«Կարեն Սարուխանյանն ո՞վ է, ես նման մարդ չեմ ճանաչում»․ Գյումրու նախկին քաղաքապետ Վարդան Ղուկասյանը մտադիր է առաջադրվել ընտրություններում

ArmLur.am-ի տեղեկություններով՝ Գյումրու նախկին քաղաքապետ Վարդան Ղուկասյանը մտադիր է իր թեկնածությունն առաջադրել Գյումրու համայնքապետի ընտրություններում, որը սարերի ետևում չէ։

Նշենք, որ արդեն տևական ժամանակ է՝ Գյումրիում անիշխանություն է, համայնքապետ Վարդգես Սամսոնյանի հրաժարականից հետո Հայաստանի երկրորդ քաղաքը ղեկավար չունի։

ՔՊ-ն մտադիր է նոր ընտրությունների գնալ Գյումրիում, սակայն օրը դեռ հստակեցված չէ։

ArmLur.am-ի տեղեկություններով՝ նախկին քաղաքապետ Վարդան Ղուկասյանը նույնպես պատրաստվում է առաջադրվել և մասնակցել ընտրություններին, այս նպատակով նա պարբերաբար հանդիպումներ է ունենում քաղաքական տարբեր շրջանակների հետ։

Ավելին, ArmLur.am-ի տեղեկություններով, նա իր շրջապատում հայտարարել է, որ թույլ չի տալու Կարեն Սարուխանյանը դառնա քաղաքապետ․

ArmLur.am-ի հետ զրույցում Վարդան Ղուկասյանն այսպես արձագանքեց մեր ճշտող հարցին․

«Կարեն Սարուխանյանն ո՞վ է, եթե կարող է, ժողովուրդը ձայն կտա իրեն, թող դառնա»։

Ինչ վերաբերվում է իր առաջադրվելուն՝ Վարդան Ղուկասյանը չհերքեց՝ ասելով,

«Երբեք մի ասա՝ երբեք, կապրենք՝ կտեսնենք, ես այնքան բան ունեմ այս քաղաքի համար, որ 90%-ն իմ հետևից կգան, եթե առաջադրվեմ։ Թե չէ՝ Կարեն Սարուխանյան, ես այդպիսի մարդ այս քաղաքում չեմ ճանաչում, ով ասես, առաջ է եկել, խայտառակություն է»։

Քրիստինա Մուշեղյան, Սոնա Գրիգորյան