ՏԵՍԱՆՅՈՒԹ. Վարժական հավաքների մասնակիցները՝ փաստի առջև. աշխատավարձ չի վճարվում

Հայաստանում մարտից կմեկնարկի պահեստազորայինների վարժական հավաքների նոր փուլը։ Այս անգամ դրանք երեք ամսվա փոխարեն 25 օր կտևեն։ Առաջին փուլով՝ հավաքներին կմասնակցեն ավելի քան 3 հազար քաղաքացիներ։

25-օրյա հավաքները պարտադիր են լինելու 20-ից 55 տարեկան բոլոր պահեստազորայինների համար, քաղաքացին ինքն է ընտրելու, թե տարվա մեջ, երբ կարող է ժամանակ տրամադրել։ Սակայն նոր կարգն ու որոշումը խնդիրներ է առաջացրել:

Նախ նշենք, որ Զինվորական ծառայության և զինծառայողի կարգավիճակի մասին օրենքը հստակ սահմանում է, թե ինչու են անցկացվում վարժական հավաքներ: Ըստ այդ ձևակերպման,  վարժական հավաքի նպատակը պահեստազորի առաջին խմբում հաշվառված քաղաքացիների ռազմական ունակությունների կատարելագործումն ու վերապատրաստումն է: Սակայն կառավարության որոշմամբ միայն տեսանելի է, որ զորակոչվող պահեստազորայինները 11 օր նախապատրաստվելու են, որպեսզի 2 շաբաթ մարտական հերթապահություն կրեն:

Հավաքներին վերաբերվող մեկ այլ խնդիր ևս առկա է: Այն հոդվածով, որով զորակոչվում են պահեստազորայինները, ենթադրում է գործատուի պարտավորություն վերջիններիս աշխատանքային հաստիքը պահպանելու վերաբերյալ, սակայն դա չի ենթադրում սահմանված 25-օրյա ժամկետում աշխատավարձի պահպանում: Այսինքն,  վարժական հավաքների գտնվելու ընթացքում քաղաքացին իր գործատուից գումար չի ստանալու: Այս մասին ահազանգել էր նաեւ ԱԺ Պատիվ ունեմ խմբակցության պատգամավոր Տիգրան Աբրահամյանը եւ ՊՆ-ում հավաստիացրել էին,  որ այս ուղղությամբ լուծումներ են փնտրում, բայց փաստ է, որ դրանք դեռ չկան: Մինչդեռ «Զինվորական ծառայության և զինծառայողի կարգավիճակի մասին» ՀՀ օրենքի 59-րդ հոդվածի 9-րդ կետով սահմանվում է, որ վարժական հավաքին մասնակցելու ընթացքում քաղաքացու հիմնական աշխատանքի վայրում (անկախ կազմակերպական-իրավական ձևից) պահպանվում է քաղաքացու աշխատատեղը (պաշտոնը):