ՏԵՍԱՆՅՈՒԹ․ Ինչպես են նախկինները գովազդում Երևանի քաղաքապետի թեկնածուներին․ որոնք են խոշոր գովազդային գործակալությունները

Նախընտրական քարոզարշավի մեկնարկին հաջորդել է գովազդային վահանակների բաշխման աշխատանքները։ Ըստ թեկնածուների, բաշխումը կատարվել է վիճակագրության սկզբունքով՝ Կենտրոնական Ընտրական Հանձնաժողովի նախագահ Վահագն Հովակիմյանի համապատասխան որոշմամբ։  Այսպիսով,  Armlur.am-ը ներկայացնում է, թե ում են վճարելու թեկնածուները` գովազդային վահանակներին իրենց պաստառները փակցնելու համար։

«Նուշիկյան ասոցիացիա» ՍՊԸ գործակալությունն այն կազմակերպություններից է, որին դիմել են նախընտրական գործընթացում գովազդային վահանակների վրա գովազդ ապահովվելու համար։ «Նուշիկյան ասոցիացիա» ՍՊԸ-ն պատկանում է ՀՀԿ նախկին պատգամավոր Գարեգին Նուշիկյանին։

Հաջորդ գործակալությունը, որը զբաղվում է նախընտրական քարոզարշավի պաստառների տեղադրմամբ «ԷԳԱ» ՍՊԸ-ն է, որի տնօրենն է Թամարա Հակոբյանը։ 2018 թվականին օրենսդրական մեծ փոփոխության արդյունքում ավտոմոբիլային ճանապարհներին տեղադրված բոլոր գովազդային վահանակների համար օրենսդիրը նախատել է վճարել ճանապարհային հարկ, ինչի պատճառով ապամոնտաժվեցին ընկերության մի քանի վահանակ։

Գովազդային գործակալությունների շարքում է նաև «Միկմետալ» ՓԲԸ-ն, որը ամրաններ արտադրող և վճառող ընկերություն է, որի  75 %-ի բաժնետեր է Ազգային ժողովի նախկին պատգամավոր Վահան Հարությունյանը, իսկ մնացած 25 %-ի բաժնետերը նրա հայրն է ՝  Միխաիլ Հարությունյանը։

Հաջորդ կազմակերպությունը «ԲԻ ԲԻ Գրուպ» գովազդային գործակալությունն է, որի խորհրդականը Երևանի քաղաքապետարանի նախկին պաշտոնյա Արազ Բաղդասարյանն է։  Քաղաքապետարանի արտաքին ձևավորման և գովազդի վարչության նախկին պետ Արազ Բաղդասարյանը հանդիսանում է նաև «Արբա Մեդիա» ՍՊԸ գովազդային գործակալության սեփականատիրոջ որդին։

Հավելենք նաև, որ  Երևան քաղաքում գերակշռում է «Քաղաքացիական պայմանագիր» խմբակցության պաստառները, փոքրամասնություն են համարվում մյուս կուսակցությունները։

Armlur.am-ի տեսախցիկը պտտվել է քաղաքում և ֆիքսել, որ քաղաքը՝ մանավանդ Կենտրոն վարչական շրջանը, ամբողջովին պատված է ավինյանական կապույտով, իսկ մյուս կուսակցություններին հատկացված է քաղաքի ամենգողտրիկ անկյուններում գտնվող վահանակները։

Մանրամասները՝ Armlur.am-ի տեսանյութում։

Էմմա Միքայելյան