ՌԴ ԱԳՆ պաշտոնական ներկայացուցիչ Մարիա Զախարովան հայտարարել է, որ Եվրոպական միության (ԵՄ) շրջանակներում գործող մոտեցումները, ըստ նրա, ուղղված են քաղաքացիների կյանքի վատթարացմանը։
Զախարովան Sputnik ռադիոյի եթերում նշել է, որ, իր կարծիքով, «բրյուսելյան բյուրոկրատիայի խնդիրն այն է, որ ԵՄ երկրների քաղաքացիները ապրեն ավելի վատ, ոչ թե ավելի լավ»։ Նրա խոսքով՝ եթե Հայաստանի վարչապետ Նիկոլ Փաշինյանը իրեն ասոցացնում է Բրյուսելի հետ, ապա, հնարավոր է, ընդունում է նաև այդ մոտեցումները։
Հաղորդման ընթացքում հիշեցվել է, որ Փաշինյանը չի մասնակցի Եվրասիական տնտեսական միության (ԵԱՏՄ) գագաթնաժողովին, ինչից հետո հարց է հնչել՝ արդյոք Հայաստանը պետք է ընտրություն կատարի ԵԱՏՄ-ի և ԵՄ-ի միջև։
Ի պատասխան՝ Զախարովան ասել է, որ դա Հայաստանի կողմի որոշման հարց է։ Նրա խոսքով՝ Փաշինյանը հաճախ իրեն կապում է արևմտաեվրոպական երկրների և եվրոպական կառույցների հետ՝ ընդգծելով, որ Հայաստանը, ըստ էության, եվրոպական երկիր է՝ եվրասիական ընդհանուր տարածքում։
Դիվանագետը նաև հայտարարել է, որ, իր գնահատմամբ, «բրյուսելյան բյուրոկրատիայի գործնական նպատակը ԵՄ քաղաքացիների կյանքի վատթարացումն է»։ Նրա խոսքով՝ եթե Փաշինյանը իրեն նույնացնում է այդ բյուրոկրատիայի հետ, ապա կարող է կիսել նաև այդ մոտեցումները։
Միևնույն ժամանակ Զախարովան ընդգծել է, որ Եվրասիական համագործակցությունը, ըստ Ռուսաստանի դիրքորոշման, հիմնված է հավասարության և փոխադարձ հարգանքի վրա և նպաստում է անդամ երկրների տնտեսական օգուտներին։
Նա նշել է, որ ԵԱՏՄ համակարգը, իր բնորոշմամբ, բաց և թափանցիկ է, չի կրում քաղաքականացված բնույթ և ուղղված է ազատ շուկայի ու նորմալ մրցակցության զարգացմանը։
Թարգմանությունը՝ Անի Վարդանյանի
.gif)
