Ինչ է փոխվել հայ ազգի մտածելակերպում, արժեհամակարգում, կամ միգուցե կին-տղամարդ հարաբերություններում, որը վերջին շրջանում հանգեցրել է ընտանեկան բռնությունների աճի:
Ազգագրագետ Կարինե Բազեյանը Armlur.am-ի թղթակցի հետ զրույցում ասաց, որ տեղի ունեցող սպանությունները փորձել բացատրել ազգային մտածելակերպով կամ արժեհամակարգով ճիշտ չի լինի, քանի որ ագրեսիան ընդհանրապես բնորոշ է մարդուն ու բոլոր ժողովուրդներին և ունի անհատական դրևսորում:
Հայաստանում կատարվող ընտանեկան սպանությունների մասին խոսելուց առաջ պետք է հիշել, որ մեզ մոտ հայրիշխանություն է, բայց երբեք մեր մշակույթում տղամարդն ագրեսիվ ձևով չի վերաբերվել կնոջը: «Եթե տղամարդը ցանկացել է կնոջը պատժել, և տանը, բացի իրենից, եթե եղել են նաև սկեսուր-սկեսրայր, դա արել է կամ սկեսուրը կամ ամուսնու եղբայրը»,- մանրամասնեց ազգագրագետը:
Ընտանեկան սպանությունները, ըստ տիկին Բազեյանի, պայմանավորված են հիմնականում մեր երկրում տիրող ծանր սոցիալ-տնտեսական պայմաններով, որոնց պատճառով մարդիկ մի փոքր չարացել ու դարձել են ագրեսիվ: «Ընտանեկան սպանություններ ավելի շատ մարզերում են լինում, որովհետև վիճակը ծայրահեղ ծանր է. աշխատանք չունենալը, հասարակական ընդհանուր մթնոլորտը նպաստում են բացասական երևույթների ի հայտ գալուն: Երևանում կյանքը, ի տարբերություն մարզերի, համեմատաբար աշխույժ է. եթե անգամ դրան քաղաքաբնակը չի մասնակցում, միևնույն է, նա հույս ունի, որ մի օր այդ աշխուժությունն ու եռուզեռը իրեն էլ կհասնի»,- վերլուծում է Կ. Բազեյանը:
Սակայն ճիշտ չէ բոլոր ընտանեկան սպանությունները բացատրել միայն սոցիալ-տնտեսական ծանր իրավիճակով, քանի որ կան ընտանիքներ, որոնք վատ պայմաններում են ապրում, բայց նրանց օջախում համերաշխ է: «Սա նշանակում է, որ այդ դեպքերը պետք է առանձին-առանձին քննել, քանզի պատճառները տարբեր կարող են լինել»,- մանրամասնեց մեր զրուցակիցը:
Հոգեբան Սամվել Խուդոյանն էլ մեզ հետ զրույցում նախ ասաց, որ ամբողջ աշխարհում են տեղի ունենում սպանություններ, երկրորդ` հիմա գարուն է, սեզոնային առումով անցումային շրջան է: Մասնագետը ամենևին համաձայն չէ, որ այդ սպանությունները հոգեբանական առումով պայմանավորված են սոցիալ-տնտեսական ծանր իրավիճակով, քանի որ դրանք չեն հանգեցնում ընտանեկան բռնությունների: Այն, որ մարզերում են տեղի ունեցել վերջին երեք սպանության դեպքերը, արտառոց ոչինչ չկա, պարզապես լրատվամիջոցներում դրանց մասին է բարձրաձայնվել:
Հոգեբանը համաձայն է, որ Հայաստանում տիրող ծանր իրավիճակը կարող է մարդկանց վրա անուղղակիորեն վատ անդրադառնալ` նրանց դարձնել ագրեսիվ, բայց դրանով պայմանավորել ընտանեկան բռնությունները, ճիշտ չէ:
.gif)
