Հայաստանի Հանրապետության արդարադատության նախարարության քրեակատարողական ծառայության պետի պարտականությունները կատարող, արդարադատության գնդապետ Ամբակում Գրիգորյանը դեկտեմբերի 8-ին մասնակցել է Անկախ Պետությունների Համագործակցության մասնակից պետությունների քրեակատարողական ծառայությունների ղեկավարների խորհրդի հերթական՝ VIII նիստին։ Ներկա են եղել նաև ծառայության շտաբի պետ Արտակ Սարգսյանը և գլխավոր մասնագետ Ռաֆայել Հարությունյանը։ Այդ մասին հայտնում են Հայաստանի Հանրապետության արդարադատության նախարարության քրեակատարողական ծառայությունից:
«Նիստն անցկացվել է տեսակոնֆերանսի ձևաչափով։ Ամբակում Գրիգորյանն իր ելույթում Ռուսաստանի Դաշնության, Բելառուսի, Ղրղզստանի, Ղազախստանի, Ուզբեկստանի, Տաջիկստանի Հանրապետությունների քրեակատարողական ծառայությունների գործընկերներին ներկայացրել է Հայաստանի քրեակատարողական համակարգի արդի վիճակն ու վերջին ժամանակներում իրականացված աշխատանքները, ինչպես նաև նախատեսվող բարեփոխումները։ Ամբակում Գրիգորյանը մասնավորապես անդրադարձ է կատարել քրեակատարողական ծառայողների ատեստավորման նոր կարգի ներդրմանը, որն ուժի մեջ է մտնելու 2024 թվականից, ներկայացրել է նաև ծառայության օպերատիվ համակարգում նախատեսվող կառուցվածքային փոփոխությունները, որոնք թույլ կտան առավել վերահսկելի դարձնել օպերատիվ իրավիճակը քրեակատարողական հիմնարկներում։
Արդեն իսկ իրականացված աշխատանքներից Ամբակում Գրիգորյանն առանձնացրել է «Արմավիր» քրեակատարողական հիմնարկում ներդրված, հանրային պաշտպանների և ազատազրկված անձանց տեսահաղորդակցությունն ապահովող փորձնական ծրագիրը, որը նպատակ ունի հեշտացնելու անվճար իրավաբանական օգնության հասանելիությունը՝ միաժամանակ ապահովելով փաստաբան-վստահորդ կապի գաղտնիությունը։ Բացի այդ՝ ներկայացրել է պետական միջոցների հաշվին ազատազրկված անձանց թարգմանչական ծառայություններ մատուցելու ծրագիրը։
Ամբակում Գրիգորյանը կարևորել է նաև համագործակցության ամրապնդումը քրեակատարողական հիմնարկներում ծայրահեղական և ահաբեկչական գաղափարների դեմ պայքարում»,- նշված է հաղորդագրության մեջ։
.gif)
