ԼՂՀ-ն այսօր, ի տարբերություն Հայաստանի Հանրապետության, պաշտոնապես ընդունեց Ղրիմի հանրաքվեի արդյունքները ՝ ԼՂՀ ԱԳՆ-ի համապատասխան հայտարարությունը տարածելով: Այսինքն, Ղարաբաղի իշխանությունների դիրքորոշումը և Ռուսաստանի հետ իրենց երկրի ապագան կապելը նույնիսկ ավելի ընդգծված է դառնում, քան Հայաստանի իշխանությունների դեպքում: Նաև մտավախություն է առաջանում, որ օրեր առաջ Ռուսաստանի լիբերալ-դեմոկրատական կուսակցության նախագահ Վլադիմիր Ժիրինովսկու հայտարարությունն այն մասին, որ Ղրիմի հարցի լուծումը կարող է լավ նախադեպ լինել Լեռնային Ղարաբաղի խնդրի լուծման համար, պատահական չէր, հնարավոր է ՝ նաև միակողմանի չէր և համաձայնեցված էր մյուս կողմի հետ:
Եթե հիշենք նաև Զորի Բալայանի ՝ 2013թ. հոկտեմբերին ուղարկած նամակը ՌԴ նախագահ Վլադիմիր Պուտինին, որտեղ նա փաստացի կոչ է անում ՌԴ իշխանություններին ՝ վերցնել իրենց վրա նախաձեռնությունը և Արցախը դարձնել Ռուսաստանի մաս, ապա կրկին կարելի է գալ այն համոզմունքին, որ քաղաքականության մեջ պատահականությունների նման շարան չի լինում: Զորի Բալայանը ինքն իր նախաձեռնությամբ դժվար թե միանգամից հայտնվեր և նման նամակ գրեր, նաև Ժիրինովսկու հայտարարությունը չէր կարող չարտահայտել Ռուսաստանի դիրքորոշումը:
Ասել է, թե Ռուսաստանը Արցախի հետ կապված իր ծրագրերն ունի, ինչը արդեն գրեթե ակնհայտ է դառնում, և նկատի ունենալով ռուսական կայսրության մեծ ախորժակը, միանգամայն հավանական է: Այլ հարց է, որ Ռուսաստանի իշխանությունները Ղարաբաղի հարցում իրենց հաշվարկներում կարող են սխալված լինել, քանի որ նման դեպքում նախևառաջ պետք է հաշվի առնվի ամենակարևոր գործոնը ՝ տեղի ժողովրդի կամքը: Իսկ ԼՂՀ-ում, ի տարբերություն Ղրիմի, բնակչության 60%-ն էթնիկ ռուսներ չեն, հետևաբար ենթադրյալ հանրաքվեի անցկացման դեպքում նույնիսկ արդյունքները մեծ մասշտաբներով կեղծելով ՝ հնարավոր չի լինի ստանալ ռուսական կողմի համար ցանկալի թվերը:
Հետաքրքիր է Հայաստանի Հանրապետության ՝ առայժմ պահպանվող լռությունը Ղրիմի հարցում, չնայած դա էլ կարող է իր բացատրությունն ունենալ. հաշվի առնելով Սերժ Սարգսյանի շախմատային քաղաքականությունը ՝ կարելի է ենթադրել, որ հայկական կողմը դեռևս սպասում է և հետևում դեպքերի հետագա զարգացմանը ՝ ավելի ճիշտ կողմնորոշվելու համար:
Կարեն Վարդանյան
.gif)
