Է.Թոփչյանը` երաժիշտներին սպառնալու ու կենսաթոշակային վճարների մասին

Armlur.am-ի հավաստի տեղեկություններով  Հայաստանի պետական ֆիլհարմոնիկ նվագախմբի երաժիշտները մեծ մասը  ցանկացել է դիմում գրել, որպեսզի իրենց աշխատավարձից  կուտակային կենսաթոշակային վճարների պահումներ չարվեն, սակայն  ֆիլհարմոնիկ նվագախմբի ղեկավար Էդուարդ Թոփչյանը  սպառնացել է նրանց` ասելով, որ դիմում գրողները կազատվեն աշխատանքից:

Տեղեկատվությունը ճշտելու համար զանգահարեցինք  Հայաստանի պետական ֆիլհարմոնիկ նվագախմբի գեղարվեստական  ղեկավար Էդուարդ Թոփչյանին: Վերջինս  նախ ասաց, որ նվագախմբում «սպառնալ» հասկացությունը չկա և չի լինի: «Մեր նվագախմբում տարաձայնություններ չկան: Եթե որոշում ենք կայացնում` կայացնում ենք միահամուռ, եթե չենք կայացնում` չենք կայացնում: Այսքան տարիների ընթացքում աշխատանքից ոչ ոք չի ազատվել ինչ-որ բան անելու կամ չանելու համար»,-մանրամասնեց Թոփչյանը:

-Պրն Թոփչյան, աշխատանքի և սոցիալական հարցերի նախարար Արտեմ Ասատրյանը  հայտարարեց, որ նրանք, ովքեր չեն ցանկանում իրենց աշխատավարձից պահումներ արվեն, պետք  է գործատուին դիմում գրեն: Ձեզ մոտ կա՞ն երաժիշտներ, որ դիմում են գրել: 

-Մինչև այս պահը  որոշակի  գումար պահվել է և դա ինչքան գիտեմ բոլոր  հիմնարկներում արվել է: Հայաստանում իմ կարծիքով  չկա մեկը, որ ուզում է` իր աշխատավարձից գումար պահեն: Մեր նվագախմբում  ինչքան ճիշտ եմ հիշում հունվար-փետրվար ամսին մեր տնօրենը հայտարարեց`տեսնենք այս հարցն ինչպես է լուծվելու (նկատի ունի Սահմանադրական դատարանի որոշումը-խմբ.): Ըստ այդմ` կամ պահված գումարը հետ կվերադարձվի կամ  կուղարկվի կենսաթոշակային ֆոնդ: Որևէ բողոք կամ խոսակցություն այդ ժամանակ չի եղել մեզ մոտ: Մեր տնօրենը հիմա քաղաքում չէ: Նա կարող է այդ հարցերին լավագույնս պատասխանել: Հիմա ինչ-որ մեկը կարծեմ ասել է, դուք էլ դիմումներ գրեք, թե ինչ, մի  երկուսը գրել են:

-Ո՞վ է այդ մի հոգին, որ դիմումներ գրելու հրահանգ է իջեցրել:

-Ես չգիտեմ: Մեկն ասում էր` տնօրենն է ասել: Ես էլ դրա համար ասացի` սպասեք տնօրենը գա, ինքը որոշում կայացնի և կասի` ինչ դիմում է պետք կամ դիմում պետք չէ:

Սոնա Դավթյան