Այս տարի մարտի 3-ից սկսվում է Մեծ Պահքի շրջանը: Այն տևում է 48 օր` Բուն Բարեկենդանից մինչև Ս. Հարության (Զատկի) տոնի նախօրեն: Այս տարի Ս. Հարության տոնը կնշվի ապրիլի 20-ին: Արդյոք մեր քաղաքական գործիչները հետևում են պահքին, թե ոչ, պարզեց Armlur.am-ի թղթակիցը՝ զրուցելով ԲՀԿ պատգամավոր Արագած Ախոյանի հետ:
-Պրն Ախոյան, երբևէ պաս պահե՞լ եք:
-Ոչ:
-Ինչու:
-Ժամանակ չեմ ունեցել: Պաս պահելը շատ օգտակար է նաև մարդու առողջությանը, հոգու ինքնամաքրմանը: Ցավոք սրտի, ժամանակ չեմ ունեցել պահք պահեմ, որովհետև պահքի ժամանակ հատուկ կերակրատեսակներ պետք է ուտել: Հոգու մաքրման որոշակի կանոնների, իհարկե, հետևել ենք, իսկ սննդակարգին չենք հետևել:
–Ասացիք՝ հետևել եք որոշակի կանոնների: Պահքի ժամանակ պետք է ազատվել վատ սովորություններից՝ որկրամոլությունից, շատախոսությունից, հայհոյելուց, չստելուց: Եթե անկեղծ լինեք, որքանո՞վ եք սրանք բոլորը կարողացել պահպանել:
-Պահքի ընթացքում պետք է նաև չզայրանալ: Բայց անկեղծ ասած, բոլոր կանոններին հետևել չեմ կարողացել:
-Իսկ ո՞րն եք ավելի շատ խախտել:
-(Ծիծաղում է-խմբ.): Չեմ կարող ասել ու առանձնացնել, գիտեք: Դե ստելը կապ չունի պահքի հետ, չնայած աշխատում ենք հեռու մնալ այդ վատ երևույթից: Հետո գիտեք՝ նայած սուտ ասելով՝ ինչ նկատի ունեք: Իմ կարծիքով մենք պահքից անցնում ենք բարոյական նորմերի: Ինչ վերաբերում է շատախոսելուն ու հայհոյելուն, դրանք բոլորն առօրյա երևույթներ են: Համենայնդեպս, զերծ մնալը շատ դժվար բան է այն էլ այսօրվա պայմաններում:
–Ի՞նչ եք կարծում, քաղաքական գործիչներին կհաջողվի՞ կամ հաջողվում է պահք պահել:
-Քաղաքականությունը բարդ ինստիտուտ է, պահանջում է զգոնություն, սթափություն: Կարծում եմ՝ այսօրվա պայմաններում քաղաքական գործիչները չեն կարող պաս պահել:
–Իսկ ձեր տան անդամներից որևէ մեկը պաս պահե՞լ է կամ պահելո՞ւ է:
–Ճիշտն ասած, մենք ավանդապաշտ ընտանիք ենք, բայց անկեղծ ասաց՝ ոչ, չենք պահել: Եղել է իհարկե, որ վերջին մեկ շաբաթը կամ պահքի վերջին՝ ծոմի օրը պահք պահել են, բայց ամբողջությամբ պաս պահել, չի եղել:
Սոնա Դավթյան
.gif)
