Ֆրանսիայում քաղաքական փախստական Արծրունի Ավետիսյանը մի քանի անգամ հայտարարել է, որ հոկտեմբերի 27-ի օրը պետք է սպանվեր ՀՀ նախկին փոխնախարար Վահան Շիրխանյանը, քանի որ ռուսները փորձել են վրեժ լուծել նրանից Ռուսաստանում տարիներ առաջ տեղի ունեցած ահաբեկչության համար:
Վահան Շիրխանյանը, սակայն, այդպես էլ ամբողջական ու հիմնավոր չի արձագանքել ու հակադարձել Ավետիսյանին: Այսօր Armlur.am լրատվականի թղթակիցը հետաքրքրվեց` ինչու ՀՀ նախկին փոխնախարարը մանրամասնորեն չի անդրադառնում Ա. Ավետիսյանի փաստերին:
Մեր զրուցակցի խոսքով` եթե ինքը արժանի համարեր, կարձագանքեր Ավետիսյանի հայտարարություններին:
«Բայց Ավետիսյանը բավական հետաքրքիր փաստեր է ներկայացնում հոկտեմբերի 27-ի հետ կապված»,- հակադարձեց մեր թղթակիցը:
«Չկան փաստեր, առավել ևս հետաքրքիր, այդ ամենը նրա երևակայության արդյունքն է»,- պատասխանեց պրն Շիրխանյանը:
Մեր զրուցակցի խոսքով` Ա. Ավետիսյանը ոչ մի կապ չունի հոկտեմբերի 27-ի հետ: «Չեմ ուզում այդ մասին խոսել, էնքան 100-րդական է Արծրունու ասածների մասին խոսել հոկտեմբերի 27-ի առումով: Ինչու պետք է ամեն մեկի ասածին պատասխան տրվի»,- ասաց նա` հավելելով, որ չգիտի` ինչու է Ավետիսյանը նման հայտարարություններ անում:
Շիրխանյանը հերքեց նաև այն խոսակցությունները, թե անձնական խնդիրներ ունի Ավետիսյանի հետ, ավելին` նա չի էլ ճանաչում Ավետիսյանին:
Մեր թղթակցին հաջողվեց կապ հաստատել նաև Ֆրանսիայում բնակվող քաղաքական փախստական Արծրունի Ավետիսյանի հետ: Վերջինս ասաց, որ հոկտեմբերի 27-ի կապված իր բոլոր հայտարարությունները բացարձակ ճշմարտություն են:
Ինչ վերաբերում է իր և Շիրխանյանի ծանոթությանը, Արծրունի Ավետիսյանի խոսքով` նա իրեն ավելի լավ է ճանաչում, քան իր հարազատ եղբորը: Ավետիսյանը նաև հայտարարեց, որ կարող է իրենց ծանոթությունը հաստատող փաստաթուղթ ներկայացնել: «Իսկ հոկտեմբերի 27-ի հետ կապված ունեմ իմ կենդանի վկաները»,- եզրափակեց Ավետիսյանը:
.gif)
