Հենրիխ Մխիթարյանը գեղեցիկ վերջակետ դրեց հանդիպմանը (Տեսանյութ)

Ֆուտբոլի Ուկրաինայի Բարձրագույն խմբի առաջնության 18-րդ տուրի իր հանդիպումը քիչ առաջ ավարտեց Դոնեցկի “”Շախտյորը””, որը մրցակցի հարկի տակ 5-0 հաշվով հաղթեց Լվովի “”Կարպատներին””: “”Շախտյորի”” կազմում մեկնարկային րոպեներից խաղադաշտ դուրս եկավ նաեւ Հայաստանի ազգային հավաքականի առաջատար կիսապաշտպան Հենրիխ Մխիթարյանը, ով պարզապես գերազանց հանդիպում անցկացրեց: Հենրիխն այսօր իր տարերքի մեջ էր եւ բզկտեց մրցակցի պատշպանական դիրքերը: Պատահական չէր, որ մեր ֆուտբոլիստն այս խաղում մրցակցի դարպասը գրավելու բազմաթիվ հնարավորություններ ունեցավ, սակայն ամեն անգամ բախտը փոքր-ինչ չէր ժպտում Մխիթարյանին: Դրվագներից մեկում Հենրիխի հարվածից հետո գնդակը նույնիսկ ետ մղվեց տանտերերի դարպասի հորզիոնական դարպասաձողից: Այդպիսի ակտիվությունը չէր կարող իր պտուղները չտալ եւ հանդիպման 75-րդ րոպեին Մխիթարյանը կարողացավ, այնուամենայնիվ, գրավել “”Կարպատների”” դարպասը` դառնալով բավական գեղեցիկ գոլի հեղինակ: Հենրիխի խփած գնդակն այղ խաղում վերջինն էր եւ ամրագրեց “”հանքափորների”” հաղթանակը` 5-0 հաշվով: Ուկրաինայի Բարձրագույն խմբի առաջնության 19-րդ տուրում Դոնեցկի “”Շախտյորը”” սեփական հարկի տակ ընդունելու է Կիեւի “”Արսենալին””: Հանդիպումը կայանալու է դեկտեմբերի 2-ին: