Ջերմոցային տնտեսությունների ասոցիացիայի ղեկավար Պողոս Գևորգյանը Armlur.am-ի հետ զրույցում դրական է համարում ցանկացած ջերմոցային տնտեսության ստեղծումը, սակայն դրան զուգահեռ պետք է պահպանել եղած ջերմոցները:
Հիշեցնենք, որ կառավարության այսօրվա որոշմամբ «Կագա Ագրո» ընկերությունը նախատեսում է ստեղծել նոր ջերմոցային տնտեսություն:
«Կագա Ագրո» ընկերության մասին Պողոս Գևորգյանը լսում է առաջին անգամ, բայց ցանկանում է, որ նոր կառուցվող ջերմոցային տնտեսությունը չաշխատի ի վնաս փոքր ջերմոցային տնտեսությունների` մասնավորապես նոր ջերմոցային տնտեսության արտադրանքը չմտնի ներքին շուկա:
«Լավ կլինի, որ նոր ջերմոցային տնտեսության արտադրանքն արտահանվի: Հանկարծ փոքր ջերմատների գլխին խաղ չխաղան»,- մանրամասնեց մեր զրուցակիցը:
Պողոս Գևորգյանը մտահոգիչ է համարում ջերմոցային տնտեսությունների ներկա վիճակը:
«Եթե այսպես շարունակվի, գործող ջերմոցները կոչնչանան»,- ասաց ջերմատնային ասոցիացիայի ղեկավարը` հավելելով, որ այս պահին ամենակարևոր խնդիրը գազի բարձր սակագինն է: Երկրորդ կարևոր խնդիրը` նոր տեխնոլոգիաների չկիրառումն է, որի պատճառը ֆինանսների բացակայությունն է:
Բարեբախտաբար, Հայաստանի ջերմոցների արտադրանքը ամբողջությամբ սպառվում է ներքին շուկայում, ավելին` Իրանից և Թուրքիայից ևս հայկական ջերմոցային արտադրանքի պահանջարկ կա, սակայն մեր ջերմատները չեն կարողանում այն ամբողջությամբ բավարարել նախ և առաջ գազի բարձր սակագնի պատճառով:
-Պրն Գևորգյան, նոր կառավարությունից ու նորանշանակ վարչապետից ջերմատների տերերն ի՞նչ սպասելիքներ ունեն:
-Դե վարչապետը էլի ինչ-որ չափով գյուղատնտեսությունից հասկանում է: Դե տեսնենք ինչ կլինի: Գիտեմ, որ գյուղնախարարը պատրաստվում է նորից մեր խնդիրների համար դիմել կառավարություն, քանի որ նախորդ կառավարությունը մեր բարձրացրած խնդիրներից ոչ մեկը չլուծեց:
Տեղեկացնենք, որ Հայաստանում կա 950-1000 ջերմոցային տնտեսություն, որոնց մի մասը փոքր ջերմոցներ են և ավելացված արժեքի հարկ չեն մուծում, քանի որ նրանց շրջանառությունը 58 մլն դրամից ավելին չէ:
Ի դեպ, շրջանառվող լուրերի համաձայն` բացի նախկին վարչապետ Տիգրան Սարգսյանից, ջերմոցային տնտեսություններ ունեն Սերժ Սարգսյանը, նրա փեսա Միքայել Մինասյանը, նախագահի գլխավոր խորհրդական Արամ Ղարիբյանը:
Սոնա Դավթյան
.gif)
