Միսակ Մարտիրոսյանին առաջարկել են Վճռաբեկի նախագահի դեմ ցուցմո՞ւնք տալ

2013 թվականի նոյեմբեր ամսից կալանքի տակ գտնվող  «ՀՀ դատական դեպարտամենտ» պետական կառավարչական հիմնարկի նախկին ղեկավար Միսակ Մարտիրոսյանի կալանավորման ժամկետը ևս երկու ամսով երկարացվել է: Այս մասին Armlur.am-ին հայտնեց Միսակ Մարտիրոսյանի պաշտպան Վարդան Զուռնաչյանը: Վերջինիս դիտարկմամբ` գործարք է արվել, որ մարդիկ սխալ ցուցմունքներ տան, և սրա մասին հայտարարությունը Մարտիրոսյանի գործին դրական ընթացք կտա:

«Այս գործն անիմաստ ձգձգվում է, որևէ հստակ գործ չի արվում: Չի բերվում որևէ հիմնավոր պատճառ, թե ինչքանով է անհրաժեշտ կալանավորումը: Պատճառ են բերում, թե կարող է փախչել կամ խանգարել գործի ընթացքին: Ես էլ ասում եմ, եթե դեպարտամենտի ղեկավարը, դատավորը կամ դատախազը կարող են փախչել, ուրեմն «չփախչող մարդիկ» դրույթը չի կարող գործել»,- գնահատեց Զուռնաչյանը:

Նշենք նաև, որ Armlur.am–ին հայտնի է դարձել, որ Միսակ Մարտիրոսյանին առաջարկել են ցուցմունք տալ Վճռաբեկ դատարանի նախագահ Արման Մկրտումյանի դեմ, ինչն անելուց հետո իրեն ազատ կարձակեն, սակայն Մարտիրոսյանը հրաժարվել է: Լուրի իսկությունը  Armlur.am–ը փորձեց ճշտել Վարդան Զուռնաչյանից, ով հայտնեց, որ սրա մասին Միսակ Մարիտիրոսյանը կհայտարարի դատարանի դահլիճում:

Հիշեցնենք, որ Մ. Մարտիրոսյանին մեղադրանք է առաջադրվել ՀՀ քրեական օրենսգրքի 2 հոդվածներով` 178-րդ հոդվածի 3րդ մասի 1-ին կետով  և 311-րդ  հոդվածի 1-ին մասով, 3-րդ մասի 2-րդ և 3-րդ կետերով՝ Միսակ Մարտիրոսյանի կողմից աշխատանքի ընդունելու համար խոշոր չափերի կաշառք ստանալու և դատական կարգադրիչների համակարգում աշխատավարձերի յուրացման դեպքերի առնչությամբ:

Տաթև Հարությունյան