Ռուսաստանի արտաքին գործերի նախարար Սերգեյ Լավրովը և Իրանի արտաքին գործերի նախարար Աբբաս Արաղչին հեռախոսազրույցի ընթացքում քննարկել են Իրանում ԱՄՆ-ի և Իսրայելի կողմից իրականացված հարվածներից հետո ստեղծված իրավիճակը՝ ընդգծելով, որ դրանք ծանր հետևանքներ ունեն ամբողջ Մերձավոր Արևելքի համար։ Այս մասին ասվում է ՌԴ ԱԳՆ հայտարարության մեջ։
«Քննարկվել է տարածաշրջանում իրավիճակի զարգացումը, որը պայմանավորված է ԱՄՆ-ի և Իսրայելի կողմից Իրանի դեմ չհրահրված զինված ագրեսիայի հետևանքով։ Ընդգծվել է, որ նման գործողությունները խաթարում են միջազգային իրավունքի հիմնարար նորմերը և ծանր հետևանքներ ունեն ամբողջ Մերձավոր Արևելքի համար։ Այս դիրքորոշումը հստակորեն կրկնել է Ռուսաստանի ներկայացուցիչը ՄԱԿ-ի Անվտանգության խորհրդի նիստում», – ասվում է հայտարարության մեջ։
Դիվանագիտական առաքելությունը հայտնել է, որ Լավրովը վերահաստատել է իր սկզբունքային դիրքորոշումը՝ ի նպաստ լարվածության թուլացման, ուժի կիրառումից հրաժարվելու և հակամարտության քաղաքական-դիվանագիտական կարգավորմանն անցնելու, ինչպես նաև Ռուսաստանի պատրաստակամությունը՝ դրան լիովին նպաստելու համար։ «Շեշտադրվել է նաև տարածաշրջանի բոլոր երկրներում քաղաքացիական բնակչության և քաղաքացիական ենթակառուցվածքների անվտանգությունն ապահովելուն ուղղված միջոցառումներ ձեռնարկելու առաջնահերթությունը», – հավելել է արտգործնախարարությունը։
.gif)
