Դեկտեմբերի 8-ից Բերդում` Տավուշի մարզի առաջին ատյանի դատարանում, սկսվել է Իջեւանի զորամասի նախկին հրամանատար, գնդապետ Սերգեյ Կարապետյանի գործով դատավարությունը: Իջեւանի տարածաշրջանի Գետահովիտ գյուղի երկու բնակիչներ 2010թ. դեկտեմբերի 31-ին` տարեմուտից մի քանի ժամ առաջ, դեղորայք էին տարել ընկերներից մեկի եղբորը, ով այդ զորամասում էր ծառայում: Նրանց հանդիպել էր զորամասի հրամանատար, գնդապետ Սերգեյ Կարապետյանը, ով զայրացել էր այդ այցից եւ նրանց «բերման ենթարկել» իր աշխատասենյակ, որտեղ սկսել էր երիտասարդներին ահաբեկել: Արդյունքում տղաները ցատկել էին երկրորդ հարկում գտնվող նրա աշխատասենյակի պատուհանից, եւ 20-ամյա Տարոն Ենգիբարյանը գլխի ծանր վնասվածքներ էր ստացել, իսկ 21-ամյա Աշոտ Ուլիխանյանը` ձախ ոտքի կոտրվածք: Տարոնին տեղափոխել էին Իջեւանի հիվանդանոց, ապա Երեւանի «Սուրբ Գրիգոր Լուսավորիչ» բժշկական կենտրոն: 10 օր հետո, այդպես էլ գիտակցության չգալով, 20-ամյա Տարոն Ենգիբարյանը մահացել էր: ՀՀ պաշտպանության նախարար Սեյրան Օհանյանի հրամանով Սերգեյ Կարապետյանն ազատվել էր զբաղեցրած պաշտոնից: Դատավոր Զոյա Զաքինյանը տեղեկացրեց, որ հերթական նիստը նշանակված է դեկտեմբերի 22-ին:
.gif)
