«Ժառանգություն» կուսակցության գլխավոր քարտուղար Ստեփան Սաֆարյանը armlur.am-ի հետ զրույցում ասաց, որ հունիսի վերջին նախատեսված է կուսակցության համագումար, սակայն հստակ օրն ու վայրը դեռ պարզ չէ:
Հայտնի չէ նաև համագումարին քաղաքական այլ ուժերի մասնակցությունը: Համագումարի ընթացքում կամփոփվի կուսակցության երկու տարվա աշխատանքը: Ստեփան Սաֆարյանը ո´չ հերքեց, ո´չ էլ հաստատեց այն տեղեկությունները, թե հնարավոր է՝ «Ժառանգություն» կուսակցության նախագահի փոփոխություն: «Ես տեղեկություն չունեմ: Նման հարց «Ժառանգության» ներսում չի քննարկվել»,-ասաց Սաֆարյանը:
Ինչ վերաբերում է Րաֆֆի Հովհաննիսյանի` Հայաստանից հեռանալու խոսակցություններին, այդ մասին ևս կուսակցության ներկայացուցիչը հստակ ոչինչ չասաց. «Նման լուրեր տարածողները թող փաստեր բերեն: Չեմ ուզում պրն Հովհաննիսյանի անունից խոսել: Դա իր անձնական տիրույթում է և իր քննարկելիք հարցն է»:
Եթե Րաֆֆի Հովհաննիսյանի հեռանալու մասին տեղեկատվությունը դեռ հաստատված չէ, համագումարում քննարկվելիք հարցերն էլ չհստակեցված, ապա Ստեփան Սաֆարյանի «Ժառանգության» վարչության նոր կազմում չմնալը հաստատ է: Դա պայմանավորված է Սաֆարյանի կողմից հիմնած միջազգային և անվտանգության հարցերի հայկական ինստիտուտի գործունեությամբ: «Ֆիզիկապես չեմ կարող համատեղել կուսակցական, գիտական, հասարակական աշխատանքը: Այդ պատճառով ես կուսակցության վարչության ապագա կազմում չեմ լինելու»,- եզրափակեց Սաֆարյանը:
.gif)
