Ադրբեջանի նախագահ Իլհամ Ալիևը սեպտեմբերի 1-ին Բիշքեկում հանդիպել է Թուրքիայի նախագահ Ռեջեփ Թայիփ Էրդողանի հետ։
Ադրբեջանական «Ազերթաջի» փոխանցմամբ՝ հանդիպման ընթացքում կողմերն ընդգծել են, որ ադրբեջանա-թուրքական երկկողմ հարաբերությունները հիմնված են եղբայրության և ռազմավարական դաշնակցային հարաբերությունների վրա։ Կողմերը գոհունակություն են հայտնել տարբեր ուղղություններով կապերի հետագա ընդլայնման առնչությամբ։
Հանդիպման ընթացքում ընդգծվել է նաև «մեկ ազգ, երկու պետություն» սկզբունքը՝ նշելով, որ երկու երկրները միմյանց կողքին են ինչպես լավ, այնպես էլ դժվար ժամանակներում։
Ալիևն ու Էրդողանը մտքեր են փոխանակել տարածաշրջանային խաղաղության և կայունության հետագա ամրապնդման վերաբերյալ։
Երկու երկրների ղեկավարները քննարկել են նաև դաշնակցային հարաբերությունների զարգացման հեռանկարները, տարածաշրջանային օրակարգը և փոխադարձ հետաքրքրություն ներկայացնող այլ հարցեր։
Ա․ Վարդանյան
.gif)
