Ինչո՞ւ են վարկերի տոկոսադրույքները բարձրանում

Տնտեսագետ Վարդան Բոստանջյանից այսօր armlur.am լրատվականը հետաքրքրվեց ` ինչն է  պատճառը, որ Հայաստանի բանկերը  բարձր տոկոսադրույքներով են վարկեր տրամադրում:

Բոստանջյանի խոսքով ` առևտրային բանկերը մասնավոր կազմակերպություններ  են և հաշվի առնելով իրենց կարծիքով օբյեկտիվ կամ սուբյեկտիվ ռիսկերը, վարում են իրենց քաղաքականությունը: Եթե տոկոսադրույքները բարձրանում են, ուրեմն  ռիսկայնությունն ավելի մեծ է:

-Հնարավոր է դա պայմանավորված լինի  արտաքին գործոններով ` մասնավորապես Ռուսաստանում  և Ուկրաինայում տեղի ունեցող իրադարձություններով: 

-ՌԴ-ի դեմ կիրառվելիք պատժամիջոցները,  ներդրումների ծավալը  մեր տնտեսվարող սուբյեկտների համար դարձնում է ռիսկային, որով պայմանավորված վարկային կազմակերպությունները կարող են բարձրացնել տոկոսադրույքները:

-Ռուսական բազմաթիվ բանկեր հայտարարեցին  սնանկացման մասին: Սնանկացում սպառնո՞ւմ է հայկական բանկերին, թե ոչ: 

-Չեմ կարող շատ հստակ պատասխանել, բայց բոլոր դեպքերում բանկային համակարգն ու առևտրային կազմակերպությունները աշխատել են այնպես, որ սնանկացման առաջ չկանգնեն: Կարծում եմ` նման հավանականությունը ՀՀ-ի  համար փոքր է, բայց ամեն ինչ հնարավոր է:

-2013-ին տարեվերջին Կենտրոնական բանկի նախագահ Արթուր Ջավադյանը ամփոփիչ զեկույցը ներկայացնելիս հայտարարեց, որ տոկոսադրույքները  նվազել են, ավանդների և վարկերի միջակայքը մոտեցել է, սակայն երեք ամիս հետո հակառակ գործընթացն է  տեղի ունենում ` ավանդների տոկոսադրույքները մնացել են գրեթե անփոփոխ, իսկ վարկերի տոկոսները բարձրացել են:

-Փող տվող կազմակերպությունները  ռիսկայնության  մեծ խնդիր ունեն կամ էլ ռեսուրսի պակաս ունեն: Կամ էլ երկուսը միասին:

Դավիթ Վանեսյան