Ֆրանսիայում բողոքի ակցիաներ են սկսվել․ ուսանողները սպառնացել են արգելափակել բուհերն ու լիցեյները

Հոկտեմբերի 31-ին ամբողջ Ֆրանսիայում անցկացվող բողոքի ակցիաների ֆոնին Փարիզում մեկնարկել է ոստիկանության հետ համաձայնեցված ցույց։ Երթը մեկնարկել է Պորտ դը Բանյոլե հրապարակից։ Երթի առջևից քայլում են աշակերտական և ուսանողական կազմակերպությունների, ինչպես նաև CGT, FSU և FO արհմիությունների ներկայացուցիչները, հայտնել է Le Monde-ը։

Ուսանողական միության ներկայացուցիչ Սաբրին Հարբախը հայտարարել է երեքշաբթի օրվանից լիցեյների և համալսարանների մուտքերն արգելափակելու և արգելափակումը «մինչև հետագա ծանուցում» շարունակելու մտադրության մասին։

Երթի առջևում հայտնվել են սև պաստառներ՝ «Մակրոնը խավար է» կարգախոսով։ Ցուցարարներին է միացել նաև նախագահական ընտրություններում ձախակողմյան «Չհնազանդված Ֆրանսիա» (LFI) կուսակցության թեկնածու Ժան-Լյուկ Մելանշոնը։ Մասնակիցները վանկարկել են՝ «Մելանշոն՝ նախագահ»։

Le Monde-ի տվյալներով՝ մարդկանց մեծ թվի պատճառով երթի ընթացքը շուտով դժվարացել է։ Պարբերականը նաև նշել է, որ ցույցի սկզբում պաշտոնական հայտարարությունները կրկին կենտրոնացած էին երթուղու փոփոխությունների վրա։

Թերթի տեղեկություններով՝ հոկտեմբերի 31-ին Ֆրանսիայում նախատեսված են շուրջ 150 հավաք և ցույց։