«Թրանսփարենսի Ինթերնեյշնլ հակակոռուպցիոն կենտրոն» (ԹԻՀԿ) հասարակական կազմակերպությունը, որն իրականացնում է Հայաստանի Հանրապետության պետական գնումների համակարգի մոնիտորինգ, այսօր ներկայացրեց 2011-2013 թթ. պետական գնումների համակարգի մոնիտորինգի արդյունքները՝ արձանագրելով, որ համակարգում առկա են բազմաթիվ խնդիրներ:
ԹԻՀԿ պետական գնումների փորձագետ Արտակ Մանուկյանի ներկայացմամբ՝ առաջինը մեկ անձից գնումներն են: «Հիմնականում մարզպետարաններն են, որոնք իրականացնում են մեկ անձից բաղկացած գնումներ, պետական գնումների շուրջ 67%-ը մեկ անձով է կատարվում, այսինքն՝ մրցույթ չկա»,-ասաց նա:
Վերջինս զավեշտալի համարեց, որ շատ ընկերություններ կան, որոնք կրծողների դեմ են պայքարում, նաև շինարարական մեծ տենդերներ են հաղթում. «Սա մեզ համար տարօրինակ է»:
Արտակ Մանուկյանը շարունակեց ներկայացնել ուսումնասիրությունների հիմնական արդյունքները, որոնք հետևյալներն են.
1. Մեկ անձից գնումները հանդիսանում են գնման նախապատվելի ձև պետական կառավարման մարմինների համար, ընդ որում, առկա է մեծ կենտրոնացվածություն թե քանակային, թե գումարային առումներով:
2. Հանրային կազմակերպությունների մոտ (չնայած օրենքով սահմանված պահանջներին) նկատվում է գնումների մասով թափանցիկության հաշվետվողականության պակաս:
3. Էլեկտրոնային գնումների համակարգն ամբողջական չէ:
4. Էլեկտրոնային գնումների համակարգի միջոցով հայտարարված ընթացակարգերի շուրջ 40%-ը համարվում է չկայացած:
5. Պայմանագրային պատվիրատուները լրջորեն չեն մոտենում էլ. գնումների մասով հանրային տեղեկատվությանը:
6. Համակարգում առկա են բազում տեխնիկական բնույթի հիմնախնդիրներ:
7. Չնայած աստիճանաբար մեծանում է բողոքարկման ինստիտուտի նկատմամբ վստահությունը, սակայն գործընթացն արդյունավետ չէ:
8. Կան հիմնավոր կասկածներ ընտրանքի պատահական լինելու և ռոտացիոն համակարգի նկատմամբ:
9. Գնումների աջակցման կենտրոնը չի օգտվում Առևտրի համաշխարհային կազմակերպության գնումների համաձայնագրի անդամակցությունից բխող առավելություններից:
10. Չի իրականացվում պլանավորված և փաստացի ընթացակարգերի համեմատական վերլուծություն:
11. Գնումների պաշտոնական կայքը բարելավման կարիք ունի:
.gif)
