«ՍԴ-ի կայացրած որոշման մեջ ավելի քիչ իրավաբանություն կա ՝ավելի շատ է քաղաքականությունը: Կենսաթոշակային նոր օրենքը պետք է տապալված համարել»,- այսօրվա մամլո ասուլիսում ասաց իրավաբան Նորայր Նորիկյանը:
Նրա խոսքով ` ձևավորվելիք նոր կառավարությունը ոչինչ չի կարող անել, քանի որ այս օրենքի վարկաբեկվածության աստիճանը շատ խորն է:
«Թեև կենսաթոշակային նոր օրենքի կիրառումը միս ու արյուն տվեց Տիգրան Սարգսյանի կառավարությունը: Հեռացած վարչապետի մասին վատ բան չեմ ուզում ասել, բայց նրա քաղաքական ֆիասկոյի պատճառներից մեկն էլ ՍԴ-ի որոշումն էր»,- նկատեց բանախոսը:
Փաստաբանը կոչ արեց չվճարել պարտադիր կենսաթոշակայի 5 տոկոս վճարը մինչև սեպտեմբերի 30-ը, քանի որ դրանք հետ վերադարձման ենթակա գումարներ են:
Armlur.am լրատվականի հարցին` ինչպե՞ս կարող է քաղաքացին հավատալ իրավաբանի խոսքին, եթե ՍԴ նախագահ Գագիկ Հարությունյանը հակառակ հայտարարությունն է անում ՝ պրն Նորիկյանը հիշեցրեց, որ ՍԴ նախագահն ու անդամն իրավունք չունեն մեկնաբանելու օրենքը:
Երկրորդ` ՍԴ-ի որոշման 42-րդ հոդվածը նախատեսում է վերահաշվարկի հնարավորություն: Եթե գործատուներն իրենց աշխատակիցներից պահում են 5 տոկոս կուտակային վճարը, փաստաբանի տեղեկացմամբ քաղաքացին իրավունք ունի ՍԴ-ի որոշումը ձեռքին` հատկապես եզրափակիչ մասում 6-րդ կետին հղում տալով՝ մտնել դատարան և հետ ստանալ իր գումարները:
Ասուլիսի մյուս բանախոս, գործատուների միության ղեկավար Գագիկ Մակարյանի խոսքով` ՍԴ-ն ժամանակ շահեց նման որոշում կայացնելով:
Նոր կառավարությունը պիտի կարողանա համոզել քաղաքացիներին, որ վճարեն կամ սառեցնեն օրենքի կիրառությունը:
«Գործատուները հիմա չեն շտապում վճարել գումարները, ավելին` մենք օգնելու ենք մեր գործատուներին, որպեսզի նրանցից հանվի տույժ ու տուգանքները, որոնք կվերաբերեն կենսաթոշակային գումարների չվճարմանը»,- եզրափակեց Մակարյանը:
Սոնա Դավթյան
.gif)
