Դատավորները հավելավճարներ կստանան. նոր նախագիծ

Այսօր Ազգային ժողովում քննարկվեց «Պետական պաշտոններ եւ պետական ծառայության պաշտոններ զբաղեցնող անձանց վարձատրության մասին» ու «Պաշտոնատար անձանց գործունեության ապահովման, սպասարկման եւ սոցիալական երաշխիքների մասին» օրենքներում փոփոխություններ կատարելու մասին նախագիծը:

Վճռաբեկ դատարանի դատավորների համար առաջարկվում է սահմանել պաշտոնյային դրույքաչափի 50 տոկոսի չափով հավելում, իսկ ՍԴ դատավորների դեպքում՝ դրույքաչափի 80 տոկոսի չափով վերանայում՝ հավելավճարի տեսքով:

Իսկ ինչ գումարի մասին է խոսքը։ Վճառբեկ դատարանի նախագահը ստանում է 992 հազար դրամ մաքուր աշխատավարձ, ըստ այդմ՝ նրա դեպքում հավելումը կկազմի 496 հազար դրամ։ Իսկ պալատի նախագահը ստանում է 793 հազար դրամ աշխատավարձ, դատավորն էլ՝ 760 հազար դրամ եւ համապատասխանաբար հավելումները կկազմեն 396 հազար եւ 380 հազար դրամ։ Սահմանադրական դատարանի անդամների դեպքում պատկերը հետեւյալն է․ ՍԴ նախագահը ստանում է 1 մլն 582 հազար դրամ աշխատավարձ, իսկ հավելումը կկազմի 846 հազար դրամ, փոխնախագահի աշխատավարձը՝ 859 հազար դրամ, հավելումը՝ 687 հազար դրամ, դատավորներնէլ ստանում են 793 հազար դրամ եւ հավելումն էլ կլինի 634 հազար դրամ։

Հավելենք, որ այս դրույթների ամրագրման դեպքում Հայաստանի Հանրապետության օրենքների նախագծերի ընդունման կապակցությամբ ակնկալվում է պետական բյուջեից տարեկան շուրջ 283 մլն 346 հազար դրամի լրացուցիչ միջոցների օգտագործում։

Այսօր նիստում ՀՀ արդարադատության նախարարի տեղակալ Գրիգոր Մինասյանը նշեց,  փոփոխությունները բխում են ՀՀ դատաիրավական ռազմավարության տրամաբանությունից:

Ն.Հ.