Մարդկային կյանքը նրանց համար արդեն ոչինչ է, քանզի շատ են անջրպետվել հասարակությունից. իրավապաշտպան

Մարդու կյանքի նկատմամբ հոգատարության ու ուշադրության պակաս հասարակության մեջ, իսկ երեկ տեղի ունեցած ողբերգական ավտովթարը, ինչի հետևանքով 28-ամյա հղի կին է մահացել, պետական աշխատողների ու ժողովրրդի միջև առկա անջրպետը վկայումն է, ինչի հետևանքով 28-ամյա հղի կին է մահացել: Տեսակետը իրավապաշտպան Զարուհի Հովհաննիսյանին է, որ ArmLur.am-ի հետ զրույցում նշում է՝ պետական ծառայողների համար մարդկանց կյանքը, փաստորեն, որևէ արժեք ու նշանակություն չունի: «Բայց այդ արժեքը պահպանելուց մենք որևէ կերպ չպետք է շեղվենք, ինչն ինձ համար ամենացավոտն է: Պատահարներ, իհարկե, լինում են կյանքում, որևէ վարորդ երաշխավորված չէ ամենադաժան պատահարից, հարցն այն է՝ հետո ինչպե՞ս է վերաբերվում տվյալ անձը: Արդյոք կանգնում, փորձո՞ւմ է օգնություն ցույց տալ, ինչը, փաստացի, տվյալ ոստիկանների կողմից չի արվել, ու դա բավական ծանր պատկեր է: Պետական մարմինների մարդիկ այնքան են անջրպետված հասարակ մարդկանցից, որ նրանց համար մարդկային կյանքն այլևս ոչինչ է:

Պետծառայողները կարծես ծրագրավորված ինչ-որ հանձնարարություններ պետք է կատարեն: Անշեղորեն, մի գծով գնում են ՝ չնայելով, որ գուցե կողքին կա մեկը, ում պետք է օգնություն ցուցաբերել, առավել ևս՝ եթե տվյալ անձն օգնության կարիք հենց քո՛ մեղքով ունի: Սա մեր հասարակության միջև առկա անհավասարության, անփութության, անուշադրության, մարդկային դեմքի կորստի ցցուն օրինակն է»,- մեզ հետ զրույցում շեշտում է իրավապաշտպանը:

Ըստ նրա՝ տեղի ունեցածն այն բանի վկայումն է նաև, որ մարդիկ երբ բարիկադի մի կողմից մեկ այլ կողմում են հայտնվում, կորցնում են իրականությունը, այդ իրականության ընկալումը: Իրավապաշտպանի գնահատմամբ՝ կառավարության ու իշխանության գրկում հայտնվածները, որ նախկին ընդդիմադիրներն ու ակտիվիստներն էին, կորցնում են այն բոլոր շեշտադրումները, որոնց համար փողոց են դուրս եկել: «Դա նշանակում է, որ այն արտոնություններն ու մեծամտությունը, որ տալիս է իշխանությունն, ավելի զորեղ է, քան բոլոր այն արժեքները, որ ինչ-որ ժամանակ համախմբում էին մեզ ու իրենց՝ ներկա իշխանավորներին »,- ընդգծում է նա:

Սևակ Վարդումյան