Էլեկտրաէներգիայի սակագնի բարձրացումն անխուսափելի է. Ռ. Նազարյան

Այսօր  Հանրային Ծառայությունները Կարգավորող Հանձնաժողովի նախագահ Ռոբերտ Նազարյանն ԱԺ–ում էր։ ԲՀԿ խմբակցության հետ հանդիպումից հետո նա լրագրողներին  վստահեցրեց, որ էլեկտրաէներգիայի սակագնի բարձրացումն անխուսափելի է։

«Միշտ, երբ որ սակագների վերանայում է լինում, և մենք ստիպված ենք լինում բարձրացնել, ես ասում եմ՝ ինձ համար ամենաանընդունելի որոշումներից մեկն եմ կայացնելու։ Ես ինքս էլ ձեր նման սպառող եմ, ունեմ շատ հարազատ, մոտիկ մարդիկ, նաև, ի վերջո, մեր սպառողները, որոնց շահերն էլ մենք կոչված ենք պաշտպանելու։ Իհա՛րկե, խնդիր է. կոմունալ ծառայությունների ամեն մի բարձրացում մարդկանց գրպանին է խփում»,- նշեց Ռ. Նազարյանը։

Նա հույս հայտնեց,  որ էլեկտրաէներգիայի թանկացումից հետո կառավարությունն իր սոցիալական ծառայությունների մեջ փոփոխություններ կկատարի և կաջակցի սոցիալապես անապահով խավերին և թոշակառուներին։

«Իմ գնահատմամբ՝ այս 4 դրամը ընտանիքների վրա տարեկան մոտավորապես 8-9 հազար դրամի բեռ է առաջացնելու։ Բայց դատապարտված ենք բարձրացնելու։ Եթե անգամ 0,5 տասնորդական տոկոսի հնարավորություն լիներ չբարձրացնելու, ես խոստանում եմ՝ մենք այս քայլին չէինք գնա։ Մեզ համար էլ շատ դժվար է լրատվամիջոցներում տարբեր տեսակի խոսքեր մեր հասցեին լսելը և ժողովրդի վրդովմունքը։ Այսօր արդեն 16 մլրդ, 600 մլն–ի վնասներ ունի ընկերությունը, վարկային մեծ պորտֆել է կուտակել, որի սպասարկման աղբյուրը չկա և կարող է սկսի հայտնվել բանկրոտի մեջ», – հայտարարեց նա։

Էլեկտրաէներգիայի սակագնի բարձրացման մասին քննարկումները կշարունակվեն մինչև այս ամսվա վերջ, և, Ռոբերտ Նազարյանի խոսքերով, սակագինը մոտ 4 դրամով կթանկանա հավանաբար արդեն օգոստոսի 1–ից։