Այս պահին Էրեբունի ԲԿ-ի վերակենդանացման բաժնում գտնվող Արմավիրի քաղաքապետ Ռուբեն Խլղաթյանի ու մյուս երկու վիրավորների վիճակը բժիշկները գնահատում են կայուն ծանր:
Ինչպես լրագրողներին հայտնեց Էրեբունի ԲԿ փոխտնօրեն, բժիշկ Միքայել Մանուկյանը, վիրավորներն ունեն բազմաթիվ վերքեր, կոտրվածքներ:
Տվյալ պահին նրանց կյանքին վտանգ չի սպառնում: Հիվանդներից երկուսին այսօր շտապ վիրահատել են:
Ինչպես Armlur.am-ին հայտնեց Արմավիրի մարզպետ Աշոտ Ղահրամանյանը, ինքը տեղյակ չէ` ինչու էր քաղաքապետը ժամանել Քաշաթաղ: Մարզպետի խոսքով` Ռուբեն Խլղաթյանն արձակուրդում է և Քաշաթաղ աշխատանքային այցով չէր գնացել:
«Դեռևս չգիտեմ` Խլղաթյանն ինչու էր Քաշաթաղ գնացել»,- ասաց մարզպետը:
Տեղեկացնենք, որ տարածված լուրերի համաձայն` Արմավիրի քաղաքապետն ու իր հետ այնտեղ գտնվողները որսի համար էին գնացել: Սակայն այս տեղեկությունը հերքեց Քաշաթաղի շրջանի վարչակազմի ղեկավար Սուրեն Խաչատրյանը` նշելով, որ այն հատվածում, որտեղ պայթել է ականը, որսն արգելվում է:
Վիրավորների վիճակի մասին` առավել մանրամասն` տեսանյութում:
Ինչպես ավելի վաղ հայտնել էր Armlur.am-ը, Քաշաթաղի հյուսիսային մասում «Տոյոտա պրադա» մակնիշի ավտոմեքենան պայթել է ականապատ տարածքում, ինչի հետևանքով 1 հոգի մահացել է, իսկ 3-ը ստացել են մարմնական վնասվածքներ: Վիրավորների թվում է Արմավիրի քաղաքապետ Ռուբեն Խլղաթյանը: Վիրավորներն այս պահին գտնվում են Էրեբունի ԲԿ-ում:
.gif)
