Երիտասարդ երգիչ Գուրգեն Դաբաղյանն այսօր դարձավ 26 տարեկան: Նա իր տարեդարձը կտոնի Լոնդոնում, ուր Լիլիթ Հովհաննիսյանի, Միհրան Ծառուկյանի և Արամեի հետ մեկնել է համերգային շրջագայությունների: Այդ մասին Armlur.am լրատվականի թղթակցի հետ զրույցում ասաց Գուրգեն Դաբաղյանի հորեղբայրը` հայտնի և սիրված դուդուկահար Գևորգ Դաբաղյանը:
Հորեղբոր հավաստմամբ, ի տարբերություն շատ երգիչ-երգչուհիների, որոնք իրենց տարեդարձը տոնում են ճոխ ռեստորաններում, մեծաթիվ մարդկանց ներկայությամբ, իսկ հետո երբեմն էլ այն հրապարակում լրատվամիջոցներով, Գուրգենը նման թիթիզ բաներ չի սիրում, նախընտրում է իր ծննդյան տարեդարձը տոնել մտերմիկ մթնոլորտում կամ էլ տանը ` հարազատների հետ:
Դուդուկահարը հիշում է, երբ Գուրգենին մանուկ հասակում խաղալիքներ էին նվիրում, շատ էր ուրախանում, թեև այդ տարիքում նա հասուն երգեր էր երգում, բայց միևնույն է, երեխա էր:
-Ի՞նչ է նվիրելու Գևորգ Դաբաղյանը իր սիրելի եղբորորդուն, երբ նա վերադառնա Լոնդոնից:
«Չգիտեմ»,- համեստացավ ու մտորեց Դաբաղյանը, ապա ասաց. «Կարող է գնանք Գառնու ձոր և երեք օր հանգստանալ այնտեղ: Ինքը նման բաներ սիրում է: Իրեն նյութական բաներով չես զարմացնի»:
Թեև Գուրգեն Դաբաղյանը ազգային երգի ժանրից երբեմն մասնակի շեղվում է, բայց դա չի անհագստացնում դուդուկահարին: «Թող երգի, նա ինչ էլ անի, անում է ճաշակով:Թող նորություն ու թարմություն բերի: Կարևորն ազգայինն իր հոգու մեջ է»,- ասաց Գևորգ Դաբաղյանը, ապա իր եղբորորդուն մաղթեց պահպանել ի վերուստ տրված աստվածահաճո իմաստությունն ու խոհեմությունը:
.gif)
