ԼՈՒՐ ԿԱԴՐ            

Լուսանկարը՝ համացանցից

Լեհաստանի Սիլեսիա քաղաքում օգոստոսի 10-20-ն անցկացվել է Աստղագիտության եւ աստղաֆիզիկայի միջազգային 16-րդ օլիմպիադան, որին մասնակցել է 50 երկրի 241 աշակերտ:

Օլիմպիադային Հայաստանի թիմը ներկայացրել են Ա. Շահինյանի անվան ֆիզմաթ հատուկ դպրոցի 12-րդ դասարանի աշակերտներ Արեգ Բարսեղյանը, Վյաչեսլավ Պետրոսյանը, Արտավազդ Հարությունյանը եւ Մարիա Առաքելյանը։ ՀՀ թիմից արծաթե մեդալի է արժանացել Վյաչեսլավ Պետրոսյանը, իսկ բրոնզե մեդալի՝ Արտավազդ Հարությունյանը: Արեգ Բարսեղյանը եւ Մարիա Առաքելյանն արժանացել են գովասանագրերի։

ԻՐԱՎՈՒՆՔ

ՀԱՐՑ. Ի՞նչ է լինում, երբ դիմում ես Մարդու իրավունքների պաշտպանին:

Միքայել Մնացականյան  (22 տարեկան)

ՊԱՏԱՍԽԱՆ. Դիմումը ստանալուց անմիջապես հետո այն ուղարկվում է համապատասխան մասնագետի: Լինում են դեպքեր, երբ դիմումում կան հարցեր, որոնք ճշտման կարիք ունեն, եւ այդ դեպքում մասնագետները կապ են հաստատում դիմումատուի հետ: Դիմումը ստանալուց հետո մասնագետը ուսումնասիրում է այն, եւ եթե քո կողմից նշված փաստերը եւ օրենքը թույլ են տալիս, ապա սկսվում է դիմումի քննարկման ընթացակարգ:

ՀՀ ՄԻՊ

«ԺՈՂՈՎՈՒՐԴ». Շատ կարեւոր է իմանալ, որ նույնիսկ այն դեպքում, երբ, հաշվի առնելով օրենքի պահանջները, ՄԻՊ-ի գրասենյակը չի կարող սկսել դիմումի քննարկումը, ապա իրենք անպայման կուղղորդեն դիմումատուին այն մարմին, որը կարող է տվյալ պարագայում պաշտպանել անձի իրավունքները:

ԲԱՆԿ

ՀԱՐՑ. Ինչպե՞ս է «Ամերիաբանկ»-ը տեղեկացնում իր բաժնետերերին ընդհանուր ժողովի գումարման մասին:

Սարգիս Հարությունյան (36 տարեկան)

ՊԱՏԱՍԽԱՆ. «Ամերիաբանկ»-ը տեղեկացնում է իր բաժնետերերին ընդհանուր ժողովի գումարման մասին առնվազն 15 օրացուցային օր առաջ, եթե այլ բան նախատեսված չէ գործող օրենսդրությամբ:

Ժողովին մասնակցելու իրավունք ունեցող յուրաքանչյուր բաժնետիրոջն ուղարկվում է գրավոր ծանուցում՝ պատվիրված նամակի տեսքով: Ծանուցումը հրապարակվում է նաեւ բանկի կայքում (www.ameriabank.am)՝ «Ներդրողների հետ փոխհարաբերություններ» բաժնում:

«Ամերիա» բանկ

«ԺՈՂՈՎՈՒՐԴ». Շահութաբաժինների վճարման մասին որոշումն ընդունվում է եւ վճարման ձեւը սահմանվում է Բաժնետերերի տարեկան ընդհանուր ժողովի կողմից մինչեւ ֆինանսական տարվան հաջորդող տարվա ապրիլ ամսվա ավարտը՝ ՀՀ «Բաժնետիրական ընկերությունների մասին» օրենքով սահմանված կարգով: