծվել այս խնդիրը:

-Հակամարտության նոր սրացումը ցույց է տալիս, որ Եվրոպայում անվտանգության եւ համագործակցության կազմակերպության (ԵԱՀԿ) Մինսկի խմբի բանակցությունները ձախողվել են: Նախագահ Էրդողանը խրախուսել է իր գործընկեր Ալիեւին վերջնականապես լուծել հակամարտությունը ռազմական ճանապարհով: Միջազգային հանրությունը չպետք է որեւէ պարագայում հանդուրժի այս ռազմատենչ ագրեսիան: Դա անելու համար վերը նշված պատժամիջոցները պետք է իրականացվեն: Նույնքան շտապ, Հայաստանին անհրաժեշտ է մարդասիրական օգնություն ՝ այս հանցավոր պատերազմի հետեւանքները հաղթահարելու համար: Հակամարտության լուծումը կարող է լինել միայն Արցախի Հանրապետության միջազգային իրավունքի ճանաչումը `1994-ի զինադադարի արդյունքների հիման վրա: Վերջին տարիներին Արցախը ապացուցեց, որ վերածվել է ազատ եւ ժողովրդավարական համայնքի: Կասկած չկա, որ Լեռնային Ղարաբաղի ժողովուրդը նույնպես ունի ինքնորոշման իրավունք: Մենք, որպես AFD- ի ներկայացուցիչներ, «ոչ» ենք ասում պատերազմին եւ բռնակալությանը: Ադրբեջանա-թուրքական ագրեսիան չպետք է հաջողություն ունենա:

Զրուցեց Նաիրա Հովհաննիսյանը