ՀՀ արդարադատության նախարարությունը նոր նախագիծ է ներկայացրել և առաջարկում է փոփոխություններ կատարել Կուսակցությունների մասին սահմանադրական օրենքում: Նախ նշենք, որ գործող կարգավորումներով կուսակցությունները պարտավոր են յուրաքանչյուր տարի` հաշվետու տարվան հաջորդող մայիսի 31-ից ոչ ուշ, ՀՀ հրապարակային ծանուցումների պաշտոնական ինտերնետային կայքում հրապարակել իրենց տարեկան հաշվետվությունները, իսկ օրենքով նախատեսված դեպքերում՝ նաև դրա վերաբերյալ աուդիտորական եզրակացությունը, իսկ հրապարակելուց հետո՝ եռօրյա ժամկետում, հաշվետվությունը և դրա հրապարակման փաստը վկայող ապացույցը ներկայացնել Հանձնաժողով:
Սակայն 2021 թվականի տարեկան հաշվետվությունների հրապարակման փաստը ստուգելիս Հանձնաժողովը պարզել է, որ կան կուսակցությունների տարեկան հաշվետվություններ, որոնք ներկայացվել և հրապարակվել են անձնական տվյալներով, ուստի նախագծով առաջարկվում է, որ կուսակցություններն իրենց տարեկան հաշվետվությունները ներկայացնեն Հանձնաժողով, իսկ վերջինս էլ ապահովի իր պաշտոնական կայքում դրանց հրապարակումը՝ բացառելով անձնական տվյալների հրապարակումը:
Նման կարգավորումը լուծում է առաջացած խնդիրները, այդ թվում՝ ազատում կուսակցություններին նույն տարեկան հաշվետվությունը 2 տարբեր մարմինների ներկայացնելու հավելյալ պարտականությունից, միաժամանակ, առաջիկայում հայտարարագրերի ներկայացման էլեկտրոնային նոր համակարգում նախատեսվում է ապահովել նաև կուսակցությունների տարեկան հաշվետվությունների էլեկտրոնային եղանակով ներկայացման բաժին, ուստի նպատակահարմար է տարեկան հաշվետվությունների ներկայացման և հրապարակման համար կիրառել հենց Հանձնաժողովի պաշտոնական կայքը:
Ն.Հ.
.gif)
