ՀԱՐՑ. Ձնհալից հետո Երեւանի փողոցներում շատ փոսեր են առաջացել, ընդ որում, հիմնականում կենտրոնական փողոցներում: Երեւանի քաղաքապետարանն ասֆալտապատման աշխատանքներ արդյո՞ք նախատեսում է, թե՞ հույսներս դնենք մեծամասնականով առաջադրվող պատգամավորական թեկնածուների վրա:  

ՊԱՏԱՍԽԱՆ. Երեւանի քաղաքապետարանի աշխատակազմի Շինարարության եւ բարեկարգման վարչությունը տեղեկացնում է, որ ինչպես նախորդ տարիներին, աjնպես էլ 2012 թվականին, քաղաքապետարանի ծրագրով նախատեսված են քաղաքային փողոցների ընթացիկ վերանորոգման, հիմնանորոգման եւ ճաքալցման աշխատանքներ: Ներկայում կատարվում են տեղային ընթացիկ նորոգման աշխատանքներ, իսկ եղանակային բարենպաստ պայմանների դեպքում (միջին ջերմաստիճանը +5 եւ բարձր) կսկսվեն հիմնանորոգման աշխատանքները: Երեւանի քաղաքապետարանի ծրագրերով 2012 թվականին մայրաքաղաքի փողոցներում եւ բակային տարածքներում կիրականացվի շուրջ 1 միլիոն քմ ասֆալտապատում, որի աշխատանքներն իրականացվելու են նաեւ վարչական շրջանների ծրագրերով:

«ԺՈՂՈՎՈՒՐԴ». Երեւանի քաղաքապետարանի տրամադրած տեղեկատվությունը միանգամայն հավաստի է: Իսկապես, ձնհալից անմիջապես հետո հատկապես Երեւանի կենտրոնական փողոցներում ասֆալտապատման աշխատանքներ են իրականացվում: Խնդիրն է այն է, սակայն, որ ասֆալտը փռվում է կիսասառած ու դեռեւս թաց գետնին: Անզեն աչքով էլ պարզ է, որ չանցած մի քանի օր` ավազի ու աղի հետեւանքով քայքայված գետինը նույն տեսքն է ստանալու: Երեւի թե քաղաքապետարանը ճիշտ կաներ` մի փոքր սպասեր: Ասֆալտապատման աշխատանքների ահռելի ծավալ է նշվում, բայց լավ կլիներ` ոչ թե գործն արվեր պարզապես անելու համար, այլ  իր բուն նպատակին ծառայեր: