Նկարիչների հանգստյան տան հարկերը` ջրի տակ

Նկարիչների միության նախագահի ընտրություններից առաջ շատ խոսվեց նկարիչների Շորժայի հանգստյան տան անմխիթար վիճակի մասին:

Armlur.am  լրատվականի թղթակիցը նկարիչների միության նախագահ Կարեն Աղամյանից պարզեց ` հնարավո՞ր է  հովանավորներ գտնել  հանգստյան տունը վերանորոգելու համար:

Կարեն Աղամյանն ասաց, որ ոչ մի հովանավոր հենց այնպես ուրիշի համար գործ չի անում: «Իհարկե, փնտրել ենք, բայց չենք գտել»,- ասաց միության նախագահը:

Աղամյանը տեղեկացրեց, որ  Սևանա լճի ջուրն այնքան է բարձրացել (որի համար իրենք ուրախ են), որ հանգստյան տան առաջին հարկերն անցել են ջրի տակ:

«Փրկելու հարց էլ չկա, 2-րդ հարկն էլ մի կերպ օգտագործում ենք»,-  տեղեկացրեց Կարեն Աղամյանը `  հավելելով, որ  իրենք 1-2 տարի առաջ դիմել են նաև ՀՀ կառավարությանը ջրի տակ անցած հարկերի համար փոխհատուցում ստանալու համար, սակայն դեռ պատասխան չկա:

Ի դեպ, նման վիճակում են հայտնվել նաև հանգստյան այլ տներ: «Եթե կառավարությունը լուծում գտնի, մենք էլ կօգտվենք»,- ասաց Կարեն Աղամյանը:

Չնայած  հանգստյան տան անմխիթար վիճակին, նկարիչները ամռանը մոտ երկու ամիս (մեկ անձը 2000-4000 դրամ) հանգստանում են այնտեղ: «Սակայն հավաքվող գումարը  բավական չէ, որ հանգստյան տունը լիովին վերականգնվի: Մենք ունենք 100  տեղանոց հանգստյան տուն, որի վարձակալումից  հավաքվում է 4-5 մլն դրամ, որը բավարար է միայն  տան ծախսերի համար: Եկամուտ  համարյա թե չկա»,- եզրափակեց Աղամյանը: