Ֆրանսիական «Քարֆուր»-ի մուտքը Հայաստան վերջապես տեղի ունեցավ: Այսօր «Երևան Մոլ»-ում բացվեց հայտնի ընկերության հայաստանյան մասնաճյուղը: Լրագրողների հետ զրույցում ընկերության հայաստանյան գրասենյակի տնօրեն Քրիստիան դը Նալին, պատասխանելով հարցին, թե ինչու այսքան ձգձգվեց հայաստանյան մասնաճյուղի բացումը և արդյոք պատճառը հայաստանյան շուկայում տիրող մենաշնորհն էր, նշեց` ցանկացած նման մեծ ընկերության բացման համար տարիներ են անհրաժեշտ և դա նորմալ է:
Նա ընդգծեց` կփորձեն աշխատել նաև տեղական արտադրողների հետ: «Ոչ բոլոր ապրանքներ են լինելու ֆրանսիական` միայն 5 %-ը»,- ասաց նա և հավելեց, որ առաջին բանը, որը նա գնել է հիպերմարկետից, հայկական լավաշն է:
Բացման արարողությունից հետո, երբ լրագրողները փորձեցին ծանոթանալ ընկերության կողմից առաջարկվող տեսականիին, անվտանգության աշխատակիցները խոչընդոտեցին նկարահանումները` պատճառաբանելով, որ նկարահանումների համար ժամանակ էր հատկացրած, որից հետո լրագրողներին դուրս են հրավիրել: Իսկ անվտանգության պետ ներկայացած անձը պահանջում էր ջնջել նկարահանած նյութերը:
Ինչևէ, նորաբաց «Քարֆուրի» առաջարկած լայն տեսականիին, գնային քաղաքականությանը, սպասարկման որակին հայ սպառողը կարող է ծանոթանալ միայն այցելելով:
Մանրամասները ` Armlur.am-ի տեսանյութում
.gif)
