«ՄԵՆՔ ԱՅՆ ԴԱՇՏՈՒՄ ԵՆՔ, ՈՐՏԵՂ ՊԱՅՔԱՐ Է ԳՆՈՒՄ»

«Ժողովուրդ»-ն արդեն տեղեկացրել է, որ ԱԺ ՀԱԿ խմբակցությունում կրքերն օր օրի թեժանում են, քանի որ հանրահավաքային պայքարին եւ եռյակի վարած քաղաքականությանը «մասնակցում» են միայն խմբակցության ղեկավար Լեւոն Զուրաբյանը եւ քարտուղար Արամ Մանուկյանը, իսկ մյուսներին հորդորել են «չխառնվել»: ԱԺ ՀԱԿ խմբակցության մյուս անդամները գործընթացին չեն մասնակցում, քանի որ որոշվել է, որ այս պայքարը «Հայ ազգային կոնգրես» կուսակցության պայքարն է լինելու, ուստի Նիկոլ Փաշինյանը, Հրանտ Բագրատյանը, Գագիկ Ջհանգիրյանն ու Լյուդմիլա Սարգսյանը որեւէ բանից տեղյակ չեն: Երեկ «Ժողովուրդ»-ը զրուցել է ԱԺ ՀԱԿ խմբակցության անդամ Լյուդմիլա Սարգսյանի հետ՝ պարզելու համար, թե ինչ տարաձայնություններ են առաջացել ԱԺ ՀԱԿ խմբակցությունում, եւ արդյոք նա մասնակցելու է հոկտեմբերի 24-ին կայանալիք հանրահավաքին:

