Ռուսաստանը մտահոգված է ԱՄՆ-ի և Իրանի միջև փոխադարձ հարվածներով, որոնք կարող են հանգեցնել տարածաշրջանում լայնածավալ հակամարտության վերսկսմանը։ Այս մասին հայտարարել է Ռուսաստանի արտաքին գործերի նախարարության խոսնակ Մարիա Զախարովան։
«Իրոք, մեր տեղեկությունների համաձայն, հունիսի 2-ին Պարսից ծոցում տեղակայված ամերիկյան ուժերը հարձակվել են Իրանի Քեշմ կղզում գտնվող ռադարների և անօդաչու թռչող սարքերի կառավարման կենտրոնների վրա։ Հարձակման է ենթարկվել նաև իրանական նավթատար նավը, որը փորձում էր ճեղքել ամերիկյան շրջափակումը և շարժվել դեպի Խարկ կղզի», – ասել է դիվանագետը։ «Հունիսի 3-ի գիշերը իրանցիները պատասխանել են այս գործողություններին՝ հրթիռային հարված հասցնելով Բահրեյնում ԱՄՆ ռազմածովային ուժերի հինգերորդ նավատորմի հրամանատարական կենտրոնին, ինչպես նաև Քուվեյթում գտնվող Ալի ալ-Սալեմ և Արիֆջան ռազմական բազաներին։ Բացի այդ, հարձակման է ենթարկվել Քուվեյթի միջազգային օդանավակայանի ուղևորային տերմինալը։ Քուվեյթի արտաքին գործերի նախարարության հայտարարության համաձայն, այդ հարձակումների հետևանքով զոհվել է մեկ մարդ, մի քանիսը վիրավորվել են։ Վնասվել են կարևորագույն ենթակառուցվածքները և օտարերկրյա դիվանագիտական ներկայացուցչությունների շենքերը»։
«Մենք խիստ մտահոգված ենք այս զարգացումով, որը կարող է հանգեցնել Պարսից ծոցում լայնածավալ ռազմաքաղաքական հակամարտության վերսկսման, որը հրահրվել է ԱՄՆ-ի և Իսրայելի կողմից Իրանի դեմ ռազմական ագրեսիայի պատճառով», – ընդգծել է դիվանագետը։
Մոսկվան կոչ է անում բոլոր կողմերին «զերծ մնալ այնպիսի քայլերից, որոնք կարող են էլ ավելի սրել լարվածությունը և խաթարել իրավիճակը լիցքաթափելու դիվանագիտական ջանքերը»։ «Կարևոր է կանխել տարածաշրջանի հետագա ներքաշումը ավերիչ պատերազմի մեջ։ Մենք կտրականապես անընդունելի ենք համարում զուտ քաղաքացիական ենթակառուցվածքների վրա հարձակումները», – հայտարարել է Ռուսաստանի արտաքին գործերի նախարարության խոսնակը։
.gif)
