Ուկրաինայում ռուսական հարվածների նոր ալիքի հետևանքով զոհվել է առնվազն 9 մարդ, վիրավորվել՝ տասնյակ քաղաքացիներ, ինչպես նաև վնասվել է մայրաքաղաք Կիևի պատմական և կրոնական կարևոր հուշարձաններից մեկը։
Ուկրաինական իշխանությունների տվյալներով՝ Կիևի վրա իրականացված հարձակումների հետևանքով զոհվել է 4 մարդ։ Մյուս 5 զոհերը եղել են փրկարարներ, որոնք մահացել են Խարկովի հյուսիս-արևելյան հատվածում ռուսական հարվածից առաջացած հրդեհը մարելու ընթացքում։
Հարձակման հետևանքով զգալիորեն վնասվել է 11-րդ դարի Դորմիցիայի տաճարը (Dormition Cathedral), որը գտնվում է Կիև-Պեչերսկի մայրավանքի տարածքում։ Ուկրաինայի վարչապետ Յուլիա Սվիրիդենկոն այս հարվածը որակել է որպես «բռնի հարձակում մեր ժողովրդի և մեր ժառանգության վրա»։
Միաժամանակ, Ռուսաստանի Տուլա քաղաքում (Մոսկվայից հարավ) ուկրաինական անօդաչու սարքերի հարձակման հետևանքով զոհվել է 3 մարդ, ևս 3-ը վիրավորվել են, այդ թվում՝ մեկ տարեկան երեխա, հայտնում են տեղական իշխանությունները։
Հարվածների հետևանքով Կիևում հրդեհվել են շենքեր և ավտոմեքենաներ, ինչպես նաև հոսանքազրկվել է ավելի քան 140 հազար բնակիչ։ Քաղաքապետ Վիտալի Կլիչկոյի խոսքով՝ քաղաքը հայտնվել է օդային տագնապի ռեժիմում։
Կիևի վրա հարձակումների հետևանքով առնվազն 23 մարդ վիրավորվել է, իսկ Խարկովում՝ ևս 5-ը։
Ուկրաինայի արտաքին գործերի նախարար Անդրեյ Սիբիհան հայտարարել է, որ Կիևը պատրաստվում է դիմել ՅՈՒՆԵՍԿՕ-ին և այլ միջազգային կառույցների՝ պահանջելով արձագանքել Դորմիցիայի տաճարին հասցված վնասին։
Լեհաստանը հայտնել է, որ կանխարգելիչ նպատակով օդ է բարձրացրել իր կործանիչները և ակտիվացրել հակաօդային պաշտպանության համակարգերը՝ արձագանքելով Կիևի ուղղությամբ հարվածներին։
Հարձակումները տեղի են ունենում Մեծ յոթնյակի (G7) հանդիպումից առաջ, որտեղ քննարկվելու է նաև Ուկրաինայի պատերազմը։
Հիշեցնենք, որ Ռուսաստանի նախագահ Վլադիմիր Պուտինը 2022 թվականին սկսել է լայնածավալ ներխուժում Ուկրաինա։
Հեղինակ՝ Անի Վարդանյան
.gif)
