ԱՄՆ նախագահ Դոնալդ Թրամփի հատուկ բանագնացներ Սթիվ Ուիթքոֆը և նրա փեսան՝ Ջարեդ Քուշները, նոյեմբերի 12-ին Մոսկվայում հանդիպել են Ռուսաստանի նախագահ Վլադիմիր Պուտինի հետ։ Կրեմլում կայացած հանդիպման հիմնական թեման եղել է Ուկրաինայի շուրջ պատերազմը դադարեցնելու հնարավորությունը, ինչպես նաև առաջիկա բանակցություններում եվրոպական երկրների ներգրավումը։
Հատկանշական է, որ ԱՄՆ նախագահի փեսայի այցը Մոսկվա ուշադրություն է գրավել ոչ միայն քաղաքական հանդիպման, այլև նրա հագուստի պատճառով։ Մոսկվայում ձյուն ու ցուրտ եղանակ է եղել, սակայն Քուշները օդանավից իջել է առանց վերարկուի՝ բարակ սվիտերով։ Սոցիալական ցանցերում օգտատերերը նկատել են նրա ոչ սեզոնային հագուստը և կատակել, թե կարծես նա Մոսկվա է ժամանել ամառային եղանակի սպասումով։
Ամերիկյան պատվիրակությանը «Վնուկովո» օդանավակայանում դիմավորել է Ռուսաստանի նախագահի հատուկ ներկայացուցիչ, Ռուսաստանի ուղղակի ներդրումների հիմնադրամի ղեկավար Կիրիլ Դմիտրիևը։ Վերջինս Ուիթքոֆին և Քուշներին դիմավորել է բավական ուշագրավ հագուստով՝ սպիտակ ձմեռային բաճկոնով, որի վրա կարմիր տառերով գրված է եղել «Russia»՝ ռուսական ժողովրդական զարդանախշերով։
Դմիտրիևի բաճկոնն այնքան է գրավել ուշադրությունը, որ Ուիթքոֆը, օդանավից իջնելուց հետո, մատնացույց է արել այն և հետաքրքրություն ցուցաբերել։ Իտալական Il Foglio պարբերականի փոխանցմամբ՝ բաճկոնը ռուսական Bosco ապրանքանիշից է, որը նաև մարզահագուստ է մատակարարում ռուս մարզիկներին։
Այսպիսով, մինչ ամերիկյան պատվիրակությունը Մոսկվա էր մեկնում Ուկրաինայի շուրջ բարդ բանակցությունների համար, օդանավակայանում ուշադրության կենտրոնում հայտնվել էին նաև Դմիտրիևի բաճկոնն ու Քուշների՝ առանց վերարկուի ներկայանալը։
Անի Վարդանյան
.gif)
