Ֆրանսիայում ուսանողական բողոքի ակցիաները թեժանում են․ ի՞նչ են պահանջում աշակերտները

Ֆրանսիայում ամենամեծ աննախադեպ ուսանողական բողոքի ակցիաներ են ընթանում։ Շարժումը սկսվել է սեպտեմբերի 21-ին Փարիզի արվարձաններից մեկի դպրոցում՝ ուսուցիչների գործադուլին աջակցելու նպատակով, սակայն արագ տարածվել է ամբողջ երկրում։

Բողոքի ակցիաների հետևանքով հարյուրավոր դպրոցներ փակվել են, ավելի քան 5 հազար մարդ բերման է ենթարկվել ոստիկանություն։ Բախումների ընթացքում տուժել են աշակերտներ, ուսուցիչներ և ոստիկաններ, իսկ ավելի քան 100 դպրոց վնասվել է։

Ուսանողները հիմնականում դժգոհում են կրթական համակարգի ֆինանսավորման կրճատումներից, ուսուցիչների և ռեսուրսների պակասից ու գերբեռնված դասարաններից։ Ըստ տվյալների՝ Ֆրանսիայի միջնակարգ դպրոցներում այժմ ավելի քիչ ուսուցիչներ են աշխատում, քան 2008-ին, մինչդեռ աշակերտների թիվն աճել է շուրջ 250 հազարով։ Հանրային դպրոցների դասարանների մոտ 70 տոկոսում սովորում է ավելի քան 30 աշակերտ։

Իշխանությունների արձագանքը ևս քննադատության է արժանացել։ Ոստիկանության և ցուցարարների միջև մի շարք քաղաքներում բախումներ են տեղի ունեցել։ Միայն մեկ օրում ոստիկանությունը բերման է ենթարկել շուրջ 2 հազար մարդու։

Հոկտեմբերի 2-ին կրթության նախարար Էդուարդ Ժեֆրեն հանդիպել է ուսանողական առաջնորդների հետ, սակայն համաձայնություն ձեռք չի բերվել։ Դրանից հետո ուսանողները կոչ են արել հոկտեմբերի 6-ին զանգվածային ցույցերի մասնակցել։

Ֆրանսիայի կառավարությունը միաժամանակ փորձում է ընդունել 2027 թվականի բյուջեն և կրճատել պետական դեֆիցիտը, ինչը լրացուցիչ ճնշում է ստեղծում իշխանությունների վրա։

Ուսանողները հայտարարում են, որ իրենց հիմնական պահանջը պարզ է՝ ունենալ կրթական համակարգ, որը հնարավորություն կտա նորմալ սովորել։

Անի Վարդանյան