-Տիկի՛ն Սարգսյան, Դուք հոկտեմբերի 10-ի հանրահավաքից առաջ կոչ արեցիք Ձեր ղեկավարած ՎՍԴՀ կուսակցության անդամներին մասնակցել հանրահավաքին: Ի՞նչ ակնկալիքներ ու սպասումներ ունեիք այդ հանրահավաքից, արդյո՞ք դրանք արդարացան:
-Մեր տեսակետը կար ու մնում է նույնը. մենք բոլորով մտել ենք մի պայքարի մեջ, որը վերջ ի վերջո մեր ժողովրդին պետք է բերի հաղթական հանգրվանի: Որովհետեւ երկրում տիրող այս իրավիճակն այլեւս տանելի չէ, ու ժողովուրդն էլ կարծես թե պայքարի այլ միջոց չունի իշխանությունների դեմ բացի հանրահավաքային գործընթացից, որով, ըստ էության, քաղաքական ուժերը փորձում են խմբագրել ժողովրդի պահանջներն ու դա պարտադրել իշխանությանը: Ու այստեղ մեր տեսակետների մեջ չի կարող փոփոխություն լինել, որովհետեւ մենք արդեն տարիներ շարունակ պայքարում ենք երկրում օրինականության հաստատման համար: Մենք այն դաշտում ենք, որտեղ պայքար է գնում: Ու մենք մեր գործընկերների հետ շարունակելու ենք մեր այդ պայքարը:
-Բայց ըստ շրջանառվող տեղեկությունների՝ ՀԱԿ-ում որոշում կա, որ այս պայքարը կուսակցական պայքար է, ու Դուք որեւէ կերպ այդ գործընթացին չեք «խառնվում»: Որքանո՞վ են իրական այս տեղեկությունները, եւ ինչո՞ւ Դուք ակտիվ չեք, անգամ հանրահավաքի ժամանակ ելույթ չունեցաք:
-Ամեն դեպքում, ես ինչքան հասկանում եմ՝ ԱԺ խմբակցությունների ֆորմատով է այս պայքարն ընթանում, իսկ ես էլ ԱԺ ՀԱԿ խմբակցության անդամ եմ, հետեւաբար այստեղ ֆորմատի փոփոխություն չկա համեմայնդեպս ԱԺ-ում վարվող մեր աշխատանքների մեջ, որը նաեւ հանրահավաքային պրոցեսներում է հնչում:
-Հոկտեմբերի 24-ին ԱԺ ոչ իշխանական 3 ուժերը կրկին հանրահավաք են հրավիրել: Ըստ Ձեզ, ի՞նչ տվեց նախորդ հանրահավաքը հասարակությանը, եւ ի՞նչ կարելի է սպասել առաջիկա հանրահավաքից: Ի դեպ, Դուք մասնակցելո՞ւ եք:
-Այո՛, իհարկե: Իսկ հանրահավաքների նպատակը ո՞րն է, ի՞նչ է տալու դա հասարակությանը: Մենք ունենք կոնկրետ նպատակ՝ ազատվել այս իշխանություններից, որովհետեւ իշխանությունը դժգոհ է այս քրեաօլիգարխիկ համակարգի ձեւավորումից եւ իշխանության վարած արտաքին եւ ներքին քաղաքականությունից, որը ոչ մի բան չի տալիս ժողովրդին: Ընդամենը իշխանության գրպաններն են հարստացվում, այս իշխանությունը միայն այս ուղղությամբ է աշխատում, իսկ թե ինչպես է ապրում ժողովուրդը, ինչ խնդիրներ ունի, ինչու է արտագաղթում, այդ մասին իշխանությունում որեւէ մեկը չի մտածում: Դա հուզում է այն քաղաքական ուժերին, որոնք այսօր փորձում են հանրահավաքային պահանջների միջոցով ժողովրդի պահանջները պարտադրել իշխանությանը: Այլ ճանապարհ մենք այսօր չենք տեսնում:
-Բայց կարծես թե ընդդիմությունն էլ դեռեւս հստակ օրակարգ չունի: Օրինակ` ԲՀԿ առաջնորդ Գագիկ Ծառուկյանն ընդհանրապես չի խոսում իրենց փողոց դուրս գալու, պայքարելու հիմնական նպատակի մասին: Դա Ձեզ չի հիասթափեցնո՞ւմ, հնարավո՞ր է առաջիկայում եռյակի քաղաքական ուժերը կրկին պառակտվեն:
-Ես նման բան չեմ տեսնում, ավելին՝ ես կարծում եմ, որ 3 խմբակցություններն էլ շատ հստակ գիտակցում են իրենց առաքելությունը ու շատ լավ հասկանում են, որ միայն միասնական պայքարում կարող են արդյունք գրանցել ու օգտակար լինել հուսահատ եւ հուսախաբ եղած մեր ժողովրդին: Պառակտման որեւիցե երեւույթ ես չեմ տեսնում եւ հույս ունեմ, որ ապագայում եւս պառակտում չի լինելու: Ավելին՝ ես տեսնում եմ վճռականություն, համառություն եւ միասնական կամք` շարունակելու պայքարը: Կարծում եմ, որ ոմանք ուզում են տեսնել այն, ինչը չկա:
-Նշվում է նաեւ, որ պառակտում կա ԱԺ ՀԱԿ խմբակցությունում…
-Չի կարող նման բան լինել, քանի որ մեր համատեղ որոշման արդյունքում է, որ մասնակցում ենք: Հետեւաբար հանրահավաքի ժամանակ ներկայացվում է մեր ամբողջ խմբակցության, մեր ամբողջ թիմի մոտեցումը:

Զրուցեց ՍՈՆԱ ԳՐԻԳՈՐՅԱՆԸ

 
«ԴԵ ԹՈՂ ՏՈՒԱԼԵՏԻ ՆԵՐՍՈՒՄ ԷԼ ՏԵՍԱԽՑԻԿ ԴՆԵՆ»

ԱԺ ՕԵԿ խմբակցության պատգամավոր Հովհաննես Մարգարյանը նախօրեին Աժ-ում բարձրաձայնել էր տեսախցիկների եւ արագաչափերի հետ կապված քաղաքացիների դժգոհության մասին՝ շեշտելով, որ ամենուրեք տեսախցիկ տեղադրելն արդեն «մոդա է դարձել»: Մարգարյանը նաեւ արտահայտել էր իր դժգոհությունը ԱԺ-ում տեղադրված բազմաթիվ տեսախցիկների կապակցությամբ` նշելով, որ դրանք ԱԺ աշխատակիցների կյանքը դարձրել են անտանելի:

«Պատկերացրե՛ք Ազգային ժողովի հարյուրավոր աշխատակիցների վիճակը, որ յուրաքանչյուր տուալետի մոտ տեսախցիկ է դրված. տպավորություն է, կարծես թե հատուկ նշանակության ռազմավարական օբյեկտ է: Դա մեզ պատիվ չի բերում: Դե եկե՛ք արագաչափ էլ դնենք այդ զուգարաններում»,-հեգնել էր Մարգարյանը: ՕԵԿ-ական պատգամավորի բարձրացրած խնդիրը, սակայն, նրա գործընկերներից շատերը համարել էին անլուրջ` տարբեր մեկնաբանություններ անելով:
Սակայն Հովհաննես Մարգարյանը «Ժողովուրդ»-ի հետ զրույցում շեշտեց, որ իր կողմից բարձրացված հարցը շատ լուրջ է:
-Պարո՛ն Մարգարյան, Ձեր ելույթում նշեցիք, որ դեմ եք ԱԺ-ում ամեն քայլափոխին տեսախցիկներ տեղադրելուն: Ձեր կարծիքով դա խանգարո՞ւմ է աշխատելուն:
-Ես շատ կարեւոր խնդիր եմ բարձրաձայնում: Պետք չէ դրան անլուրջ մոտենալ: Քաղաքացիներն են իրենց դժգոհությունը հայտնում:
-Այդ հայտարարությունը Ձեր գործընկերների շրջանում բուռն եւ ոչ միանշանակ քննարկումների տեղիք տվեց, ոմանք բարձրացված հարցը լուրջ չհամարեցին: Ինչո՞վ է դա պայմանավորված:
-Չեմ ուզում մեկնաբանել նման վարվելակերպը: Չէ՞ որ ես լուրջ խնդիր եմ բարձրաձայնում, ինչպե՞ս կարելի է դրան անլուրջ վերաբերվել: Ես բարձրացրեցի խնդիր եւ անչափ կարեւորում եմ այն: Արդեն վաղ առավոտից համապատասխան մասնագետները քայլում էին ԱԺ-ի միջանցքներով: Տեխնիկական անձնակազմի սպասարկողներն ասում են, որ պետք է խնդիրը վերանայվի: Տեսախցիկներն անվտանգության աշխատակիցների կողմից են տեղադրվել, իրենք էլ, համապատասխան որոշման դեպքում, պետք է լուծեն այդ խնդիրը:
-ՀՀԿ խմբակցության պատգամավոր Համլետ Հարությունյանը Armlur.am-ի հետ զրույցում Ձեր այդ հայտարարությունը որակեց որպես անլուրջ:
-Ամենաանլուրջն այն մարդն է, ով ոտնահարված մարդու իրավունքը փորձում է ոտնահարել: Այստեղ կարեւորագույն խնդրի մասին ենք խոսում: Թող իրենք առաջարկներով հանդես գան, միգուցե այդ դեպքում տեսախցիկները կտեղադրվեն նաեւ իմ նշած «հատուկ նշանակության ռազմավարական օբյեկտների» ներսում:

Զրուցեց ԼՈՒՍԻՆԵ ՀԱԿՈԲՅԱՆԸ

 
ԼՈՒՐԵՐ

ՄԻՊ-Ի ԴԵՌ ՉԿԱՅԱՑԱԾ ՁԵՌՔԲԵՐՈՒՄԸ
ՀՀ արդարադատության նախարարության «Արմավիր» քրեակատարողական նոր հիմնարկի առաջին մասնաշենքը շահագործման կհանձնվի 2014թ նոյեմբերի սկզբին: Այս մասին «Ժողովուրդ»-ի հետ զրույցում հայտնեցին ՀՀ արդարադատության նախարարության լրատվական բաժնից: Սակայն Մարդու իրավունքների պաշտպանի գրասենյակն իր՝ 2013թ տարեկան հաշվետվության մեջ, անդրադառնալով ՀՀ արդարադատության նախարարության կողմից արձանագրված ձեռքբերումներին, որպես հաջողություն նշել էր «Արմավիրի» քրեակատարողական նոր հիմնարկի առաջին մասնաշենքի շահագործումը: Մինչդեռ նշված ՔԿՀ-ն այս տարվա նոյեմբերի սկզբին նոր պետք է շահագործման հանձնվի: Զավեշտ:

«ՍՊԱՅԿԱՆ» ՏՈՒԳԱՆՎԵՑ
ՀՀ ֆինանսների նախարարությունը հերթական անգամ տուգանել է «Սպայկա» ընկերությանը: «Ժողովուրդ»-ին հայտնի դարձավ, որ սեպտեմբերի 24-ին «Սպայկա» ընկերության տնօրեն Դավիթ Ղազարյանը Հայաստան է ներմուծել պոլիմերային թաղանթով պաշտպանիչ թուղթ եւ պոլիմերային ցանցավոր պարկեր, սակայն սահմանված ժամանակում դրանց մաքսային հայտարարագրերը մաքսային մարմին չի ներկայացրել: Արդյունքում ՍՊԸ-ի տնօրեն Դավիթ Ղազարյանը տուգանվել է 50 հազար դրամի չափով: Հիշեցնենք, որ նախորդ տարի մայիսի 16-ին «Սպայկա» ընկերության պահեստներում խոշոր հրդեհ էր բռնկվել:

ՈՒՐԻՇ ԱՆՈՒՆՈՎ
ՀՅԴ խմբակցության պատգամավոր Արծվիկ Մինասյանը «Ժողովուրդ»-ի հետ զրույցում ասաց, որ նախկինում իրենց հրապարակած առաջարկների զգալի մասը սահմանադրական փոփոխությունների հայեցակարգում հաշվի է առնված: «Փաստաթուղթը որակյալ է, քանի որ մանրամասնություններ ճշտելու անհրաժեշտություն կա, դրա համար մեր ամբողջական գնահատականը կտանք հետագայում»,- ասաց Մինասյանը: Պատգամավորը նշեց նաեւ, որ ՀՅԴ եւ իշխանության ներկայացուցիչների համագործակցության մասին խոսելիս գործընթացը ավելի ճիշտ կլինի բնորոշել որպես քաղաքական կոնսուլտացիաներ: «Կոնսուլտացիան հայտարարվել է, բայց դեռ չի սկսվել, մենք սպասում են ֆորմալ առումով սկսվելուն: Մեր տեսակետները միայն այդ ժամանակ կարող ենք ներկայացնել: Այս գործընթացը եւս կարող է անվանվել բանակցություն»,- նշեց Արծվիկ Մինասյանը:

ՉԵ՞Ն ԼՍԵԼ
Նախկին փոխվարչապետ Արմեն Գեւորգյանի պաշտոնանկությունից հետո մամուլում ակտիվ լուրեր շրջանառվեցին նաեւ ՀՀ էկոնոմիկայի նախարար Կարեն Ճշմարիտյանին հնարավոր պաշտոնանկության մասին, քանի որ նա չի վայելում Սերժ Սարգսյանի վստահությունը: «Ես առաջին անգամ ձեզանից եմ նման բան լսում: Նման բան չկա»,-«Ժողովուրդ»-ի հետ զրուցում վստահեցրեց Ճշմարիտյանի մամլո խոսնակ Սաթենիկ Ասիլյանը: Այն որ խոսնակն իր ղեկավարի հնարավոր պաշտոնանկությունն հերքում է նորմալ երեւույթ է, մինչեւ լուրը պաշտոնական հաստատում կստանա, կհերքվի հերքումը: Բայց որ ասում են, թե մամուլում շրջանառվող լուրերին ծանոթ չեն, մի տեսակ հավատ չի ներշնչում: