ՍՍԿ ԵՎ ՌՔԿ

Վարդան Օսկանյանի` ԲՀԿ շարքերն ընդունվելուց հետո կրկին ծայր առան խոսակցություններն այն մասին, որ ԲՀԿ համամասնական ցուցակը  վերածվելու է  Ռոբերտ Քոչարյանի  կադրային բանկի:  Ինչ խոսք, «Բարգավաճ Հայաստան»-ի  դեպքում դժվար է ժխտել Քոչարյանի ազդեցության գործոնը, մանավանդ որ` Գագիկ Ծառուկյանը երբեք էլ առանձնապես չի թաքցրել կամ հերքել դա: Սակայն ԲՀԿ-ին Քոչարյանի կցորդ կամ մեկ մարդու կուսակցություն լինելու մեջ մեղադրող ուժերն իրենք էլ, մեղմ ասած, հեռու են կատարելությունից:  Օրինակ` ԲՀԿ-ի թիվ մեկ մրցակից Հանրապետական կուսակցությունը տարիներ շարունակ փորձ է արվում ներկայացնել իբրեւ  քաղաքական ուժ, որի առանցքը ոչ թե որեւէ անհատ է, այլ անփոփոխ  գաղափարախոսություն: Այն, որ ՀՀԿ-ն իրոք այդպիսին է եղել Աշոտ Նավասարդյանի շրջանում, ոչ ոք կարծես թե չի հերքում: Սակայն այդ տարիներին ՀՀԿ-ն իրենից առանձնապես մեծ հետաքրքրություն չէր ներկայացնում, իսկ դրանից հետո արդեն` թե՛ Վազգեն Սարգսյանի եւ առավել եւս թե՛ Անդրանիկ Մարգարյանի օրոք,  այն դարձավ պարզապես սովորական իշխանական կուսակցություն, որտեղ որոշիչ խոսքը  պատկանում էր  իշխանության մեջ բարձրագույն պաշտոն զբաղեցնող  ՀՀԿ առաջնորդին:  Այդուհանդերձ,  հատկապես Ա.Մարգարյանի մարդկային որակների շնորհիվ,  ՀՀԿ-ն դեռեւս կարող էր ներկայանալ իբրեւ սեփական տեսակետ ունեցող մարդկանց համախումբ, որոնք կուսակցությունում ապահովում են բազմակարծություն ու ընդհանուր առմամբ թույլ չեն տալիս  գաղափարական  զգալի շեղումներ:
 Սակայն Սերժ Սարգսյանի` ՀՀԿ նախագահ դառնալուց հետո  պատկերը կտրուկ փոխվեց:  (Ի դեպ, զարմանալի է, որ Օսկանյանի` 60 տարեկանում ԲՀԿ կամ Տիգրան Սարգսյանի` 48 տարեկանում ՀՀԿ անդամակցությունն ամոթալի համարող ՀՀՇ վարչության նախագահ Արամ Մանուկյանը մոռացավ նշել Սերժ Սարգսյանի` 52 տարեկանում Հանրապետական դառնալու փաստը): Հատկապես 2008թ. նախագահական ընտրություններից հետո ՀՀԿ-ն իսպառ կորցրեց իր երբեմնի քաղաքական որակները, եւ այսօր դժվար է միանշանակ ասել` ԲՀԿ-ն է ավելի շատ մեկ մարդու կուսակցություն, թե ՀՀԿ-ն: Դժվար է հիշել գոնե մեկ դեպք, երբ ՀՀԿ-ական հայտնի դեմքերից որեւէ մեկը համարձակվեր Սերժ Սարգսյանի ասածին ոչ թե հակադրվող, այլ գոնե թեթեւակիորեն տարբերվող տեսակետ հայտնել:  Ինչն, ի դեպ, ԲՀԿ-ի դեպքում պատահում է: Այն, որ ՀՀԿ-ն վերածվել է ՍՍԿ-ի` ակնհայտ է դառնում անգամ կուսակցության պաշտոնական կայքէջից, որտեղ տեղադրված  վերջին 4 տարիների հայտարարությունների 99 տոկոսը  բացառապես Սերժ Սարգսյանի խոսքն է, եւ այնպիսի տպավորություն է, որ դա ոչ թե ՀՀԿ կայքն է, այլ անձամբ Սերժ Սարգսյանի:
 Իսկ ինչ վերաբերում է ԲՀԿ-ն Քոչարյանի կադրային բանկ դարձնելուն, ապա նույնը պատրաստվում է անել նաեւ Սերժ Սարգսյանը` ՀՀԿ ցուցակ խցկելով այլ կուսակցությունների` իրեն  ցանկալի դեմքերին: Այնպես որ, վաղուց ժամանակն է, որ ԲՀԿ-ն էլ, ՀՀԿ-ն էլ անվանափոխվեն համապատասխանաբար` ՌՔԿ-ի եւ ՍՍԿ-ի: