Գյումրիի ժուռնալիստների «Ասպարեզ» ակումբի խորհրդի նախագահ Լևոն Բարսեղյանը, armlur.am– ի հետ զրույցում խոսելով ՀՀ վարչապետ Հովիկ Աբրահամյանի անունը սխալ գրած աշխատակցի և նյութի հեղինակ լրագրողի` «Արմենիա» հեռուստաընկերությունից հեռացված լինելու մասին, համոզված ասաց, որ դա տեխնիկական խնդիր է, իսկ ավելի կոնկրետ` անհեթեթ պատմություն:
«Եթե ուշադիր լինեին, կտեսնեին, որ ստեղնաշարի վրա «ա» և «ո» տառերն իրար կողքի են: Եթե աշխատակիցը ցանկանար դիտավորյալ որևէ բան անել, ապա հավիկ չէին գրի, կգրեին ավելի հայտնի կենդանու անուն: Դա վրիպակ է, որը լինում է աշխարհի ամենաառաջատար հեռուստաընկերություններում: Համենայնդեպս, մարդկանց աշխատանքից ազատելն անարդարացի է: Իսկ անօրինական է, թե ոչ, պետք է նայել հեռուստաընկերության և աշխատակիցների միջև կնքված պայմանագրերից` մասնավորապես պայմանագրերում գրվա՞ծ է, որ լրագրողը պատասխանատու է լուսագրեր շարողի աշխատանքի համար»,- մանրամասնեց Բարսեղյանը:
-Պրն Բարսեղյան, հաշվի առնելով, որ հեռարձակման ոլորտը իշխանությունների ձեռքում է, կարծում եք «Արմենիան» ինքնուրո՞ւյն է կայացրել այդ որոշումը:
-Ես կարծում եմ` «Արմենիան» որոշել է հաճոյանալ և հավատարիմ մնալ իշխանության գծին: Ես կասկածում եմ, որ Հովիկ Աբրահամյանը տեղյակ է այդ ամենի մասին: Ես կարծում եմ, որ եթե իմանա, պետք է անի ամեն ինչ՝ վերականգնելու մարդկանց աշխատանքը: Որևէ դիտավորություն չկա և չի կարող լինել: Ես չէի հեռացնի իմ աշխատակցին, եթե նման բան տեղի ունենար:
Armlur.am-ը փորձեց մեկնաբանություն ստանալ նաև «Արմենիա» հեռուստաընկերության գործադիր տնօրեն Գագիկ Մկրտչյանից, սակայն մեր հեռախոսազանգերը մնացին անպատասխան:
.gif)
