«Գիտեք, դրանք մարդու տեսակ են, որ իրենց համար գուցեեւ տարբերություն չկա, թե որ քաղաքական ուժում են գտնվում: Սա սկզբունքի խնդիր է, ես որեւէ մեկին որեւէ բան չունեմ ասելու»,-ՕԵԿ-ական նախկին կուսակիցների` արդեն օրինաչափ դարձած մուտքը ԲՀԿ այսպես է մեկնաբանում ՕԵԿ խմբակցության ղեկավար Հեղինե Բիշարյանը:
-Տիկի՛ն Բիշարյան, կան մեկնաբանություններ, որ այն, ինչ կատարվում է կոալիցիայում ՀՀԿ-ի եւ ԲՀԿ-ի միջեւ, շատ ձեռնտու է ՕԵԿ-ին: Այն առումով, որ հնարավոր է` ինչ-որ պահի ավելանան թե՛ ձեր նախարարական պորտֆելները եւ թե՛ ԱԺ-ում տեղերը:
-Անընդունելի եմ համարում այդպիսի մտածելակերպը եւ պետք է ասեմ, որ որեւէ քաղաքական թիմի որեւէ վատ բան ցանկանալն «Օրինաց երկրին» նման չէ: Սա մեկ, երկրորդը` «Օրինաց երկիր»-ը գտնում է, որ կոալիցիոն գործընկերների շրջանում լուրջ խնդիրներ չկան, որեւէ քաղաքական թիմի քայլերի արդյունքում որեւէ սպասելիքներ չունենք, մենք շատ լուրջ սկսել ենք մեր աշխատանքները, ամեն շաբաթ հանդիպումներ ենք ունենում մեր ընտրողների եւ մեր կուսակցական կառույցների հետ: Մենք մեր հույսը դնում ենք մեզ վրա: Եւ կարծում եմ, որ մենք, ինչպես 15 տարիների ընթացքում, այսուհետ եւս ունենալու ենք լուրջ հաջողություններ, եւ չեմ ցանկանում, որ որեւէ քաղաքական ուժ ունենա այնպիսի դժվարություններ, ինչ տեսել ենք մենք: Կարծում եմ, որ հաշված ամիսներ են մնացել ընտրություններին, եւ ոչ մի քաղաքական ուժ չի հետապնդի նման մոտեցում, որ երեք ամսով իրեն պաշտոն տան:
-Երբ միացաք ՀՀԿ-ին` կոալիցիայի կազմում, Ձեր կարծիքով` ձայներ կորցրեցի՞ք:
-Ո՛չ, մենք մաս ենք կազմել կոալիցիայի, եւ համարում եմ, որ երբ քաղաքական ուժերը գտնվում են տարբեր հարթության մեջ, ունենում են տարբեր ընտրազանգվածներ: Գուցե մենք ընտրազանգվածների փոփոխություն ունեցանք. այն ընտրողները, որոնք ընդդիմադիր էին, նրանք, երբ մաս ես կազմում իշխանության, ինչ խոսք, հնարավոր է` քեզ հետ չշարունակեն ճանապարհը: Սակայն քեզ հետ կարող են միանալ այնպիսի քաղաքացիներ կամ ընտրողներ, որոնք պետականամետ մտածողություն ունեն: Այսինքն` ընդամենն ընտրազանգվածի փոփոխություն է տեղի ունենում:
-Տեղյա՞կ եք, որ ԱԺ փոխնախագահի պաշտոնում երկու անուն է շրջանառվում` Ձերը եւ Հերմինե Նաղդալյանինը:
-Ճիշտն ասած, մամուլից տեղեկացա: Այն, որ իմ անունը շրջանառության մեջ է դրվել, ես պետք է ասեմ, որ նման քննարկում չի եղել. նախ, որ փոխխոսնակը կին պետք է լինի, երկրորդը` ընդհանրապես չի եղել նման քննարկում, եւ երրորդը` իմ կուսակցության կողմից ինձ բարձր պաշտոն է վստահված, եւ ես շնորհակալ եմ իմ քաղաքական թիմին, ես կատարում եմ իմ աշխատանքները եւ չեմ ուզում դառնալ փոխխոսնակ:
-Այսինքն` եթե առաջարկ լինի…
-Ես կմերժեմ, որովհետեւ, կրկնում եմ, շատ բարձր պաշտոն ունեմ կուսակցությունում: ՀՀԿ-ն պետք է որոշի, թե ում են նշանակելու, առաջադրելու այդ պաշտոնին:
-Ձեր նախկին կուսակից Թամար Պողոսյանը մտավ ԲՀԿ, դարձավ Ծառուկյանի` մշակութային հարցերով խորհրդական: Ինչպե՞ս եք գնահատում դա` հաշվի առնելով, որ սա կարծես օրինաչափություն է դառնում. նախ Սամվել Բալասանյանը, ապա Թամարը:
-Գիտեք, դրանք մարդու տեսակ են, որ իրենց համար գուցեեւ տարբերություն չկա, թե որ քաղաքական ուժում են գտնվում: Սա սկզբունքի խնդիր է, ես որեւէ մեկին որեւէ բան չունեմ ասելու: Ուղղակի պետք է ասեմ, որ Թամարա Պողոսյանը 5 տարի այլեւս ՕԵԿ անդամ չէ, եւ նրա հետագա քայլերը մեզ չեն հետաքրքրում: Ինքը մարդ է, որն ուզում է ինչ-որ գործ անել, գնացել է մի քաղաքական ուժ եւ ուզում է աշխատել նրանց հետ, ինչպես ինքն է ասում: Թող աշխատի, Աստված իր հետ:
-Որպես կին` ինչպե՞ս եք վերաբերվում կոալիցիոն ընկերոջ` ՀՀԿ-ական մարզպետ Սուրեն Խաչատրյանի կողմից մարդ ծեծելու հանգամանքին:
-Միայն այս երեւույթի մասով, որովհետեւ բան չգիտեմ, բնականաբար, դատապարտելի է ցանկացած… թե՛ ընտանիքում, թե՛ հասարակության մեջ, երբ տղամարդը կնոջ վրա ձեռք է բարձրացնում: Առավել եւս, որպես կին` դեմ եմ նման երեւույթներին, էդ լեզվով չի կարելի խոսել կնոջ հետ:
.gif)
