«Բանկերի հավանական միացումը «կջրի» օֆշորի գործը»

Օֆշորային սկանդալի գործով հայտնի գործարար Փայլակ Հայրապետյանն ու նրան սնանկացման եզրին հասցրած Աշոտ Սուքիասյանի առերեսումից հետո քննչական որևէ գործընթացի մասին Փ. Հայրապետանին չի հաջողվում տեղեկանալ: Այս մասին Armlur.am-ին հայտնեց գործարարը` հավելելով, թե իրենից ամեն ինչ գաղտնի է պահվում:

«Իզուր չի, որ ձուկը գլխից է հոտում: Երեկ էլ իմացա, որ հնարավոր է՝ բանկերը միանան: Սա լրիվ իմ գործերը կտապալի: Ասում են` էդ «Ամերիաբանկն» էլ միավորվում է, ոնց որ, «Կոնվերս բանկին»: Ուրիշ ի՞նչ անենք, թողնեմ գնամ, հրաժարվե՞մ հայ լինելուց: Դուք պատկերացնո՞ւմ եք` ինչ կլինի: Ինչ ուզում` անում են: Ես արդեն ասել եմ, որ եթե էս ձև շարունակվի, գժի տեղ դրած` նորմալ չքննեն, ծայրահեղ քայլերի կդիմեմ»,- վրդովված շարունակեց մեր զրուցակիցը:

Armlur.am-ն ավելի վաղ հայտնել էր, որ ՀՀ գլխավոր դատախազ Գևորգ Կոստանյանը հայտարարել էր, որ գործը գտնվում է իր ուշադրության կենտրոնում, և փաստը, որ գործում ներառված անձանցից Աշոտ Սուքիասյանն արդեն արտահանձնվել է, նոր թափ կհաղորդի գործի քննությանը:

Հիշեցնենք, որ Փայլակ Հայրապետյանի խոսքով` իր և Աշոտ Սուքիասյանի միջև տեղի ունեցած առերեսման ժամանակ վերջինս խոստովանել է, թե Տիգրան Սարգսյանն առնչություն է ունեցել օֆշորային սկանդալի հետ:

Հիշեցնենք նաև, որ նախորդ տարվա հունիսից ՀՀ քննչական գխավոր վարչության հատուկ կարևորագույն գործերով քննության վարչությունում նախորդ տարվա հունիսից Սուքիասյանի նկատմամբ հետախուզում էր հայտարարվել, և նրա նկատմամբ խափանման միջոց է ընտրվել կալանավորումը: Գործարար Ա. Սուքիասյանին ձերբակալել էին սույն թվականի փետրվարի 1-ին` Թուրքիայից Վրաստան ժամանման ընթացքում, իսկ արտահանձնման մասին որոշումը Վրաստանի արդարադատության նախարարը ստորագրել է հունիսի 3-ին:

Նշենք նաև, որ 2009-ին ՀՀ Էկոնոմիկայի նախարարության շենքում նախարար Ներսես Երիցյանի մոտ ՀՀ այդ ժամանակ վարչապետ Տիգրան Սարգսյանի գլխավորությամբ հանդիպում-խորհրդակցություն էր կազմակերպվել 23 արդյունաբերական կազմակերպությունների ղեկավարների հետ: Խորհրդակցության ժամանակ քննարկվել էր Ռուսաստանի՝ Հայաստանին տրամադրված 500 միլիոն դոլարի վարկը, որից 100 միլիոնը Ռուսաստանը պետք է տար ապրանքային տեսքով՝ ադամանդի հումքով։ Իսկ այդ 100 միլիոնի վարկը պետք է բաժանվեր այդ 23 կազմակերպության միջև, որպեսզի դրանք սկսեին աշխատել։

Գործարար Փայլակ Հայրապետյանն առաջարկել էր գրավադրել իր՝ 33 մլն դոլար արժողությամբ ամբողջ անշարժ գույքը և «Ամերիաբանկ»-ից ստացած մոտ 10 միլիոն դոլարը տվել էր Աշոտ Սուքիասյանին: Վերջինս, այդ գումարը վերցնելով,  փախել էր Հայաստանից: