«Գործող օրենսդրությամբ սահմանված են ապրանքների ժամանակավոր պահպանության համար պետական տուրքի դրույքաչափեր: Կառավարությունն առաջարկում է բարձրացնել յուրաքանչյուր մեկ տոննայի համար 1000 դրամի չափով եւ մեկ տոննայից ավելի յուրաքանչյուր մեկ տոննայի համար եւս 300 դրամ սահմանված դրույքաչափերը»,- ասել է ՀՀ պետական եկամուտների կոմիտեի նախագահի տեղակալ Արթուր Մանուկյանը: Նրա խոսքով՝ նպատակը մաքսային վարչարարության իրականացման բնականոն ընթացքն ապահովելն է, ինչպես նաեւ հայտարարագրման գործընթացն առավել արդյունավետ դարձնելը:
«Առաջարկում ենք տրանսպորտային միջոցների համար այս պետական տուրքի դրույքաչափը բարձրացնել՝ նկատի ունենալով ժամանակավոր պահպանության ենթակա ապրանքների պահպանման տարածքների սահմանափակ հնարավորությունները»,- ընդգծել է զեկուցողը եւ հավելել՝ խոսքը վերաբերում է Գյումրու արտաքին տնտեսական գործունեության կենտրոնի տարածքում գտնվող ժամանակավոր պահպանության վայրին ու այդ տարածքի առավել արդյունավետ օգտագործմանը, ինչպես նաեւ մաքսային ձեւակերպումների ժամանակին իրականացմանը:
Ըստ Արթուր Մանուկյանի՝ նախաձեռնությամբ առաջարկվում է ապրանքների ժամանակավոր պահպանության առաջին օրվա համար պետական տուրք չգանձել, պետական տուրքի գանձումը սկսել երկրորդ օրվանից:
Զեկուցողը պատասխանել է պատգամավորների հարցերին՝ նշելով, որ ոլորտում եղել են խնդիրներ, մասնավորապես՝ հարկային չարաշահումներ, եւ դրանց լուծման ուղղությամբ Կառավարությունը մշտապես ներկայացրել է առաջարկություններ, փոփոխություններ կատարել Հարկային օրենսգրքում:
Արթուր Մանուկյանի խոսքով՝ Կառավարության ներկայացրած փոփոխության նպատակներից է նաեւ մաքսային մարմինների ժամանակավոր պահպանության վայրերը չդարձնել ավտոկայանատեղիներ: Նշվել է, որ այսօր Գյումրու ԱՏԳ տարածքում հնարավոր է սպասարկել 500 մեքենա:
Հարակից զեկուցմամբ հանդես է եկել Տնտեսական հարցերի մշտական հանձնաժողովի նախագահի տեղակալ Բաբկեն Թունյանը: Նրա խոսքով՝ քանի որ կան մարդիկ, որոնք մեքենաներ են ներկրում ոչ թե սեփական կարիքների համար, այլեւ վերավաճառելու նպատակով, այդ անձանց համար ավելի ձեռնտու է չմաքսազերծել մեքենան, սպասել, մինչեւ գնորդ կհայտնվի, եւ գործարք կատարելու ժամանակ միանգամից մաքսազերծել. «Այդ ամբողջ ընթացքում իրենք մեքենան թողնում են Գյումրու մաքսատան տարածքում, քանի որ վճարը համեմատաբար էժան է, եւ այդպես իրենց ձեռնտու է: Այսինքն՝ մարդիկ հետո կարողանում են վաճառել այն գնով, որը փակում է իրենց ծախսը»: Պատգամավորն ընդգծել է՝ հանձնաժողովը կողմ է քվեարկել նախագծին, քանի որ դրա ընդունումը համարել է տրամաբանական, ինչպես նաեւ առաջինից երկրորդ ընթերցում փոփոխություններ կատարելու վերաբերյալ պայմանավորվածություն ձեռք բերել զեկուցողի եւ հեղինակի հետ: Ելույթներում պատգամավորները ներկայացրել են փոփոխությունների վերաբերյալ իրենց դիտարկումներն ու առաջարկները:
ՀՀ ԱԺ «Հայաստան» խմբակցության անունից ելույթ է ունեցել խմբակցության քարտուղար Արծվիկ Մինասյանը: Անդրադառնալով «Քաղաքացիական պայմանագիր» խմբակցության քարտուղար Արթուր Հովհաննիսյանի՝ «այն թվերը չեն, որ օրենքներ բերվեն պաշտոնյաների համար բիզնեսներ ստեղծելու համար» դիտարկմանը՝ Արծվիկ Մինասյանը կոչ է արել ներկայացնել գեթ մեկ օրինակ՝ առ այն, որ վերջինս Կառավարության անդամ լինելու ընթացքում ներկայացրած լինի նախագիծ՝ ուղղված որեւէ անձի բիզնես շահերի սպասարկմանը: Ըստ խմբակցության քարտուղարի՝ պետք է պատասխանատու լինել սեփական խոսքերի համար եւ ասել մի բան, որը քիչ թե շատ իրականության հետ աղերս ունի: ՀՀ ԱԺ «Քաղաքացիական պայմանագիր» խմբակցության տեսակետը ներկայացրել է խմբակցության ղեկավար Հայկ Կոնջորյանը: Նա հիշեցրել է, որ գլխադասային հանձնաժողովը դրական եզրակացություն է տվել նախագծին: Խմբակցության ղեկավարն անհրաժեշտ է համարել նախագիծը լավարկելու նպատակով առաջինից երկրորդ ընթերցում հավելյալ քննարկում կազմակերպել:
Խորհրդարանը ««Պետական տուրքի մասին» օրենքում լրացումներ կատարելու մասին» օրինագիծն առաջին ընթերցմամբ քննարկել է դեկտեմբերի 11-ի ԱԺ նիստում:
Պատգամավորները քվեարկություններով ընդունել են հերթական նիստերի ընթացքում քննարկված օրենսդրական նախաձեռնությունները:
ՕԳՆՈՒԹՅՈՒՆ ԵՆ ՑՈՒՑԱԲԵՐՈՒՄ
Կարմիր խաչը սնունդ եւ բժշկական օգնություն է տրամադրում Արցախում մնացած հայերին։ Կարմիր խաչից դժվարանում են ասել՝ արդյոք արցախցիների տեղահանումից հետո հաշվառել են Լեռնային Ղարաբաղում մնացած հայերին։ Արցախում բնակվող հայերի վերաբերյալ ստույգ վիճակագրական տվյալներ կազմակերպությունը չունի։
Այս մասին ասել է ԿԽՄԿ հայաստանյան ներկայացուցչության հաղորդակցման ղեկավար Զառա Ամատունին։ Նրա խոսքով՝ միջազգային կազմակերպությունը այս պահին ներկա է Լեռնային Ղարաբաղում, շարունակում է աշխատել։ 25 մարդու կազմակերպությունը օգնել է, որպեսզի նրանք հեռախոսազանգի կամ տեսակապի օգնությամբ կապ հաստատեն Հայաստանում կամ արտերկրում գտնվող իրենց հարազատների հետ։ Նրանցից 20-ին մարդասիրական օգնություն են ցուցաբերել՝ սնունդ կամ հիգիենայի պարագաներ, նաեւ բժշկական օգնություն են տրամադրել։
ԿՀԱՄԱԳՈՐԾԱԿՑԵՆ ՌԱԶՄԱՏԵԽՆԻԿԱԿԱՆ ՈԼՈՐՏՈՒՄ
Դեկտեմբերի 12-ին ՀՀ պաշտպանության նախարար Սուրեն Պապիկյանի պաշտոնական այցը Կիպրոսի Հանրապետություն մեկնարկել է դիմավորման հանդիսավոր արարողությամբ՝ Կիպրոսի ազգային գվարդիայի պատվո պահակախմբի եւ զինվորական նվագախմբի մասնակցությամբ։
Հնչել են Հայաստանի Հանրապետության եւ Կիպրոսի Հանրապետության պետական օրհներգերը: Այնուհետեւ տեղի է ունեցել ՀՀ պաշտպանության նախարար Սուրեն Պապիկյանի եւ Կիպրոսի Հանրապետության պաշտպանության նախարար Միխալիս Յորղալասի առանձնազրույցը, որին հաջորդել է ընդլայնված կազմով հանդիպում:
Հանդիպման ընթացքում քննարկվել են պաշտպանության բնագավառում հայ-կիպրական համագործակցությանն առնչվող մի շարք հարցեր:
Կողմերն ամփոփել են համագործակցության ներկայիս ընթացքն ու նախանշել դրա զարգացման նոր հնարավորությունները` պատրաստակամություն հայտնելով գործակցել ավելի ընդգրկուն օրակարգով՝ ուսումնավարժական ծրագրեր, փորձի փոխանակում տարբեր ոլորտներում, ռազմատեխնիկական համագործակցություն եւ փոխադարձ հետաքրքրություն ներկայացնող այլ հարցեր: Հանդիպման ավարտին երկու երկրների պաշտպանության նախարարները հանդես են եկել լրատվամիջոցների համար համատեղ հայտարարությամբ, որի ընթացքում վերահաստատել են հագեցած օրակարգով համագործակցելու պատրաստակամությունը։
.gif)
