Հայաստանում ԱՄՆ դեսպան Ջոն Հեֆֆերնը, պարզվում է, անուղղելի լավատես է: Այդ մասին դեսպանն ինքն է երեկ հայտարարել` հավելելով, որ միգուցե իր լավատեսությունը գալիս է նրանից, որ ինքը ամերիկացի է: Ինչ խոսք, ԱՄՆ քաղաքացի, այն էլ բարձրաստիճան դիվանագետ լինելը լավատես լինելու համար բավականին հզոր փաստարկ է, սակայն տարօրինակ կերպով այն չէր գործում պարոն Հեֆֆերնին նախորդող գործընկերների դեպքում: Իսկ ահա նրա լավատեսությունն ուղղակի աչք է ծակում: Դեռեւս փետրվարի 12-ին Հրազդանում կայացած քաղաքապետի ընտրությունների ընթացքում դեսպան Հեֆֆերնը բացառապես իր լավատեսության շնորհիվ «չարձանագրեց» լուրջ ընտրախախտումներ` ի տարբերություն «հոռետես» հրազդանցիների ու լրագրողների, որոնց աչքի առջեւ ընտրությունները կեղծվեցին: Հիմա էլ, չնայած ընտրացուցակների խայտառակ ուռճացմանը, իշխանության կողմից պետական լծակների ապօրինի կիրառմանն ու արդեն իսկ բաժանվող ընտրակաշառքին, ԱՄՆ դեսպանը կարծում է, որ. «Երբ ազատ ու արդար ընտրություններ անցկացնելու հավաստիացումներ են տրվում, ու դրանք գալիս են ամենաբարձր մակարդակից ու այդպիսի հստակությամբ, մենք ենթադրում ենք, որ դրանք կկատարվեն»: Միեւնույն ժամանակ, Հեֆֆերնը հարկ է համարում նկատել, որ. «Այդ ամենը կյանքի կոչելը միայն նախագահի խնդիրը չէ, դրանում իրենց դերակատարությունը պետք է ունենան ընդդիմադիր քաղաքական ուժերը, քաղաքացիական հասարակությունը եւ լրագրողները»: Հասկացա՞ք: Նախագահը կարող է եւ շատ ուզենա իրականացնել ազատ ու արդար ընտրություններ, բայց եթե ընդդիմությունն ու լրագրողները չցանկանան ունենալ իրենց դերակատարումը, խեղճ Սերժ Սարգսյանը միայնակ ինչ անի: «ԱԺ ընտրությունների հանդեպ լուրջ թերահավատության փոխարեն կատարե՛ք աշխատանքի ձեր մասը»,-ասում է լավատես դեսպանը: Ասել է թե` իզուր տեղը մի՛ բողոքեք, մեկ է` արդեն որոշված է, որ ԱԺ ընտրություններին ԱՄՆ-ի գնահատականը լինելու է «լավատեսական», իսկ եղած թերությունների դեպքում էլ առաջ է մղվելու` «միայն նախագահի խնդիրը չէ» թեզը: Ի դեպ, իր ղեկավարի ասածը երեկ բառացիորեն կրկնել է նաեւ ԱՄՆ դեսպանատան քաղաքական հարցերի պատասխանատու Քրիստոֆեր Անդերսենը: «Միայն կառավարությունը չէ, որ պետք է ապահովի ազատ եւ արդար ընտրություններ, դա նաեւ ԶԼՄ-ների եւ քաղաքացիական հասարակության խնդիրն է: Մենք այս հարցում չեզոք ենք, ժողովուրդը պետք է պահանջի»,-ասել է Անդերսենը` այդպիսով առավել ակնհայտ դարձնելով այն, որ ԱՄՆ-ը այս հարցում «ձեռքերը լվանում է»: Այս դիվանագետը, սակայն, առավել քան թափանցիկ է արտահայտվել` հայտարարելով. «Աշխատանքները պետք է կատարվեն այնպես, որ հենց քվեարկության օրը կայանան ազատ եւ արդար ընտրություններ»: Փաստորեն, ԱՄՆ-ը ՀՀ իշխանություններին ասում է` մինչեւ ընտրությունների օրն ինչ ուզում եք` արեք, միայն թե «հենց քվեարկության օրն» այդ ամենն ավարտե՛ք եւ ապահովեք «ազատ, արդար ընտրություններ»: Այս ամենի մեջ ամենամտահոգիչը, սակայն, հետեւյալ հարցն է` ԱՄՆ-ի «լավատեսության» դիմաց ինչ գին են խոստացել վճարել ՀՀ իշխանությունները:
.gif)
