ԲՆԱԿԱՐԱՆ ԳՆԵԼՈՒ ՍԵՐՏԻՖԻԿԱՏ ԿՍՏԱՆԱՆ

Արցախի Բերձոր, Աղավնո եւ Ներքին Սուս համայնքների բնակչությանը տարհանելու նպատակով ներկայում ցուցակագրման գործընթաց է իրականացվում՝ պարզելու, թե ովքեր են ցանկանում հաստատվել Արցախում, ովքեր՝ Հայաստանի Հանրապետությունում:

Այս մասին «Արմենպրես»-ի թղթակցի հետ զրույցում ասաց Արցախի Հանրապետության տարածքային կառավարման եւ ենթակառուցվածքների նախարար Հայկ Խանումյանը՝ նշելով, որ երեք համայնքներում, ընդհանուր առմամբ, մոտ 100 ընտանիք է բնակվում:

«Մոտ օրերս համայնքապետերը կներկայացնեն համապատասխան ցուցակները, եւ, ըստ այդմ, կլուծվի Արցախ տեղափոխվող ընտանիքների բնակապահովման խնդիրը։ Այն ընտանիքները, որոնք կտեղափոխվեն Հայաստանի Հանրապետություն, կստանան բնակարան գնելու սերտիֆիկատ, իսկ մինչ այդ՝ բնակարանի վարձավճարի փոխհատուցում։ Նախնական տվյալներով՝ Արցախում հաստատվելու ցանկություն է հայտնել նշված համայնքների բնակչության մոտ 25-30 տոկոսը»,- մանրամասնեց նախարարը:

Գերատեսչության ղեկավարն ընդգծեց, որ արդեն հստակ է՝ որտեղ կտեղավորվեն Բերձորից, Աղավնոյից եւ Ներքին Սուսից տարհանվող ընտանիքներից Արցախում բնակվելու ցանկություն հայտնողները, որոնց պետությունն ապահովվելու է բնակարանով: Խոսելով տարհանման գործընթացում առկա խնդիրներից՝ Հայկ Խանումյանը հայտնեց, որ տեղափոխման հարցերը  կլուծվեն միջազգային տարբեր կազմակերպությունների, անհրաժեշտության դեպքում՝ նաեւ  պետության օգնությամբ։

«Այս պահին մեր գործընկերների հետ բանակցում ենք, որպեսզի օգնեն գործընթացի  կազմակերպման հարցում: Քննարկվում են տեխնիկական մանրամասները՝  ինչ ձեւով փոխանցվի գումարը, եւ այլն»,- ասաց մեր զրուցակիցը՝  հավաստիացնելով, որ տեղափոխման հետ կապված խնդիրներ չկան։

Նրա հավաստմամբ՝ մինչեւ օգոստոսի 25-ը հնարավոր է արագ եւ ժամանակին կազմակերպել տարհանման գործընթացը:  Այս ընթացքում Արցախի Հանրապետության ԿԳՄՍ նախարարությունն էլ իրականացնում է  պատմամշակութային ժառանգության դուրսբերումը:

Անդրադառնալով սոցցանցերում առկա որոշ քննարկումներին, ըստ որոնց՝ Բերձորի, Աղավնոյի եւ Ներքին Սուսի բնակչությանն արգելվել է հրդեհել տները՝ նախարար Խանումյանը հիշեցրեց Շահումյանի շրջանի Չարեքտար համայնքի օրինակը, երբ բնակիչները հրդեհել էին տները, ինչից հետո պարզվել էր, որ բնակավայրը մնալու է Արցախի վերահսկողության ներքո:

«Ես դեմ եմ տները վառելուն: Արդեն մի անգամ Չարեքտարը վառել են, թյուրիմացաբար ասեմ, թե միտումնավոր, եւ այսօր 100 միլիոնավոր դրամներ ենք ծախսում այդ գյուղը վերականգնելու համար։ Ընդամենը մեկուկես տարի է անցել, ինչ Աղանուս համայնքի տարածքը հանձնվեց, բայց այսօր այդ համայնքի տարածքը վերադառնում է միջանցք, դուրս է գալու Ադրբեջանի վերահսկողությունից, բայց այնտեղ ամեն ինչ թալանված ու այրված է՝ սկսած առաջին պատերազմի տարիներից մինչեւ 2020 թվական: Մեղվաձոր, Հունանավան, Մելիքաշեն, Մարաթուկ բնակավայրերի մասին է խոսքը: Եթե բնակֆոնդը թողնեինք այդ միջանցքում, այսօր այդտեղ հանգիստ կարող էինք բնակեցում անել, բայց այսօր այնտեղ միայն պատեր են վառված ու ավերակներ»,-ասաց Խանումյանը՝ նշելով, որ Աղավնոն շատ մոտ է գտնվում Արցախը ՀՀ-ին կապող նոր երթուղով նախատեսված միջանցքին, եւ հայտնի չէ, թե մեկուկես, երկու տարի հետո ինչպես կփոխվի իրավիճակը:

«Չէի ցանկանա, որ ամեն ինչ մեր օգտին ընթանալու դեպքում Աղավնո վերադառնալուց հետո նույն կերպ այրված ու սեւացած պատեր տեսնեինք, հետեւաբար կտրուկ դեմ եմ որեւէ բան այրելուն, թալանելուն, քանդելուն»,- շեշտեց Արցախի ՏԿԵ նախարարը: Պատասխանելով Արցախ-Հայաստան այլընտրանքային ճանապարհով երթեւեկությունը կազմակերպելու առանձնահատկությունների եւ հարեւանությամբ կառուցվող նոր ենթակառուցվածքների վերաբերյալ հարցին՝ նախարարը մանրամասնեց, որ նոր երթուղին սկսվում է Տասը Վերստ բնակավայրից, ապա անցնում Մեծ Շեն, Հին Շեն եւ Քաշաթաղի շրջանի Աղանուս համայնքի վարչական տարածքով եւ հասնում մինչեւ ՀՀ սահման:

«Դեռեւս կառուցված չէ դեպի Կոռնիձոր 11-կիլոմետրանոց ճանապարհահատվածը։ Մինչեւ այդ ժամանակավորապես կանցնենք 4-կիլոմետրանոց գրունտային փոքր հատվածով, որը միանում է գործող  մայրուղուն՝  Աղավնոյի հենց վերեւում»,-ասաց Հայկ Խանումյանը՝ հավելելով, որ այլընտրանքային ճանապարհը կգործի միջանցքի տրամաբանությամբ:

Նախարարի հաղորդմամբ՝ ՀՀ սահմանից Կոռնիձոր ընկած ճանապարհահատվածը նախատեսվում է կառուցել մոտ 250 օրում: Այլընտրանքային ճանապարհի անվտանգությունը գործելու է ներկայում Բերձոր-Աղավնոյով  անցնող միջանցքի սկզբունքով. նոր երթուղու 5-կիլոմետրանոց հատվածում կտեղակայվի ռուսական խաղաղապահ զորախումբը։

Ինչ վերաբերում է այլընտրանքային ճանապարհի երկայնքով Արցախը սնուցող նոր ենթակառուցվածքների, մասնավորապես՝ կապի եւ էլեկտրամատակարարման բարձրավոլտ գծերի  անցկացմանը, Հայկ Խանումյանը նշել է, որ աշխատանքներն արդեն ընթացքում են, որը նախատեսում են ավարտել սեղմ ժամկետներում:

ԾԱՎԱԼՆԵՐՆ ԱՃԵԼ ԵՆ

Հայաստանում 2022թ. առաջին կիսամյակում բեռնափոխադրումների ծավալը, նախորդ տարվա նույն ժամանակահատվածի համեմատ, աճել է 11.2 տոկոսով: Երկաթուղային բեռնափոխադրումները հիշյալ ժամանակահատվածում ավելացել են 1 տոկոսով, ավտոմոբիլայինը՝ 12.9 տոկոսով, օդայինը՝ 5.3 տոկոսով (ցուցանիշում ներառված են նաեւ այլ երկրների ավիաընկերությունների ինքնաթիռներով իրականացված բեռնափոխադրումները), մայրուղային խողովակաշարայինը՝ 18.4 տոկոսով: Ընդհանուր առմամբ, բոլոր տեսակի տրանսպորտի տեսակներով կատարվել է 8 միլիոն 332.6 հազար տոննա բեռնափոխադրում:

Այս տարվա առաջին կիսամյակում ընդհանուր օգտագործման տրանսպորտի բոլոր տեսակներով ուղեւորափոխադրումն աճել է 40.4 տոկոսով. տեղափոխվել է 71 միլիոն 030.5 հազար մարդ: Երկաթուղային տրանսպորտով ուղեւորափոխադրումն աճել է 22.5 տոկոսով, ավտոմոբիլային տրանսպորտով՝ 43.9 տոկոսով,  օդային տրանսպորտով, այդ թվում՝ այլ երկրների ավիաընկերությունների ինքնաթիռներով իրականացված ուղեւորափոխադրումներն աճել են 75.6 տոկոսով, էկեկտրատրանսպորտով ուղեւորափոխադրումները՝ 25.4 տոկոսով: Ավտոմոբիլային տրանսպորտով ուղեւորափոխադրումների ցուցանիշում, հատկանշական է, որ հաշվարկված է միայն իրավաբանական անձանց կողմից մատուցած տաքսի ծառայությունների ծավալը, որը, ի դեպ, արձանագրել է 23.4 տոկոսի անկում՝ նախորդ տարվա առաջին կիսամյակի համեմատ: Բեռնափոխադրումների եւ ուղեւորափոխադրումների ծավալների երկնիշ աճը վկայում է, որ ոլորտները թոթափում են COVID-19 համավարակի հասցրած վնասները, փորձում են վերականգնվել:

ԿԱՐԳԱՊԱՀԱԿԱՆ ՊԱՏԱՍԽԱՆԱՏՎՈՒԹՅՈՒՆ

Զինվորական ծառայության առօրյայից համացանց լուսանկարներ ներբեռնած զինծառայողները ենթարկվել են կարգապահական պատասխանատվության:

«Հայաստանի Հանրապետության ՊՆ ռազմական ոստիկանության աշխատակիցների ձեռնարկած գործողությունների արդյունքում հայտնաբերվել, ՌՈ բաժիններ են տեղափոխվել Հայաստանի Հանրապետության ԶՈւ մի շարք պարտադիր ժամկետային եւ պայմանագրային զինծառայողներ, որոնք, խախտելով Հայաստանի Հանրապետության ՊՆ N հրամանը, օգտագործել են սմարթ հեռախոսներ, զինվորական ծառայության առօրյայից լուսանկարներ են ներբեռնել համացանց: Զինծառայողները ենթարկվել են կարգապահական պատասխանատվության»,- ասված է հաղորդագրությունում: