Կարևոր չէ` ինչքան փող են տալիս

«Հայազն» կուսակցությունը ձևավորումը ընթացքի մեջ է  և օբյեկտիվորեն չի կարող մասնակցել վարչապետին  ու կառավարությանն անվստահություն հայտնելու գործընթացին, թեև  այդ  հարցը «Հայազնի» օրակարգում չկա:

Armlur.am լրատվականը փորձեց «Հայազն» կուսակցության վարչության անդամ Արմեն Աղայանից պարզել` «Հայազն» կուսակցությունն իր գործունեությամբ ինչ խնդիրներ  է լուծելու:

-Պրն Աղայան, արդեն մի քանի տարի է ՝ «Հայազնը» որպես ինքնուրույն միավոր գործում է հասարակական-քաղաքական դաշտում: Հիմա ի՞նչ ասել է ` ձևավորվում է կուսակցություն: 

-«Հայազնը» 4-5 տարի առաջ,  երբ ես նրա անդամ չէի, երիտասարդական միություն էր:  Քաղաքականանալու  որոշումը երկու տարվա պատմություն ունի: Կուսակցության վերակազմակերպման  գործընթացը  սկսվել է մեկ տարի առաջ:  Գրանցման փուլը  կասեցվեց, քանի որ կանոնադրության  հետ կապված խնդիրներ կային:

-Այսինքն` դեռ չե՞ք գրանցվել: 

-Չէ, բայց  խնդիրը դա  չէ: Հայաստանում լուրջ կուսակցություն դառնալը հեշտ չէ: «Հայազնը» անիմաստ  կուսակցություն չի լինելու:

-Քանի՞ անդամ ունի  կուսակցությունը:

-Կանոնադրության համաձայն` ունի 200-ից  ավելի անդամներ, որոնց մի մասը բավական ակտիվ է:

-Կուսակցության կազմում գերիշխում են ավագ, թե՞ երիտասարդ սերնդի անդամները:

-Առայժմ երիտասարդ անդամները գերակշռում են, բայց զուհագեռ ավելանում են նաև ավագ սերնդի ներկայացուցիչները:

-Ինչո՞ւ են ձգտում անդամագրվել ձեր  կուսակցությանը,  ինչո՞վ է տարբերվում «Հայազնը» մնացած քաղաքական ուժերից:

-«Հայազն»-ին անդամագրվում են մարդիկ, որոնք չեն գտել իրենց ուզածը քաղաքական այլ ուժերի մեջ:  «Հայազն»-ին միանում են նրանք, որոնք ընդունում են կուսակցության գաղափարախոսությունը, ինչպես  անդամագրվողների մի խումբը գնահատում է «Հայազն»-ի ակտիվությունը:

Գաղափարախոսական  առումով «Հայազն»-ը  միակն է, որը մերժում է  Հայաստանի` ցանկացած ինտեգրացիոն գործընթացի մասնակցությունը: Բացի այդ ` «Հայազնը» ազգային հատվածի կուսակցություն է: Այս դաշտում կարծես թե մրցակցություն չկա:

Ճիշտ է, կան որոշ կուսակցություններ, որոնք հայտ են ներկայացնում այդ դաշտում հանդես գալու, օրինակ, ՀՅԴ-ն, բայց ինչ-որ մի բանի հետ միասին ` մասնավորապես ՀՅԴ-ն համարում  է իրեն նաև սոցիալիստական:

-Կարելի՞ է ենթադրել, որ Դուք եք  լինելու կուսակցության ղեկավարը: 

-«Հայազնը» մերժում է անձերի ու կուռքերի շուրջ համախմբում: Ղեկավար չի լինելու երբեք: Կլինի  կոլեգիալ մարմին, որը կտարանջատի  քաղաքական և կազմակերպական մարմինները: Կազմակերպչական մարմինը կարծես դառնում է ընտրական հանձնաժողով քաղաքական մարմնի ընտրությունը կազմակերպող: Քաղաքական մարմինն է դառնում  կուսակցության քաղաքական դիրքորոշումն արտահայտող:

Գալիք խորհրդարանական  ընտրություններից առաջ  «Հայազնը» կլինի այն եզակի կուսակցություններից մեկը, որը կընտրի իր ցուցակը համակուսակցական քվեարկությամբ:

-Պրն Աղայան, ցանկացած կուսակցություն պահելու համար, բացի  անդամավճարներից, անհրաժեշտ է նաև ֆինանսական լուրջ աջակցություն: Ինչպե՞ս է «Հայազնը» լուծելու այս խնդիրը, ո՞վ է հովանավորելու ձեզ:

-Հովանավորելը շատ մեծ վտանգներ է պարունակում: Հովանավորել նշանակում է պատվեր տալ: Մենք, եթե հանկարծ ունեցանք շատ լուրջ հովանավոր, սրտի մեծ կսկիծով կհրաժարվենք այդ հովանավորությունից,  եթե չհրաժարվենք, չենք լինի այն, ինչ կանք այսօր: Կիրառում ենք փոքր բյուջետային մեխանիզմներ: Այս փուլում  դեռ դա հաջողվում է, բայց դիմացն ավելի լուրջ փուլեր կան, որոնք ծախսեր են պահանջում: Այդ ծախսերը բավարարելը պայմանավորված կլինի մեր անդամների քանակի ավելանումից: Կարևոր չէ` ինչքան փող են տալիս, կարևորը քանի հոգի է տալիս: Մենք ձգտում ենք ունենալ 1000-ավոր հովանավորներ, որոնք մի քիչ մի քիչ փող կտան, քան թե  օլիգարխական ձևով ստվերային հովանավորություն:

-Ցանկացած հովանավոր հենց այնպես երբեք գումար չի տալիս ՝ միշտ ինչ-որ բան ակնկալում է:

-Պետք  է ակնկալեն այն, ինչ առաջարկում է «Հայազնը»: Ի դեպ, վճարողը նաև մասնակցում  է քաղաքական թիմի ընտրությանը:

-Հաշվի առնելով երկրում ինչ սոցիալ-տնտեսական ծանր իրավիճակ է, ինչքա՞ն կարող են ձեր անդամները գումարներ վճարել `  առանց իմանալու `  ի՞նչ է սպասվում իրենց հետագայում: 

-Դե մեր անդամները մասնակցում են կուսակցության   կողմից առաջ քաշվող գործընթացներին,  գիտեն ` ինչի մասին է խոսքը: Մեզ մոտ  տարբեր անդամավճարներ կան ` 2000-ը դրամը տվողներ էլ կան, բայց կան նաև 30.000 դրամ վճարողներ: Գրասենյակ պահելու, նվազագույն ծախսերը հոգալու համար այս փուլում դեռ բավարարում է:

-Սփյուռքի հետ համագործակցելո՞ւ եք:

-Մենք արդեն համագործակցում ենք Սփյուռքի հետ, երբեմն ֆինանսական թեթև աջակցություն ստանում ենք նաև այնտեղից: Շատ չենք պահանջում  ֆինանսական աջակցություն, քանի որ առջևում  բարդ ժամանակներ են: «Հայազնի» հետ սփյուռքահայերը գաղափարական առումով կլինեն միշտ, բայց ՀՀ օրենսդրությունը թույլ չի տալիս նրանց դարձնելու պատգամավորության թեկնածու, քանի որ 5 տարի պետք է ապրի ՀՀ-ում:

-Քաղաքական այն ուժերը, որոնք քննադատում են ՀՀ-ի Մաքսային միությանն անդամակցելը, ԵՄ-ի հետ հարաբերություններ խորացնելը կամ 4 ուժերի համագործակցությունը, անմիջապես համարում են իշխանության, իսկ ավելի կոնկրետ` Սերժ Սարգսյանի պատվեր կատարողը: Արդյոք ժամանակը չէ, որ «Հայազնը» հստակեցնի իր դիրքորոշումն այս առումով  նման մեղադրանքների չարժանանալու համար: 

-Մեզ արդեն բազմիցս պատվեր կատարողի  պիտակներ են կպցրել: Մի մասը իհարկե մոռացել է դրա մասին: Մենք անգամ դրա պատճառով կոնֆլիկտների մեջ ենք հայտնվել: Մենք գնում ենք մեր ճանապարհով, հիմա ով ինչ ուզում է, թող ասի:

-Բայց օրինաչա՞փ եք համարում, որ եթե քաղաքական ուժն այս պահին չորս ուժերի կողքին չէ,  նա դառնում է իշխանության մարդը: 

-Մենք  մեր տեղում ենք ու ունենք մեր հստակ դիրքորոշումը: Եթե մածունը սպիտակ է, ուրեմն սպիտակ է: Եթե Սերժ Սարգսյանը հայտարարի` մածունը սպիտակ է,  չպետք է ասենք` մածունը սև է միայն այն պատճառով,  որ դա ասում է Սերժ Սարգսյանը:

Սոնա Դավթյան